1 ခဲင် မိူင် ကာနန့် တွိုန် အာခြာဝ် အေတ့် ဘူမ် ဘော လှေန့် ကာဆဝ်။ 2 ပန် တီ ဂေ ဟဲ့ ဟွတ့် တူတ့် ပီ ဒီ ဟူမ် ပီ ဒိုဝ်း တး ဂေ ခဲင် မိူင် အဲဂိုပ် တွိုန်၊ ဂုန့် ဂေ ဝီ တဝ်း ဒီ ဂွန် အီမာယ် အန်၊ “တဲး ဘေ ဝီ ဟာဝ် မိူင် အဲဂိုပ်၊ တဲး ဘေ စိုဝ်း ပီ ဒီ ဟူမ် အာဒါ အေ။”

3 အာယူဒါ တွိုန် ဝီ တဝ်း ဒီ အန်၊ “ဒါ ကာညာ တွိုန် ဟဲ့ တဝ်း ဒီ ယေ ဘဲန် ဇေန့် ဘဲန် ဇေန့်၊ ယေ တူ ပွိုန် ဝီ တး ဇမ် ဒီ အာတ့် အန်၊ ဆေ ဝါ ယေ တူ တး ရိုမ် ဒူပ် ယေ။ 4 ဆေ မဲ ဒီ တဲး ဝါ ယေ ဟာဝ် ရိုမ် ဒူပ် ယေ၊ ယေ ဒီ ဝီ လူင် ပေါ အူ ဇေန့်၊ စိုဝ်း ပီ ဒီ ဟူမ်။ 5 ဆေ မဲ ယီ တူ ခ့ဝါင် အန် ဒူပ် ယေ၊ ယေ တူ ပွိုန် ဟာဝ်။ ဒူအီ တွိုန် ဟဲ့ တဝ်း၊ ‘ဘေ တူ ပွိုန် ဝီ တး၊ ဆေ ဝါ ဘေ တူ ဒူပ် ဘေ။’”

6 အာကူပ် တွိုန် ဝီ တဝ်း၊ “မှဝ် န့ ပါယ် ပီ ဘူင် ဘေ တဲး န့ ညှာပ် ခဲ့ တီ ဒီ အုဝ်၊ မှဝ် န့ ပါယ် ပီ လုဝ် ကာလာင် ဘေ လွင် ဝါ ဘေ။း”

7 ဂေ ဝီ ဝျီ့ ဂြုဝ်း တီ တဝ်း၊ “ဒူအီ တွိုန် ဟဲ့ ဒီမွှတ် ယေ လွင် န့ဟူမ် အေ။ အန် တဝ်း၊ ‘ဂုန့် ဘေ၊ အန် ဆီ ကွယ် ဒူင် ကွယ် ဘေ။း ဘေ ဆီ မိုဝ်း ဝါ ပေါ အူ ဝီ။း’ ပန် တီ ယေ ဝီ ဝျီ့ ပီ ဒီမွှတ် အန်။ ယေ မိူဝ် တူ နပ်၊ အန် ဒီ စ်ု ယေ ဒဲ့ ဝါ ယေ တး ဇမ် ဒူင် ကွယ် အန်။”

8 အာယူဒါ တွိုန် ဝီ မှာန့် ဒီ ဂုန့် အန် တဝ်း၊ “တဲး မဲ တဲး အုဝ် ယွတ် မဲန် ဂွန် မဲ။ ဆေ မဲ ဆီ တဲး အေ ဒွန် အီ အိမ်၊ ဘော ယေ ဘော မဲ ဘော ဂွန် ယေ၊ ဆေ မဲ တူ ဆီ တဲး အေ ယမ် တူတ့် ဒွန် အီ၊ တဲး မဲ ခ့ဝါင် ယေ ဟာဝ် အူ ဇေန့်။ 9 အုဝ် ဒီ ကာဆဲန့် ဒီ မဲ။ ပန် ဒီ ဝီ တး ဇမ် ယေ ဒီ နီ၊ ဆေ အုဝ် တူ ဝီ တး တိုယ် အာဘေန်ယာမ် ဒီ မဲ၊ မဲ လုဝ် ဒမ် မှာပ် ဒီ အုဝ်၊ ကွဲ့ တဲး မဲ ပိဝ် မှာပ် အုဝ် ဆေဆေ။ 10 ဒေါ တီ နီ ယေ ဟဲ့ ဟွတ့် နှဝ့် လှေန့်။ ဆေ ယေ တူ နှဝ့် လှေန့်၊ ယေ ဟဲ့ ဒန် ဝီ တး အာ ဇေန့်။”

11 ဂုန့် ဂေ ဝီ တဝ်း၊ “ဆေ န့ လုဝ်၊ တဲး ဘေ ဘူင် ပါယ် နီ။ တဲး ဘေ ဘော ဒိုဝ်း ကြုဝ် အီ လေး ခဲင် မိူင် အေ နီ၊ ဒွါ တဲး န့ ဘဲန် ခေါဆွင် ဒီ ဒါ ကာညာ တွိုန်။ တဲး ဘေ ဒိုဝ်း ဆီနမ် ဖဝ်း၊ ငါမ် မာဖျီန်၊ ဆီနမ် ဟူမ်၊ ဆီနမ် အုး ငှုန်၊ ဘော ဘ့လေ ဂ့လော့ ဘော ဘ့လေ ဆာဒဲတ်။ 12 ဟဲ့ ဟွတ့် တဲး ဘေ ဒိုဝ်း ရွိုန် အာ ဘုန် ဘော ရွိုန် ပီ ဒိုဝ်း ဘေ ခါ အာတ့် ပီ ကာဒုး ဘေ ခဲင် စာန် ဘေ၊ တဲး ဘေ ဒိုဝ်း တူတ့်၊ ယုဝ် ဂေ ကာလိုပ် ဒီ ဒွါ မှာန် ခါ အာတ့် နူ။ 13 ဟဲ့ ဟွတ့် တဲး ဘေ ဒိုဝ်း ဘော ဝါ ဘေ၊ တဲး ဘေ ဝီ ဟာဝ် ဇမ် ဒူင် ကွယ် ဒါ အီ တွိုန် ခဲင် မိူင် အဲဂိုပ်။ 14 တဲး ဇဝ်ဖြာ ယီ ကာဝေ ဘေ ဒေါ ကွယ် ဘေ ဒီ အာတ့် ဒါ ကာညာ တွိုန်၊ တဲး အန် ဝီ ခ့ဝါင် ဘော အူကတ် အူဝါ ဘေ ဘော အာဘေန်ယာမ် ဝီ တး ခဲင် ကာင် အေ။ ဆေ အုဝ် ဘော လုဝ် ခမ် ဒုက် ကူပ် ဟဲ့ ဟြာယ် ဂွန် ပေါ ဝီ၊ တဲး န့ ဘဲန် ပါယ် တီ။”

15 ပန် တီ ဂေ အူကတ် အူဝါ တွိုန်၊ ဂေ ဝီ ဒိုဝ်း ခေါဆွင် ဘော ရွိုန် အာ ဘုန်။ ဂေ ဘော ဒဲ့ အာဘေန်ယာမ် ဒူပ် ဂေ။ ဟဲ့ ဟွတ့် ဂေ ဟာဝ် ဇမ် ခဲင် မိူင် အဲဂိုပ်၊ ဟာဝ် ဇမ် ဒီ အာတ့် အာယုဝ် တွိုန်။ 16 အာယုဝ် တွိုန် ယီ ယိုဝ်၊ ဘော ဂေ ဘော အာဘေန်ယာမ် ဟဲ့ ဝီ တး၊ အန် ဝီ ကာလာင် ဒီ မှာယ် အန်၊ “တဲး မဲ ဒဲ့ ဒူအီ ဂေ တီ ဟာဝ် လိုပ် ခဲင် ကာင် အုဝ်။ တဲး မဲ ငဝ်း မာဘူ၊ ဒင် ဟာပ်။ တဲး ယေ ဟူမ် ရိုမ် ဘူမ် ဆီငဲ။”

17 မှာယ် တွိုန် ဘူင် ပီ စ်ု အာယုဝ် အန် ဘူင်။ အန် မိူဝ် တိုယ် ဂေ ဟာဝ် ခဲင် ကာင် အာယုဝ်။ 18 ဒေါ ဟာဝ် ဂေ ခဲင် ကာင် အာယုဝ်၊ နဝ်း ဂေ ကော ဝီ ယုဝ်။ ဂေ တဝ်း၊ “ယုဝ် န့ ဒီ မုး ကူပ် ရွိုန် တွိုန်၊ ပီ ဘ့လေး ဂေ ခဲင် စာန် အေ။ ခုဝ် အန် တီ၊ ဒါ ကာညာ တီ တဲး အေ တး ခဲင် ကာင် အန်။ အန် ဒီ မှေတ့် အေ၊ တဲး အေ ဘဲန် မှာယ် အန်၊ ဘော အေ ဘော ဒုဝ် ဆတ်ဒါဝါ အေ။”

19 ဂေ ဘော ဟာဝ် ဟုဝ့် ခဲင် ကာင် အာယုဝ် တွိုန်။ ဂေ ဘော ဇမ် ဒီ အာတ့် မာလုဝ်း၊ ဂေ ဝီ စုး ဒီ ကာလာင် ဂြုဝ်း ဒီ မှာယ် တွိုန်။ 20 ဂေ တဝ်း၊ “တဲး မဲ ထူမ် ဂြုဝ်း ယေ။ ယေ ဟဲ့ ဟွတ့် တး ဇမ် ဒီ နီ အူ ဇေန့်။ 21 ဒေါ ဝေန့် ယေ၊ ယေ ဘော ချ ခဲင် မှိုဝ်၊ ဝိုဝ်း စာန် ယေ။ န့ ဘော မိုဝ်း ရွိုန် ဒွန် အီ နာ ဒဲင် ငှုဝ် ခဲင် စာန်။ ယေ ဟဲ့ ဝီ ဒိုဝ်း တး တူတ့်။ 22 ယေ ဘော မိုဝ်း ရွိုန် ပေါ န့ ပွါ၊ တဲး ယေ စိုဝ်း ပီ ဒီ ဟူမ်။ ယေ တူ နပ် အာဆေ ဟဲ့ ဟပ် ရွိုန် ခဲင် စာန် ယေ ခါ အာတ့်။”

23 ဂေ ဟဲ့ ဟွတ့် တဝ်း ပါယ် တီ မှာယ် တွိုန် ဝီ တဝ်း၊ “ဟဲ့ မုး၊ ဟဲ့ မှာန် တူတ့်။ ကွဲ့ ယုဝ်။ န့ ဘော မုး ဇဝ်ဖြာ ပီ ကြိုပ် ဂုန့် ဘေ။ အန် ဟဲ့ ဘ့လေး ရွိုန် ခဲင် စာန် ဘေ။ အုဝ် ဟဲ့ ပွိုန် ရွိုန် ဘေ တွိုန်။” အန် ဟဲ့ ဟွတ့် ကာလာင် ပါယ် တီ အန် ဝီ တဲး အာဆီမေအူန် တွိုန် ဝီ လေး ခဲင် ကာပိုမ်၊ ကွယ် ရိုမ် ဒူပ် ဂေ။

24 ပန် တီ မှာယ် တွိုန် တဲး ဂေ လိုပ် ခဲင် ကာင် အာယုဝ်။ အန် ဘော ဒွါ အိုမ်၊ တဲး ဂေ ဝီ ဘာယ် ပ့လဝ် ဂေ။ အန် ဘော ဒွါ ပီ ဒီ ဟူမ် ဒီ မာလာ ဂေ။ 25 ဂေ ဝီ ဘ့လေး အုန် ခေါဆွင် ဂေ၊ နှဝ့် အာယုဝ် တး။ ဂေ ဟဲ့ ယိုဝ်၊ အန် ဆီ တဲး ဂေ ဟူမ် ဘူမ် ခဲင် ကာင် အန်။

26 ဒေါ တး အာယုဝ် တွိုန် ဇမ် ခဲင် ကာင် အန်၊ ဂေ ဝီ ဒွါ ခေါဆွင် ပီ ရဲန် အုန် ဂေ။ ဂေ ဘော ဝီ ခြိုပ်ခြဝ် ဒီ အာတ့် အန်။ 27 အာယုဝ် ဒီမွှတ် ဂေ တဝ်း၊ “ဘေ ဂျာမ်ဆာ ဒွန် အီ။း” ဟဲ့ ဟွတ့်၊ အန် ဝီ ဒီမွှတ် တဝ်း၊ “မှဝ် ဂုန့် ဘေ ပီ ဒွိုမ် ခဲ ဘေ ဒီ အုဝ်၊ ဘော အန် ဟဲ့ ကွယ် ဒါခိုယ်။း ဟဲ့ ခ ဂျာမ်ဆာ။း”

28 ဂေ ဝီ တဝ်း၊ “ဂုန့် ယေ၊ အီ မုး မှာယ် မဲ၊ အန် ဟဲ့ ဒါခိုယ်၊ ဟဲ့ ခ ဂျာမ်ဆာ။” ဂေ ဝီ ဂူမ် ဒီ အာတ့် အန်။

29 ပန် တီ အန် ဝီ ယွတ် ဝါ အန်၊ အီ စိူဝ် အာဘေန်ယာမ် တွိုန်၊ အီ မုး ဂွန် မာ အန်။ အန် ဝီ တဝ်း၊ “ဝီ တီ မုး ဝါ ဘေ၊ ပီ ကာလာင် ဘေ ဒီ အုဝ်။း” အန် ဘော တဝ်း၊ “တဲး ဇဝ်ဖြာ ဂေဇူ မဲ၊ ဝါ အုဝ်။” 30 အန် ဟဲ့ ဟွတ့် ကာလာင် ပါယ် တီ နဝ်း အန် ဘော ဘဲန် ဆီ ယာမ်။ အန် ဝီ လေး ခဲင် ဟုဝ် အူ ဇေန့်၊ ဝီ လိုပ် ပေါ အူ ဟူင် ဘော ပြာ ဒီ ယာမ်။

31 ပန် တီ အန် ဝီ ဒီလှဝ်း နာ အန်၊ ဝီ လိုပ် ခဲင် ဟုဝ်။ အန် ဟဲ့ ဝီ ပီပ့လူမ် နဝ်း အန်၊ စ်ု ဂေ ဒဲစေန့် အန် ဘ့လေး ပီ ဒီ ဟူမ်။

32 ဂေ ဝီ ဘ့လေး ပီ ဒီ ဟူမ် အာယုဝ် အူ ပ့လုဝ့်၊ တဲး အန် ဟူမ် အန် အူ ဝီ။ ဘော ဂေ အီကတ် အာယုဝ်၊ ဂေ ဘ့လေး ပီ ဒီ ဟူမ် ပေါ ပ့လုဝ့်။ ဂေ မှာယ် အီ ကွယ် ခဲင် ကာင် အန်၊ ဂေ ဝီ ဟူမ် ပေါ အူ ပ့လုဝ့်။ ခုဝ်၊ ဂေ ဒူအီ အာမျုဝ် အဲဂိုပ် အာဝ် ပွိုန် ဟူမ် ရိုမ် ဒူပ် ဂေ ဒူအီ အာမျုဝ် ဟဝ်။ ဂေ ဒူအီ အဲဂိုပ်၊ ဂေ တူ ခမ် ဒီ ဟူမ် ရိုမ် ဒူပ် အီ ဟဝ်။ 33 ဂေ ယီ ကွယ် လာယ် ဒါမ် ဒူပ် အာဆာက် ဂေ။ အီကတ် ဂေ ကွယ် နာ အာတ့်၊ ဘော ဝါ တျီ့ ဂေ၊ အန် ကွယ် ဒီ ပန်။ ဂေ ဘော ယိုဝ် အာတီ၊ ဂေ ဝီ လာယ် ယွတ်၊ ဝီ အာမ်။ 34 ဂေ ဘော ဒိုဝ်း ပီ ဒီ ဟူမ် ဒူင် ကွယ် အာယုဝ်၊ ဘ့လေး ဒီ အာတ့် အီကတ် အန်။ ပီ ဒွါ ဂေ ဒီ အာဘေန်ယာမ် တွိုန်၊ န့ ကိူန် လွှိုမ် ဖန် ဘုန် ခဲ့ ပီ ဘ့လေး ဂေ ဒီ အီကတ် အန်။ ပါယ် တီ ဂေ ဘော ကွယ် ရိုမ်၊ ဟူမ် ဘူမ်၊ ဒျီင် အိုမ် မာငုန်။