1 အာကူပ် တွိုန် ဘော နပ် ဂေ မိုဝ်း ဒီ ကာဆာင် ငှုဝ် ခဲင် မိူင် အဲဂိုပ်၊ အန် ဘော တဝ်း ဒီ ဂွန် အီမာယ် အန်၊ “မှဝ် န့ ပါယ် ပီ ကွယ် ဘေ ဒီ နီ၊ တူ ဘူင် မာဆေ။း” 2 အန် ဝီ တဝ်း၊ “အုဝ် ဟဲ့ ယိုဝ်၊ န့ မိုဝ်း ပီ ဒီ ဟူမ် ခဲင် မိူင် အဲဂိုပ်။ တဲး ဘေ လူင် မိူင် နာ တေတ့်၊ တဲး ဘေ စိုဝ်း ဒီဂါဝ်၊ တဲး အေ ဝီ မိုဝ်း ပီ ဒီ ဟူမ်၊ ကွဲ့ တဲး အေ စှိုမ် အာဆာက် အေ။”

3 ပန် တီ ဂေ အီကတ် အာယုဝ် ဂိုဝ် ဝီ ဘော လူင် မိူင် အဲဂိုပ်၊ တဲး ဂေ စိုဝ်း ငှုဝ်။ 4 န့ ဂိတ် မီ အာဘေန်ယာမ်၊ အီ မုး ဝါ အာယုဝ်။ အာကူပ် တူ တဲး အန် လူင် ရိုမ် ဒူပ် အီကတ် အန်။ အာကူပ် ယုဝ် ဘော ဂွန် တျီ့ အန် ဒီ ဘော ဇမ် ဒုက်။ 5 ပါယ် တီ ဂေ ဂွန် အီမာယ် အာကူပ် ဘော တး ဇမ် မိူင် အဲဂိုပ်။ ဘော ဂေ အီ ဟဝ် ဟဲ့ တး စိုဝ်း ငှုဝ်။ ခုဝ်၊ ဘော ခဲင် မိူင် ကာနန့် တွိုန် ဂေ အေတ့် ပီ ဒီ ဟူမ်။

6 အာယုဝ် တွိုန် ယီ မုး ဒါ ကာညာ အီ အိုပ် မိူင်။ န့ မုး အန်၊ အီ လုဝ် ကာဆာင် ပီ ဒီ ဟူမ် ဒီ ဒူအီ ဒွန် အီ။ ပန် တီ အီကတ် အာယုဝ် တွိုန်၊ ဂေ ဘော တး ဒူင် ကွယ် အာယုဝ်၊ ဂေ ဝီ ခြိုပ်ခြဝ် ဒီ အာတ့် အန်။ 7 အန် ဘော ယိုဝ် အီကတ် အန်၊ အန် ဘော နပ် အူ ဇေန့်၊ န့ မုး ဂေ။ အန် ယီ တူ တဲး ဂေ နပ်၊ အန် မုး အာဆေ။ အန် ဝီ ကာလာင် ဂြုဝ်း မွှိုမ် ယုဝ် ဒီ ဂေ။ အန် တဝ်း၊ “ဘေ တး နာ မှဝ်။း” ဂေ ဝီ တဝ်း၊ “ယေ ဟဲ့ တး မိူင် ကာနန့်၊ တဲး ယေ ပွိုန် ဒီ စိုဝ်း ပီ ဒီ ဟူမ်။”

8 ဒေါ အန် တီ အာယုဝ် တွိုန် ဟဲ့ နပ်၊ န့ မုး အီကတ် အန် အီ ဟဲ့ တး။ ဂေ ယီ တူ နပ် ဒါ ကာညာ တီ မုး အာဆေ။ 9 အာယုဝ် ဝီ လှုဝ်း ပီ ဒွိုမ် မ့ဘာဝ် အန်။ ဟဲ့ ဟွတ့် အန် ဝီ တဝ်း ဒီ ဂေ၊ “ဘေ မုး ဒူအီ အီ ပြာ ဒီ ချွင် ဒီ ယွတ် မိူင် ယေ တဲး ဘေ နပ် နာ မှဝ် ဒီ ပွိုန် ဒီ လိုပ် တိုက် မိူင် ယေ။”

10 ဂေ တဝ်း၊ “အာဝ် မုး ပါယ် တီ မဲ ဒါ ကာညာ ယေ။ ဟဲ့ မှာန် အာခါခ်ု၊ မှာယ် မဲ ဟဲ့ တး ဒီ နီ၊ တဲး ယေ ပွိုန် ဒီ စိုဝ်း ပီ ဒီ ဟူမ်။ 11 ယေ ဒွန် အီ မုး ဂွန် အီမာယ် ဒါ အူ ဝီ။ ယေ မုး ဒူအီ ဘွတ်၊ ဒူအီ မွှိုမ်။ ယေ မှာယ် မဲ တူ ဒွိုမ် ပြာ ဒီ ချွင် ဒီ ယွတ် မိူင် အီ ဟဝ်။”

12 အန် ယီ တဝ်း ဒီ ဂေ၊ “ဟဲ့ မုး၊ ပီ တဝ်း အုဝ်။ ဘေ ဟဲ့ တး၊ တဲး ဘေ ချွင် ဒီ ယွတ် မိူင် နီ။”

13 ဂေ ဝီ တဝ်း၊ “ဟဲ့ မှာန် ပီ တဝ်း ယေ။ ယေ အီ မုး မှာယ် မဲ၊ ယေ မုး အူကတ် အူဝါ ဂိုဝ် ဒီ အာ ဝီ။ ယေ မိုဝ်း ဂုန့် အူ ဝီ။ အန် ကွယ် မိူင် ကာနန့် တွိုန်။ ဝါ ယေ ဝီ တျီ့၊ အန် ဆီ ကွယ် ရိုမ် ဒူပ် ဂုန့် ယေ။ ဝါ ပေါ အူ ဝီ အာဝ် ဟူ မိုဝ်း။”

14 အာယုဝ် ဝီ ဝျီ့ ဂြုဝ်း ဂေ တဝ်း၊ “န့ မှာန် ပီ တဝ်း အုဝ်။ ဘေ ဟဲ့ ပြာ ဒီ တး ယွတ် မိူင် ယေ။ 15 အုဝ် ယီ ဒီ ထေဝ် ဘေ။ အုဝ် ကာလာင် ဂြုဝ်း မှာန် အာခါခ်ု ဒီ ဘေ၊ တဲး ဘော ခုန်ဒီခမ် ထူမ်။ ဆေ ဝါ တျီ့ ဘေ တူ တး ဇမ် ဒီ နီ၊ အုဝ် တူ ဝီ တဲး ဘေ ဝေန့်၊ လေး တ ဒီ နီ။ 16 ခုဝ်၊ တဲး ဘေ တိုယ် အူ ဝီ၊ တဲး အန် ဒဲ့ ဝါ ဘေ တး ဒီ နီ။ ဒေါ ဟာဝ် အန်၊ ဘေ ဒွန် အီ ယီ လုဝ် ကွယ် ခဲင် ကာပိုမ် အုဝ်။ ပါယ် တီ အုဝ် ဒီ ထေဝ် ဂြုဝ်း ဘေ၊ ယုဝ် ဘေ ကာလာင် ဂြုဝ်း မှာန် တူ မှာန်။ ဆေ ဝါ ဘေ တူ တး၊ ဘော အုဝ် ဘော ခုန်ဒီခမ်၊ ယာယ် ဒီ နပ်၊ ဘေ မုး ဒါ အီ ပြာ ဒီ ယွတ် မိူင် ယေ။” 17 အန် ဟဲ့ ဟွတ့် ကာလာင် ပါယ် တီ အန် ဝီ ခြွင့် ဂေ ခဲင် ကာင် ဒါ အီ ဘ်ု ကာပိုမ် အာဒါ အူယ် ဆီငဲ။

18 ဘော ဇမ် အူယ် ဆီငဲ အာယုဝ် တွိုန် ဝီ ကာလာင် ဂြုဝ်း ဒီ ဂေ။ အန် တဝ်း၊ “တဲး ဘေ ဘူင် ပီ တဝ်း အုဝ်။ ဟဲ့ ဟွတ့်၊ အုဝ် ဒီ ဘ့လေး ဘေ ဟာဝ်။ အုဝ် မိူဝ် မုး ဒါ အီ ယုဝ် ဇဝ်ဖြာ။ 19 ဆေ ဂြုဝ်း ပီ ကာလာင် ဘေ ဒီ အုဝ် ဟဲ့ မှာန်၊ တဲး အူ ဝီ ကွယ် ခဲင် ကာပိုမ် တီ။ ဒေါ အန် တီ၊ တဲး ဘေ အီ ဟဝ် ဝီ ဝေန့်၊ တဲး ဘေ ပွိုန် ဒီ တိုယ် ပီ ဒီ ဟူမ် ဒီ န့ဟူမ် ဘေ။ 20 ဘေ ယီ လုဝ် ဝီ တး ဒူင် ကွယ် အုဝ်၊ တိုယ် ဘော ဝါ တျီ့ ဘေ တး ဒီ နီ။ ပါယ် တီ အုဝ် ဒီ နပ်၊ ဂြုဝ်း ဘေ ဟဲ့ မှာန်။ ပန် တီ ဘေ ဒီ လွတ် ယမ်။” အန် ဟဲ့ ဟွတ့် ကာလာင် ပါယ် တီ ဂေ ဘော ဖြူမ်။

21 ဂေ ဝီ လာယ် ကာလာင် ကာတဲ ဂေ။ ဂေ တဝ်း၊ “ဒေါ တီ နီ၊ အေ ဝီ လုဝ် ခမ် မှာပ် အေ ပီ ဘူင် အေ ဒီ ဝါ အေ။ ဒေါ မှာန့် အန် ဒီ အေ၊ တဲး အေ ကာဝေ အန်၊ အေ တူ ထူမ် ပီ တဝ်း အန်၊ အေ တူ ကာဝေ အန်။ ဒေါ တီ နီ ဒုက် ပီ ဒွိုမ် ခမ် အန် ဟဲ့ ဝီ တး ဇမ် ဒီ အေ၊ တဲး အေ ဝီ လုဝ် ခမ် ပါယ် တီ။”

22 အာရူဘေန် တွိုန် ဝီ တဝ်း၊ “အုဝ် ဟဲ့ ဒွိုမ် ကာလာင် ဒီ ဘေ၊ ကွဲ့ တဲး ဘေ ဘူင် နာ တူ မွှိုမ် ဒီ ဝါ အေ။ ဘေ ယီ တူ ဆီ ထူမ်။ ဒေါ တီ နီ အေ လုဝ် ဝီ ခမ် ခဲ့ ပီ ဒွိုမ် ဘူင် အေ ဒီ အန်။” 23 မာလဲ၊ ဂေ တူ နပ်၊ အာယုဝ် တွိုန် ဟဲ့ နပ် ဒီ ထူမ် ဂြုဝ်း ဂေ တီ ဒွန် ဒဲ။ ခုဝ်၊ န့ မိုဝ်း ဒါ အီ ဘျာန် ဂြုဝ်း ဂေ ဒီ အာယုဝ်။

24 အန် ယီ ဟဲ့ ဟွတ့် ထူမ် ဂြုဝ်း ဂေ၊ အန် ဝီ ဟာဝ် ပေါ ပ့လုဝ့် အာဒါ အူ ကာစန်၊ တဲး အန် ပွိုန် ဒီ ယာမ်။ ဟဲ့ ဟွတ့် ယာမ်၊ အန် ကော ဝီ ပွိုန် ကာလာင် ဂြုဝ်း ဒီ ဂေ၊ အန် ဒိုဝ်း အာဆီမေအူန်၊ တဲး အန် လေး တ ဂေ၊ တဲး ဂေ ပက် အန်၊ တဲး ဒွန် အီ ယိုဝ်။

25 ပန် တီ အာယုဝ် ဝီ စ်ု မှာယ် အန်၊ တဲး ဂေ ဟပ် ငှုဝ် ခဲင် စာန် ဂေ၊ တဲး န့ ကော နုဝ့်၊ ဝီ ဒွါ ဒီ အီကတ် အန်။ ဟဲ့ ဟွတ့်၊ အန် စ်ု မှာယ် အန် ဒိုဝ်း ရွိုန် အီကတ် အန်၊ ဝီ ဟပ် ခဲင် စာန် ဂေ ဝီ မှဝ် ဝီ အန်၊ တဲး ဂေ ဘော မိုဝ်း ပီ ဒီ ဟူမ် ဒေါ ဟာဝ် ဂေ ဒူပ် န့တေန့်။ အန် ယီ တူ တဲး အာဆေ နပ် လွင် အန် တီ။ ဂေ မှာယ် အန် ဝီ ဘူင် တူတ့် ပီ စ်ု ဒါ ကာညာ ဂေ။ 26 ဝါယ် အန် တီ ဂေ ဘ့လေး ကြုဝ်ကြာမ် ဂေ ဒဲင် မာလာ ဂေ။ ဟဲ့ ဟွတ့် ဂေ ဝီ လေး တ မိူင် အဲဂိုပ်၊ ဝေန့် ကာင် ဂေ။

27 ဒေါ ဟာဝ် ဂေ ဒူပ် န့တေန့်၊ ခဲင် မှိုဝ် န့ မိုဝ်း အူကတ် အူဝါ ဂေ အူ ဝီ၊ အန် ဝိုဝ်း စာန် အန်၊ တဲး အန် ဒိုဝ်း ငှုဝ် အီ စဲက်၊ ဒွါ မာလာ အန် ဟူမ်။ ဒေါ အန် တီ အန် ဝီ ယိုဝ် ရွိုန် ဟဲ့ ကွယ် နာ ဒဲင် ငှုဝ် ခဲင် စာန် အန်။ 28 အန် ဝီ တဝ်း ဒီ အူကတ် အူဝါ အန်၊ “ဟဲ့ မိုဝ်း အီ ဟဲ့ ဟပ် ရွိုန် ခဲင် စာန် အုဝ်။” ပန် တီ နဝ်း ဂေ ကော ဝီ ကာပိုန့် ကာဆဝ်၊ ဂေ ဝီ လာယ် ဒီမွှတ် တဝ်း၊ “မာဆေ န့ မုး၊ ပီ ဘူင် ဇဝ်ဖြာ ဒီ အေ ဒေါ တီ နီ။း”

29 ပန် တီ ဂေ ဟဲ့ ဟွတ့် ဇမ် ဒူင် ကွယ် ဂုန့် ဂေ၊ ဂေ ဝီ ကာလာင် တူတ့် ဒွန် မျုဝ် ဒီ အန်။ 30 ဂေ တဝ်း၊ “ဒူအီ တွိုန်၊ အီ မုး ဒါ ကာညာ မိူင်၊ အန် ဟဲ့ ကာလာင် ဂြုဝ်း အီ မွှိုမ် ယုဝ် ဒီ ယေ တဝ်း၊ ယေ ဟဲ့ ပြာ ဒီ ချွင် ဒီ ယွတ် မိူင်။ 31 ယေ ဝီ တဝ်း ဒီ အန်၊ ‘ယေ မုး ဒူအီ မွှိုမ်။ ယေ တူ ဒွိုမ် ပြာ ဒီ ချွင် ဒီ ယွတ် မိူင် အီ ဟဝ်။ 32 ယေ ဘော တဝ်း၊ ယေ မိုဝ်း အူကတ် အူဝါ ဂိုဝ် ဒီ အာ ဝီ၊ ဂုန့် ယေ အူ ဝီ။ ဝါ ယေ အူ ဝီ ယီ ဟဲ့ ယမ်။ ဝီ တျီ့ ဟဲ့ ကွယ် ရိုမ် ဒူပ် ဂုန့် ယေ ခဲင် မိူင် ကာနန့်။’

33 ယေ ဟဲ့ ဟွတ့် တဝ်း ပါယ် တီ ဒါ ကာညာ အီ အိုပ် မိူင် တွိုန်၊ အန် ဝီ တဝ်း၊ ‘တဲး အူ ဝီ ကွယ် ဒီ နီ၊ တဲး ဘေ အီ ဟဝ် ဝေန့် ခဲင် မိူင် ဘေ၊ တိုယ် ပီ ဒီ ဟူမ် ဒီ န့ဟူမ် ဘေ။ 34 ဘေ ယီ လုဝ် ဝီ တး ဒီ နီ၊ တး တိုယ် ဝါ တျီ့ ဘေ တး ဇမ် ဒီ အာတ့် အုဝ်။ ပန် တီ အုဝ် ဒီ နပ်၊ ဘေ ဟဲ့ ကာလာင် ဂြုဝ်း မှာန်၊ ဘေ တူ မုး ဒါ အီ ပြာ ဒီ ချွင် ဒီ ယွတ် မိူင် ယေ။ ဟဲ့ ဟွတ့် အုဝ် ဒီ ဝီ ဘ့လေး အီကတ် ဘေ၊ အီ ကွယ် ဒီ နီ၊ တဲး အန် ဝီ ဒူပ် ဘေ။ အုဝ် ဒီ ဘော တဲး ဘေ ဝိန် ဒီ လဲ ခဲင် မိူင် ယေ။’”

35 ဂေ ဟဲ့ ဟွတ့် ကာလာင် ဂြုဝ်း တီ ဒီ ဂုန့် ဂေ၊ ဂေ ဝီ ဟုး လေး ငှုဝ် ဂေ ခဲင် စာန် ဂေ။ ဒေါ အန် တီ ဂေ ဒွန် အီ ဝီ ယိုဝ်၊ ရွိုန် ကွယ် ခဲင် စာန် ဂေ။ ဒေါ ဝီ ယိုဝ် ဂေ ဟူ အီ မိုဝ်း ရွိုန် ဂေ၊ ဘော ဂေ ဘော ဂုန့် ဂေ ဝီ ယုဝ်။ 36 ဂုန့် ဂေ ဝီ တဝ်း ဒီ ဂေ၊ “ဘေ ဟဲ့ ပီဘျုဝ်း ဂွန် အုဝ်။ အာယုဝ် ဟဲ့ ဟြာယ်။ ဘော အာဆီမေအူန် အာဝ် ဟူ ကွယ်။ ဒေါ တီ နီ ဘေ ဒီ ဒိုဝ်း ဘော အာဘေန်ယာမ် ဒီ အုဝ်။ အုဝ် ဘော လုဝ် ခမ် အီ တူ မွှိုမ် ပါယ် တီ ဆေဆေ။”

37 အာရူဘေန် တွိုန် ဝီ ကာလာင် ဒီ ဂုန့် အန်။ အန် တဝ်း၊ “အုဝ် ဒီ တဲး မဲ ငဝ်း ဝဲန် ဂွန် အီမာယ် အုဝ် အာ ဝီ၊ ဆေ အုဝ် တူ တိုယ် အာဘေန်ယာမ်၊ တဲး အန် ဝီ တး ဇမ် ဒူင် ကွယ် မဲ နီ။ တဲး အုဝ် ဘ်ု အန်။ အုဝ် ဒီ ဝီ တိုယ် အန် တး ဇမ် ဒူင် ကွယ် မဲ။”

38 ဂုန့် အန် ဝီ တဝ်း၊ “ဂွန် အုဝ် ဝီ တီ၊ အုဝ် တူ တဲး အန် လူင် ဒူပ် မဲ။ အီကတ် အန် ဟဲ့ ဟွတ့် ယမ်။ န့ ဂိတ် မီ အန်။ ဆေ အန် ဒီ ဘော ဇမ် ဒုက် ဒေါ ဟာဝ် ဘေ ဒူပ် န့တေန့်၊ ဘေ ဒီ ဘူင် တဲး ဘော အုဝ် ယမ်။”