ခါန် 44
လွင် အာယုဝ် ဝီ ထေဝ် နဝ်း အီကတ် အန်
1 ဝါယ် အန် တီ အာယုဝ် တွိုန် ဝီ စ်ု ဒဲစေန့် အန် တဝ်း၊ “တဲး မဲ ဟပ် ငှုဝ် ခဲင် စာန် ဂေ ဒူအီ တီ။ တဲး န့ ကိူန် ခဲ့ ပွိုန် ဂေ ဒိုဝ်း။ ဟဲ့ ဟွတ့်၊ မဲ ဝီ ဘ့လေး ရွိုန် ဒွန် အီ နာ ဒဲင် ငှုဝ် ခဲင် စာန် ဒွန် အီ။ 2 မဲ ဘော လုဝ် ဒိုဝ်း ဆီလယ့် ပီ ဒျီင် အုဝ် အီ မုး ရွိုန်၊ ဘ့လေး ခဲင် စာန် ဝါ တျီ့၊ တဲး န့ ကွယ် ရိုမ် ဒူပ် ရွိုန် ပဲ့ ဟဲ့ ဒိုဝ်း တး အန် အာဒါ ငှုဝ်။” အာယုဝ် ဟဲ့ ဟွတ့် ကာလာင် ပါယ် တီ ဒဲစေန့် အန် ဝီ ဘူင် တူတ့် ပီ စ်ု အန်။
3 ပါ ခဲညှာ ဆိန့်ဝး စေဝ် ဂေ အူကတ် အူဝါ ဝီ လေး၊ ဒိုဝ်း ဘော ကြုဝ်ကြာမ် ဂေ ပီ ဘ့လေး ဂေ ဒဲင် ကာတု မာလာ ဂေ။ 4 ဂေ ဟဲ့ ဟွတ့် လေး ခဲင် မိူင်၊ ဟာဝ် ဒူပ် န့တေန့် အီ စဲက်၊ အာယုဝ် တွိုန် ဝီ တဝ်း ဒီ ဒဲစေန့် အန်၊ “မဲ ယိတ့် ဟာဝ် ဒေါ တီ နီ၊ ဒူပ် ဂေ။ ဆေ မဲ ကာတုန့် ဂေ၊ မဲ ဝီ တဝ်း ဒီ ဂေ၊ ‘မှဝ် မ့ပါယ် ပီ ဘူင် ဘေ နာ တူ မွှိုမ် ဒီ ဒူအီ အီ ဘူင် နာ မွှိုမ် ဒီ ဘေ။း 5 ဆီလယ့် ပီ ဒိုဝ်း ဘေ၊ န့ မုး ဆီလယ့် ပီ ဒျီင် ဒါ ကာညာ အုဝ်။ ဆေ အန် မဲန် ဘေဒါင်၊ အန် ဘော လုဝ် တာ ဆီလယ့် တီ။ ဘေ ဟဲ့ ဘူင် နာ စီစိဝ် ဒီ အန်။’”
6 ပန် တီ ဒဲစေန့် တွိုန် ဟာဝ် ကာတုန့် ဂေ၊ တဝ်း ပီ စ်ု ဒါ ကာညာ အန် ဒီ ဂေ။ 7 ဂေ အီကတ် အာယုဝ် တွိုန်၊ ဂေ ယီ တဝ်း၊ “မှဝ် မ့ပါယ် ပီ နပ် ဒါ ကာညာ ယေ ဒီ တဝ်း ပါယ် တီ။း ယေ တူ ဒွိုမ် ဘူင် မာဆေ အီ မုး နာ စီစိဝ် ဇိုဝ် တီ။ 8 ဒဲင် တီ၊ ယေ မိူဝ် ဟဲ့ ဒိုဝ်း ဝိဝ် ရွိုန် ပီ ဘ့လေး အန် ခဲင် စာန် ယေ ဒေါ ဟာဝ် ယေ ခါ အာတ့်။ မှဝ် မ့ပါယ် ပီ ထာင် မဲ၊ ယေ ဒီ ပြာ ရွိုန် ဂေ ခြိဝ် ခဲင် ကာင် ဒါ ကာညာ မဲ။း 9 အာဆေ မိုဝ်း ဆီလယ့် တီ၊ အန် လုဝ် ယမ်။ ဘော ယေ ဒွန် အီ ဒီ ဘဲန် မှာယ် ဒါ ကာညာ မဲ။”
10 ဒဲစေန့် တွိုန် ဝီ တဝ်း၊ “ပီ တဝ်း ဘေ ဟဲ့ မှာန်။ မာလဲ၊ အာဆေ မိုဝ်း ဆီလယ့် တီ၊ ဝီ တီ ဒီ ဘဲန် မှာယ် ဒါ ကာညာ အုဝ်။ ဘေ အီ ဟဝ် တူ ဝီ လုဝ် ခမ် မာဆေ။”
11 ပန် တီ ဒွန် အီ ဘ့လေး အုန် စာန် အန်၊ တဲး အန် ဝိုဝ်း ယွတ်။ 12 ဒဲစေန့် အာယုဝ် တွိုန် ဝီ စုး ဒီ ဟြေတ့် ဆီလယ့် တွိုန် ဒီ အီကတ် ဝီ တာင်၊ လူင် တဲး ကော ဇမ် ဒီ ဝါ ဝီ တျီ့။ အန် ဝီ ကာဒုး ဆီလယ့် တွိုန်။ န့ ကွယ် ခဲင် စာန် အာဘေန်ယာမ်။ 13 ဂေ ဘော နပ် လွင် အန် တီ၊ ဂေ ဝီ က့လိုဝ်၊ ဝီ ကာယာတ့် ခြိုင် ဂေ။ ဒွန် အီ ဝီ ဘ့လေး ကြုဝ် အန် ဒဲင် ကာတု မာလာ အန်။ ဟဲ့ ဟွတ့် ဂေ ဝီ ဝေန့် ခဲင် မိူင် ဒူင် ကွယ် အာယုဝ် တွိုန်။
14 ဒေါ တး ဇမ် ဂေ ခဲင် ကာင် အာယုဝ် တွိုန်၊ အန် ကွယ် နှဝ့် ဂေ။ ဂေ ဝီ ခြိုပ်ခြဝ် ဒီ အာတ့် အန်။ 15 အာယုဝ် တွိုန် ဝီ တဝ်း၊ “မှဝ် န့ ပါယ် ပီ ဘူင် ဘေ နာ တူ မွှိုမ် ပါယ် တီ။ ဘေ ဘော နပ်၊ ဆေ န့ မုး ဒါ တာင် ပီ အုဝ်၊ အန် လုဝ် မဲန် ဘေဒါင်။”
16 အာယူဒါ ဝီ ဝျီ့ ဂြုဝ်း တီ တဝ်း၊ “ယေ တူ နပ် ဒီ တဝ်း မာဆေ ဒီ မဲ ဇဝ်။ ယေ တူ နပ် မာဆေ ပီ ဒီ မှာန့် ယေ ဒီ မဲ။ ယေ တူ ပဲ ဒီ ကာလာင် တဲး မဲ ညှိုမ် လွင် တူ ဘူင် ယေ မှာပ်။ န့ မုး ဇဝ်ဖြာ၊ အန် ဟဲ့ တဲး ဒွန် အီ နပ် မှာပ် ပီ ဘူင် ယေ။ ယေ ဟဲ့ တး တူတ့် ဒွန် ဝီ။ ဘော ယေ၊ ဘော အီ မိုဝ်း ဆီလယ့် မဲ ခဲင် စာန် အန်၊ ယေ ဒွန် အီ ဟဲ့ ဝီ ဘဲန် မှာယ် မဲ။”
17 အန် ဝီ တဝ်း၊ “အာဝ် မုး ပါယ် တီ။ ဝီ အီ မိုဝ်း ဆီလယ့် ခဲင် စာန် အန်၊ အန် ဒီ ဘဲန် မှာယ် အုဝ်။ ဘေ အီ ဟဝ်၊ ဘေ ပွိုန် ဒီ ဝေန့် ဒူင် ကွယ် ဂုန့် ဘေ။”
18 ပန် တီ အာယူဒါ တွိုန် ဝီ စုး ဒီ ကာလာင် ဂြုဝ်း တဝ်း၊ “အိုယ် မဲ ဒါ ကာညာ အုဝ်၊ တဲး မဲ ခ့ဝါင် အုဝ် ကာလာင် ဂြုဝ်း ဒီ မဲ။ တဲး မဲ ထူမ် ဂြုဝ်း အုဝ်။ ကွဲ့ တဲး မဲ ရူ ဒီ အုဝ်။ အုဝ် ဟဲ့ နပ်၊ ပွုန် မဲ ပီ ပွုန် ခုန်ဒီခမ်။ 19 မဲ ဟဲ့ ဒွိုမ် ဒီမွှတ် မှာယ် မဲ၊ ‘ဘေ ဆီ မိုဝ်း ဂုန့် ဘော ဝါ ဘေ။း’ 20 ယေ ဝီ တဝ်း ဒီ မဲ ဇဝ်၊ ‘ယေ ဟဲ့ မိုဝ်း ဂုန့် ယေ။ အန် ဟဲ့ ကတ် ကာဆဝ်။ အန် ဘော မိုဝ်း ဂွန် တျီ့။ အီကတ် ဂွန် တီ ဟဲ့ ဟွတ့် ယမ်။ ပန် တီ အန် ဝီ မိုဝ်း ဂွန် ပေါ အူ ဝီ၊ ပီ ဂွိုတ် ဒွါ မာ အန် ဒီ ဂုန့် ယေ။ ခုဝ်၊ ဂုန့် ရွက့် ကာဆဝ် ဂွန် ဝီ တီ။’
21 ပန် တီ မဲ ဟဲ့ တဝ်း ‘တဲး ဘေ တိုယ် ဝါ ဘေ တး ဒူင် ကွယ် အုဝ်၊ တဲး အုဝ် ယိုဝ် အန်။’ 22 ယေ ယီ ကာလာင် ဒီ မဲ၊ ‘ယေ တူ ပွိုန် ဒီ တဲး ဝါ ယေ တွိုန် လေး ဒူင် ကွယ် ဂုန့် အန်။ ဂုန့် အန် ဒီ ယမ်၊ ဆေ အန် ဒီ လေး ဒူင် ကွယ် အန်။’ 23 မဲ ယီ တဝ်း ဒီ ယေ၊ ‘ဘေ တူ ပွိုန် ဝီ တး ဒီ နီ၊ ဆေ ဝါ ဘေ တူ တး ဒူပ် ဘေ။’ 24 ဒေါ တး ဇမ် ယေ ဒီ ဒူင် ကွယ် ဂုန့် ယေ၊ ယေ ဘော ကာလာင် ဒီ အန် လွင် ဂြုဝ်း ပဲ့ ဟဲ့ တဝ်း မဲ ဇဝ်။ 25 ဝါယ် အန် တီ ဂုန့် ယေ ဟဲ့ ဝီ စ်ု ယေ တဝ်း၊ ‘တဲး ဘေ ဝီ လူင် မိူင် အဲဂိုပ် တွိုန်၊ စိုဝ်း ပီ ဒီ ဟူမ်။’ 26 ယေ ဝီ တဝ်း ဒီ အန်၊ ‘ဆေ ယေ တူ ဒဲ့ ဝါ ယေ ဒူပ် ယေ၊ ယေ တူ ပွိုန် ဟာဝ်။ ယေ တူ ပွိုန် လာယ် ယိုဝ် ဒီ ဒါ ကာညာ တွိုန်။’
27 ဂုန့် ယေ ဝီ တဝ်း၊ ‘ဘေ ဟဲ့ နပ်၊ အီဘိုန့် အုဝ် တွိုန် မိုဝ်း မီ ဂွန် အီမာယ် အာ ဝီ။ 28 အူ ဝီ ဟဲ့ ဟြာယ်။ န့ ပီ ဂေ ဒုဝ် ပြဲ ဟဲ့ ကဝ့် အန်။ အုဝ် တူ ဝီ ယိုဝ် အန် ကော ဇမ် အာတိုဝ်။ 29 ဒေါ တီ နီ၊ ဆေ ဘေ ဒီ ဘော ဒိုဝ်း ဂွန် တီ၊ ဆေ အန် ဒီ ဘော ဇမ် ဒုက်၊ အုဝ် ဒီ ဘော ယမ် ကူပ် က့လိုဝ် အုဝ်။’
30 ဒေါ တီ နီ၊ ဆေ အုဝ် ဝီ ဇမ် ဒီ အာတ့် ဂုန့် အုဝ်၊ 31 ဆေ အန် နပ် ဝါ ယေ တွိုန် တူ တး၊ ဂုန့် ယေ ဒီ ယမ်။ န့ ယီ မုး မှာပ် ယေ အီ တဲး ဂုန့် ယေ ယမ် ကူပ် က့လိုဝ် နဝ်း အန်။ 32 အုဝ် ယီ ဟဲ့ ဒွါ ကာဒိက် ဆတ်ဇာ ဒီ ဂုန့် အုဝ်။ အုဝ် ဟဲ့ တဝ်း၊ ‘ဆေ အုဝ် တူ တဲး ဝါ ယေ တီ ဝီ တး ဇမ် ဒူင် ကွယ် ဂုန့် ယေ၊ န့ ဒီ မုး မှာပ် အုဝ်။ ဂုန့် အုဝ် လုဝ် ဒမ် မှာပ် ဒီ အုဝ် ဘော စုဝ် အုဝ်။’