1 အာယူဒါ ဟဲ့ ဟွတ့် ကာလာင် ဂြုဝ်း တီ၊ အာယုဝ် အာဝ် ဟူ ခမ် ဒီ ကွယ် ဒီ အာတ့် ဒဲစေန့် အန်။ အန် ဒတ် တဝ်း၊ “တဲး ဒွန် အီ လေး ဒူင် ကွယ် အုဝ်။” ပါယ် တီ အာဝ် မိုဝ်း အာဆေ ကွယ် ယိုဝ် ဒေါ ကာလာင် အာယုဝ် ဒီ အီကတ် အန် အာဆေ အန် မုး။ 2 အန် ယီ ယာမ် တာင်၊ တဲး ဂေ ဒဲစေန့် အာမျုဝ် အဲဂိုပ် ပွိုန် ဒီ ထူမ်။ ပန် တီ ဂေ ဝီ ကာလာင် တဲး ခုန်ဒီခမ် ကော နပ် လွင် အန် တီ။

3 အာယုဝ် တွိုန် ယီ တဝ်း ဒီ အီကတ် ဂေ ဝါ အန်၊ “အုဝ် မုး အာယုဝ်။ မှဝ် ဂုန့် အုဝ်။း အန် ဟဲ့ ခ ဂျာမ်ဆာ။း” ဂေ အီကတ် ယီ တူ ပဲ ဒီ ဝျီ့ ဂြုဝ်း အန်။ ဂေ အာမ် ကာဆဝ်။

4 အန် ယီ တဝ်း၊ “တဲး ဘေ တး ကာတတ်၊ ယွတ် အုဝ်။” ဂေ ဟဲ့ ဟွတ့် တး ကာတတ်၊ အန် ဝီ တဝ်း၊ “အုဝ် မုး အာယုဝ်။ အုဝ် မုး ဝါ ဘေ အီ ပီ ဒွိုမ် ယွင့် ဘေ တဲး အန် ဟာဝ် ဇမ် မိူင် အဲဂိုပ်။ 5 ဒေါ တီ နီ ကွဲ့ တဲး ဘေ ယုဝ်။ ကွဲ့ တဲး ဘေ တဝ်း၊ န့ မုး မှာပ် ဘေ။ မာလဲ န့ မုး ဇဝ်ဖြာ အီ တိုယ် အုဝ် ယဲတ့် ဒီ အာတ့် ဘေ၊ တဲး အေ ဘောကာဂ့လျီတ် မိုဝ်း အာဆာက်။ 6 ဒေါ တီ နီ၊ အာခြာဝ် အေတ့် ဘူမ် ဟဲ့ နုဝ့် အာ ဆီနမ်။ န့ ဆီ ကွယ် ပေါ ဖန် ဆီနမ်။ ဒေါ အန် တီ န့ တူ လတ့် မာဆေ ခဲင် ဒူင် နာ။ 7 ခုဝ် အန် တီ ဇဝ်ဖြာ ဟဲ့ တိုယ် အုဝ် ယဲတ့် ဒီ အာတ့် ဘေ၊ တဲး အန် ချွတ် ဘေ၊ တဲး န့ မွှိုမ် အာမ် ကာဆဝ်၊ ကွဲ့ တဲး ဘေ ယမ် ပီ ဂေ ဒူအီ ကိူန်။

8 ပါယ် တီ န့ တူ မုး ဘေ အီ ဟဲ့ တိုယ် အုဝ် ဇမ် ဒီ နီ။ န့ မုး ဇဝ်ဖြာ။ အန် ဟဲ့ ဘူင် တဲး အုဝ် ဘဲန် ပီ ဂုန့် ခုန်ဒီခမ်၊ တဲး အုဝ် ဘဲန် ဒါ ကာညာ အီ အိုပ် ဘော န့ဟူမ် အန် ဘော မိူင် အဲဂိုပ် ဘော မိူင်။ 9 ဒေါ တီ နီ၊ တဲး ဘေ ဟာဝ် ဝေန့် ဟဲ ဟဲ၊ ဟာဝ် ဇမ် ဒူင် ကွယ် ဂုန့် အုဝ်။ တဲး ဘေ ဝီ ကာလာင် ဒီ အန်၊ ‘ဂွန် မဲ အီ မုး အာယုဝ်၊ အန် တဝ်း၊ ဇဝ်ဖြာ ဟဲ့ ဘူင် တဲး အုဝ် ဘဲန် ဒါ ကာညာ အီ အိုပ် မိူင် အဲဂိုပ် ဘော မိူင်။ တဲး မဲ တး ဒူင် ကွယ် အန် အူ ဇေန့်။ 10 အုဝ် ဒီ တဲး မဲ ကွယ် ဒူင် စိူဝ် ဂုဝ်ဆေန်၊ တဲး မဲ ကွယ် ကာတတ် အုဝ်။ ဘော မဲ ဘော လှုက်လှာန် မဲ ဘော မာဘူ ဂေ မာပဲ ဘော တူတ့် တူတ့် အီ မုး ကြုဝ်ကြာမ် မဲ၊ တဲး မဲ ဒိုဝ်း တး တူတ့် ဒွန် မျုဝ်။ 11 အုဝ် ဒီ ဟျီင် မဲ ဟူမ် ခဲင် မိူင် တီ။ အာခြာဝ် အေတ့် ဘူမ် န့ ဆီ ကွယ် ပေါ ဖန် ဆီနမ်။ ဘော မဲ ဘော န့ဟူမ် မဲ၊ ဂေ အီ ဒူပ် မဲ၊ အုဝ် တူ တဲး ဘေ ဇုတ် လုတ် မာဆေ။’”

12 အန် ဝီ တဝ်း ဒီ ဂေ၊ “ဟဲ့ မုး၊ ဘော ဘေ ဘော အာဘေန်ယာမ် တီ၊ တဲး ဘေ ယွတ် ဆီချာ၊ န့ မုး အုဝ်၊ အာယုဝ် အီ ကာလာင် ဂြုဝ်း ဒီ ဘေ။ 13 တဲး ဘေ ဟာဝ် ကာလာင် တူတ့် ဒီ ဂုန့် အုဝ် လွင် ဟဲ့ ဘဲန် အုဝ် ဒါ တာင် ခဲင် မိူင် အဲဂိုပ်။ တဲး ဘေ ကာလာင် တူတ့် ပဲ့ ဟဲ့ ယိုဝ် ဘေ ဒီ နီ။ တဲး ဘေ ယီ ဟာဝ် ဟဲ ဟဲ၊ တး တိုယ် ဂုန့် အုဝ် ဇမ် ဒီ နီ။”

14 အန် ဟဲ့ ဟွတ့် ကာလာင် ပါယ် တီ အန် ဝီ ငျီမ် ဝါ အန် အီ မုး အာဘေန်ယာမ်၊ ဘော ယာမ်။ ဘော အာဘေန်ယာမ် တွိုန် ဟဲ့ ယာမ်။ 15 ပန် တီ အန် ဝီ အုး အီကတ် အန် ဒွန် အီ၊ ဘော ငျီမ် ဂေ ဘော ယာမ်။ ဟဲ့ ဟွတ့် ဘူင် ပါယ် တီ ဂေ အီကတ် အန် ဟဲ့ ဝီ ယ ကာလာင် ဂြုဝ်း ဒီ အန်။

16 ပန် တီ ဝီ မိုဝ်း အီ ကာလာင် ဒီ ခုန်ဒီခမ်။ ဂေ တဝ်း၊ “ဂေ အူကတ် အူဝါ အာယုဝ် တွိုန် ဟဲ့ တး။” ဘော ခုန်ဒီခမ် ဘော ဂေ အာမူ အာမာတ် အန် ဟဲ့ ဒါခိုယ်။ 17 ခုန်ဒီခမ် ဝီ ကာလာင် ဒီ အာယုဝ် တွိုန်၊ တဲး အန် ဝီ ကာလာင် ဒီ အီကတ် အန် ပီ ဒီ လုဝ် ဘူင် ဂေ။ တဲး ဂေ ဒါင် ပီ ဒီ ဟူမ် ဒဲင် ကာတု မာလုဝ် ဂေ၊ ဝိဝ် မိူင် ကာနန့် တွိုန် အူ ဇေန့်။ 18 တဲး ဂေ ဝီ ဒဲ့ ဘော ဂုန့် ဂေ ဘော န့ဟူမ် ဂေ၊ ဝီ တး ဇမ် ဒီ နီ။ အန် တဝ်း ဒီ ဒွါ ဂေ ကွယ် ခဲင် ဒူင် မွှိုမ် လွှိုမ် ဒွန် ပ့လုဝ့် ခဲင် မိူင် ဘော မိူင်။ တဲး ဂေ ပွိုန် ဒီ ဟူမ် ခဲ့ လေး ခဲင် ဒူင် နာ ဂေ။

19 ခုန်ဒီခမ် ဝီ တဝ်း၊ “မဲ ဝီ လုဝ် တဝ်း ဒီ အီကတ် မဲ၊ ‘တဲး ဘေ ဒိုဝ်း လက်လဝ် ခဲင် မိူင် အဲဂိုပ်၊ ဟာဝ် မိူင် ဘေ။ တဲး ဂုန့် ဘေ ဘော အီဘိုန့် ဂေ ဂွန် ဘေ ပဝ့် လက်လဝ် တီ၊ တး ဇမ် ဒီ တီ။ 20 ကွဲ့ တဲး နဝ်း ဘေ မှဲ လွင် ကြုဝ်ကြာမ် ဘေ။ ခဲ့ မိုဝ်း ကြုဝ် အီ မွှိုမ် ခဲင် မိူင် အဲဂိုပ်၊ န့ ဒီ ဘဲန် ကြုဝ် ဘေ။’”

21 ဝါယ် အန် တီ ဂွန် အာကူပ် တွိုန်၊ ဂေ ဝီ ဘူင် ပီ စ်ု အာယုဝ် ဂေ ဘူင်။ အာယုဝ် ဒွါ ဂေ ပဝ့် လက်လဝ်၊ တဲး န့ ပီ ပီ စ်ု ခုန်ဒီခမ်။ အန် ဘော ဒွါ ဘော ပီ ဒီ ဟူမ် အာဒါ အာခြာဝ် ဒေါ ဟာဝ် ဂေ ဒူပ် န့တေန့်။ 22 အန် ဘော ဒွါ ခြိုင် ကာမာယ် ဒီ ဂေ။ ဒီ အာဘေန်ယာမ် တွိုန် အန် ယီ ဒွါ ရွိုန် အူယ် မာယဝ်း ဘူင့်။ အန် ဘော ဒွါ ခြိုင် ဒီ စှိုပ် ဘဲန် ဇိုမ် ဘဲန် ဇိုမ်။ 23 အန် ဘော တိုယ် ကြုဝ်ကြာမ် ဒီ ဂုန့် အန်။ န့ မုး မာလုဝ် ဂိုဝ် ဒုဝ်။ ဂေ ဒါင် ကြုဝ် မွှိုမ် ကာဆဝ် အီ လေး ခဲင် မိူင် အဲဂိုပ်။ အန် ဘော တိုယ် မာလုဝ် အာဟျာင် ဂိုဝ် ဒုဝ် အီ ဒါင် ငှုဝ် ဘော ခါမုန် ဘော ပီ ဒီ ဟူမ် အာဒါ ဂုန့် အန် ဒေါ ဟာဝ် အန် ဒူပ် န့တေန့်။ 24 ပန် တီ အန် ဘော တိုယ် အီကတ် အန် ဟာဝ်။ အန် တဝ်း၊ “ကွဲ့ လာယ် ကာအေး ကာထဲန့် ဒေါ ဟာဝ် ဘေ ဒူပ် န့တေန့်။”

25 ပန် တီ ဂေ ဝီ လေး မိူင် အဲဂိုပ်၊ ဟာဝ် ဒူင် ကွယ် ဂုန့် ဂေ၊ အီ စိူဝ် အာကူပ် တွိုန်၊ အီ ကွယ် ခဲင် မိူင် ကာနန့်။ 26 ဂေ ဟဲ့ ဟွတ့် ဇမ်၊ ဂေ ဝီ တဝ်း၊ “အာယုဝ် တွိုန် ဆီ ကွယ်။ အန် ဟဲ့ ဘဲန် ဒါ ကာညာ အီ အိုပ် မိူင် အဲဂိုပ်။” ဒေါ အန် တီ နဝ်း အန် ကော ဂ့၀ွင်၊ အာဝ် ပွိုန် ညှိုမ် ဂြုဝ်း ဂေ။ 27 ဂေ ယီ ကာလာင် တူတ့် အီ မိုဝ်း ခဲင် မိူင် အဲဂိုပ်။ အန် ဘော ယိုဝ် လက်လဝ် ပီ ပဝ့် တး ဂေ မိူင် အဲဂိုပ်၊ ပီ တိုယ် အာယုဝ် တွိုန် တဲး အန် ပဝ့်။ ဒေါ အန် တီ နဝ်း အန် ဘော ဝီ ဒါခိုယ်။ 28 ပန် တီ အန် တဝ်း၊ “ဟဲ့ မုး ဂွန် အုဝ်၊ အာယုဝ် တွိုန် ဆီ အိမ်။ အုဝ် ဒီ ဟာဝ် ယွတ် အန် အူ ဇေန့် အာတ့် ယမ် အုဝ်။”