1 န့ ဝီ နုဝ့် ပေါ အာ ဆီနမ်။ ဒေါ အန် တီ ခုန်ဒီခမ် ခဲင် မိူင် အဲဂိုပ် ဟဲ့ မ့ဘာဝ်။ ဒေါ မ့ဘာဝ် အန်၊ အန် ကွယ် ဒီ ခူပ် ဘ့လဲင် အိုမ် နီလာ။ 2 န့ ဘော မိုဝ်း မာမက် ဘူ ဒုဝ် အီ လေး တး ခဲင် အိုမ်။ ဂေ ဟဲ့ ဂ့လန့် ကာဆဝ်၊ ဟုန် ဂေ ဘော စှိတ်။ ဂေ ဝီ စုး ဒီ ဟူမ် ပေတ့်။ 3 ဝါယ် အန် တီ န့ ဝီ မိုဝ်း မာမက် ပေါ ဘူ ဒုဝ်၊ လေး တး ခဲင် အိုမ်။ ဂေ ယီ ချာ ကာဆဝ်၊ အာဝ် စှိတ်။ ဂေ ဝီ တး ကွယ် ရိုမ် ဘာင် အိုမ် တွိုန် ဒူပ် ဂေ မာမက် အီ ဂ့လန့်။ 4 ဂေ မာမက် အီ ချာ၊ ဂေ ဝီ စုး ဒီ ဟူမ် မာမက် အီ ဂ့လန့်။ ဟဲ့ ဟွတ့် ပန် တီ ခုန်ဒီခမ် န့ဆိုဝ်း။

5 ပေါ အူ ဇေန့် ခုန်ဒီခမ် ဝီ အိတ်၊ ဝီ မ့ဘာဝ်။ န့ မိုဝ်း ကာဘာင် ငှုဝ် အူ ကာဘာင်။ ကာယူင့် ဘူ ကာယူင့် ဟဲ့ လေး ခဲင် ကာဘာင် အူ ကာဘာင် တီ။ ဂဝ် အန် ဘော နုဝ့် ဘော ဆိန် ခဲင် ကာယူင့် တီ။ 6 ဝါယ် အန် တီ န့ ဝီ မိုဝ်း ကာယူင့် ငှုဝ် ပေါ ဘူ ကာယူင့်။ ဂေ ယီ ဒျီပ်၊ ဒီလှး ကူပ် ခုန် အီ တး ခဲင် ပြဲ ကာဟဝ်း။ 7 ကာယူင့် ငှုဝ် အီ ဒျီပ် ဝီ ဟူမ် ကာယူင့် ငှုဝ် အီ ဂဝ် နုဝ့်။ ပန် တီ ခုန်ဒီခမ် ဝီ န့ဆိုဝ်း။ အန် ဘော နပ်၊ အန် ဟဲ့ မ့ဘာဝ် ပါယ် တီ။

8 အန် ဟဲ့ ဟွတ့် မ့ဘာဝ်၊ ဆိန့်ဝး နဝ်း အန် ကာဟွာ့။ ခုဝ်၊ အန် ဒဲ့ ဒါ အီ မိုဝ်း အာငျာန် ဘော ဂေ အီ နပ် ဒီ ဘူင် အီ မွှိုမ် အာမ် ဘဲန် မျုဝ် ဘဲန် မျုဝ်၊ တဲး ဂေ တး ဒူင် ကွယ် အန်။ အန် ဝီ ကာလာင် ဒီ ဂေ လွင် ပီ မ့ဘာဝ် အန်။ န့ ယီ တူ မိုဝ်း အာဆေ အီ ပွိုန် ကာလာင် လွင် ဒါင် ပီ မ့ဘာဝ် ခုန်ဒီခမ်။

9 ပန် တီ ဒါ အီ ဒွါ ပီ ဒီ ဒျီင် ဒီ ခုန်ဒီခမ်၊ အန် တဝ်း၊ “မဲ ဇဝ်၊ အာတိုဝ် အုဝ် ဟဲ့ ဝီ လှုဝ်း မှာပ် အုဝ်။ 10 ခါ အာတ့် နီ၊ မဲ ဟဲ့ ဒွိုမ် ရူ ဒီ ဒါ အီ ဘူင် ခါမုန် တွိုန်၊ မဲ ဘော ရူ ဒီ အုဝ်။ ခုဝ်၊ မဲ ဟဲ့ ခြွင့် ယာယ် ခဲင် ကာပိုမ် ခဲင် ကာင် ဒါ ဘုဝ် အီ အိုပ် ဒါ ဆိုက် အီ ဘ်ု ဟုဝ် မဲ။ 11 အူ မှိုဝ်၊ ယာယ် အာ ဝီ ဟဲ့ မ့ဘာဝ်။ ပီ မ့ဘာဝ် ယာယ်၊ န့ မိုဝ်း လွင် ဒါင် အန်၊ အူ ဝီ အူ မျုဝ်။ 12 ဒေါ အန် တီ န့ ယီ မိုဝ်း ဒူအီ အာမျုဝ် ဟဲဘြဲ။ အန် ကွယ် ရိုမ် ဒူပ် ယာယ်။ အန် မုး ဒဲစေန့် ဒါ ဘုဝ် အီ အိုပ် ဒါ ဆိုက် အီ ဘ်ု ဟုဝ် မဲ။ ဒူအီ တွိုန်၊ အန် ဟဲ့ ကာလာင် ဒီ ယာယ် လွင် ဒါင် ပီ မ့ဘာဝ် ယာယ် တွိုန်။ 13 န့ ဘော ဘဲန် တူတ့် ဒွန် မျုဝ် ပီ ကာလာင် အန် ဒီ ယာယ်။ မဲ ခုန်ဒီခမ် ဟဲ့ ဝီ ဒဲ့ အုဝ်၊ တဲး အုဝ် ဝီ ပွိုန် ဒီ ဘူင် ဂါန် အုဝ်။ မဲ ခုန်ဒီခမ် ယီ ဟဲ့ ငဝ်း ဝဲန် ဒါ အီ ဘူင် ခါမုန် မဲ။” 14 အန် ဟဲ့ ဟွတ့် ကာလာင် ပါယ် တီ ခုန်ဒီခမ် ဝီ တိုယ် အီ ဒဲ့ အာယုဝ် တွိုန်။ ဂေ ဝီ တိုယ် တး အန် အူ ဇေန့်၊ တဲး အန် လေး တ ကာပိုမ်၊ ဟာဝ် ဒူင် ကွယ် ခုန်ဒီခမ်။ ဂေ တဲး အန် ကပ် ဂိန့်၊ စှိုပ် ခြိုင် ကာမာယ်။ ဟဲ့ ဟွတ့်၊ အန် ဘော ဟာဝ် ကွယ် ဒီ အာတ့် ခုန်ဒီခမ်။

15 ခုန်ဒီခမ် တဝ်း ဒီ အန်၊ “အုဝ် ဟဲ့ မ့ဘာဝ်။ န့ ယီ တူ မိုဝ်း အာဆေ အီ ပွိုန် ကာလာင် ဒီ အုဝ် လွင် ဒါင် အန်။ ဂေ ယီ တဝ်း ဒီ အုဝ်၊ န့ မုး မဲ၊ မဲ နပ် ဒီ ကာလာင် လွင် ဒါင် ပီ မ့ဘာဝ် အီ။”

16 အာယုဝ် တွိုန် ဝီ တဝ်း၊ “န့ တူ မုး အာငျာန် အုဝ်၊ မဲ ခုန်ဒီခမ်။ န့ မုး ဇဝ်ဖြာ။ အန် ဒီ ကာလာင် ဒီ အုဝ် လွင် ဒါင် ပီ မ့ဘာဝ် မဲ ပီ ဆီ နပ် မဲ။” 17 ခုန်ဒီခမ် ဝီ ခဲ ဒီ အာယုဝ် တဝ်း၊ “ဒေါ မ့ဘာဝ် အုဝ်၊ အုဝ် ဟဲ့ ကွယ် ဒီ ခူပ် ဘ့လဲင် အိုမ် နီလာ တွိုန်။

18 ဒေါ အန် တီ န့ မိုဝ်း မာမက် ဘူ ဒုဝ်၊ လေး တး ခဲင် အိုမ်။ ဂေ ဘော တာင်၊ ဘော ဂ့လန့်။ ဂေ ဟူမ် ပေတ့် ဒီ ခူပ် အိုမ်။ 19 ဟဲ့ ဟွတ့်၊ အူ ဇေန့်၊ န့ ဝီ မိုဝ်း မာမက် ဘူ ဒုဝ် လေး တး ခဲင် အိုမ်။ ဂေ ယီ ချာ ကာဆဝ်၊ အာဝ် စှိတ် မာဆေ။ အုဝ် တူ ဒွိုမ် ယိုဝ် အီ တူ စှိတ် ခဲ့ တီ ခဲင် မိူင် အဲဂိုပ် နီ။ 20 ဂေ မာမက် ဘူ ဒုဝ် အီ တူ စှိတ်၊ အီ ချာ ကာဆဝ် တွိုန်၊ ဂေ ဝီ ဟူမ် မာမက် အီ ဂ့လန့်၊ အီ စှိတ်။ 21 ဂေ ဟဲ့ ဟွတ့် ဟူမ်၊ န့ ယီ တူ ကာဘ့လိူင် မာဆေ။ ဂေ ချာ ပီ ဘြိမ်။ ဟဲ့ ဟွတ့် ပန် တီ အုဝ် န့ဆိုဝ်း။

22 အုဝ် ဘော မ့ဘာဝ် ပေါ အူ စိုပ်။ အုဝ် ယိုဝ်၊ န့ မိုဝ်း ကာဘာင် ငှုဝ် အီ မိုဝ်း ကာယူင့် ဘူ ကာယူင့်။ ကာယူင့် ဂေ တီ မိုဝ်း ဂဝ် နုဝ့်၊ ဟဲ့ မွှိုမ်။ 23 ပန် တီ န့ ဝီ မိုဝ်း ကာယူင့် ငှုဝ် ပေါ ဘူ ကာယူင့်။ ဂေ ယီ ဒျီပ်၊ ဂေ ဘော ဒီလှး ဒီ ခုန် အီ ဘုတ် ခဲင် ပြဲ ကာဟဝ်း။ 24 ကာယူင့် ဒျီပ် တီ၊ ဂေ ဝီ ဟူမ် ကာယူင့် အီ မွှိုမ် ဘူ ကာယူင့်။ ခဲ့ တီ အုဝ် ဟဲ့ ခဲ ဒီ ဂေ ဒါ အီ နပ် ဒီ ဘူင် နာ မွှိုမ် အာမ်။ န့ ယီ တူ မိုဝ်း အာဆေ နပ် ဒီ ကာလာင် ဒီ အုဝ် လွင် ဒါင် အန် တီ။”

25 အာယုဝ် တွိုန် ဝီ တဝ်း ဒီ ခုန်ဒီခမ်၊ “ပီ မ့ဘာဝ် မဲ အာ ဇေန့်၊ လွင် ဒါင် အန် အူ မျုဝ်။ ဇဝ်ဖြာ ဟဲ့ တဲး မဲ ခုန်ဒီခမ် နပ် ပီ ဒီ ဘူင် အန်။ 26 ဂေ မာမက် ဂ့လန့် ဘူ ဒုဝ် ပီ ဘူ ဆီနမ်။ ဂေ ကာယူင့် ငှုဝ် အီ ဂဝ် နုဝ့် ဘော ပီ ဘူ ဆီနမ်။ မာမက် ဂေ ကာယူင့် ငှုဝ် မုး လွင် ဒါင် အန် အူ မျုဝ်။ 27 မာမက် ဘူ ဒုဝ်၊ ဂေ အီ ချာ၊ ဂေ အီ တး ဒီ ပန်၊ ဘော ဂေ ကာယူင့် ငှုဝ် ဘူ ကာယူင့်၊ ဂေ အီ ဒျီပ်၊ ဂေ အီ ဒီလှး ဒီ ခုန် တး ခဲင် ပြဲ ကာဟဝ်း တွိုန်၊ ဂေ ဘော ပီ ပေါ ဘူ ဆီနမ်။ န့ ဒီ မုး အာခြာဝ် အေတ့် ဘူမ်။

28 န့ မုး ပီ ကာလာင် အုဝ် ဒီ မဲ။ ဇဝ်ဖြာ ဟဲ့ ဘျ ဒီ မဲ ပီ ဒီ ဘူင် အန်။ 29 ခဲင် မိူင် အဲဂိုပ် ဘော မိူင်၊ န့ ဒီ မိုဝ်း ဘူ ဆီနမ်၊ ပီ ဆမ် ပီ ပိတ် ဘေ ဒီ အွင်၊ ဒီ မိုဝ်း ကိူန်။ 30 ဟဲ့ ဟွတ့် ပန် တီ န့ ဒီ မိုဝ်း ဘူ ဆီနမ် ဒီ အေတ့် ဘူမ်။ ဂေ ဒူအီ ဒီ ဘော ပိဝ် အာခြာဝ် အာတ့် နူ ဒေါ ဟဲ့ မိုဝ်း ကိူန်။ အာခြာဝ် အေတ့် ဘူမ် တီ၊ န့ တဲး မိူင် ဘော မိူင် စှိုမ်။ 31 အာခြာဝ် ဒီ အေတ့် ဘူမ်၊ န့ ဒီ ညှာပ် ကာဆဝ် ဒီ အီ၊ တဲး ဂေ ပိဝ် တူတ့် အာခြာဝ် ဒေါ ဒါခိုယ် ဂေ။ 32 မဲ ယီ ဟဲ့ မ့ဘာဝ် အာ ဇေန့်၊ လွင် ဒါင် အန်၊ န့ ဟဲ့ မှာန်၊ ဟဲ့ မုး။ အာဝ် လှေန့် ဇဝ်ဖြာ ဒီ ဘူင် ပါယ် တီ။

33 ဒေါ တီ နီ၊ တဲး မဲ ရဝ်း ဒါ အူ ဝီ၊ အီ မိုဝ်း အာငျာန်၊ အီ နပ် ဘဲန် မျုဝ် ဘဲန် မျုဝ်၊ တဲး မဲ တဲး အန် အိုပ် မိူင်။ 34 တဲး မဲ စ်ု အာမူ အာမာတ် မဲ၊ တဲး ဂေ ဝီ ဂဲပ် ငှုဝ် ဘော အုန် ငှုဝ် ဒီ ဒူအီ ခဲင် မိူင် ဘော မိူင်။ ဆေ ဂေ ပွိုန် ဖန် ဘုန်၊ ဒိုဝ်း အူ ဘုန် ဒေါ အာခြာဝ် မိုဝ်း ကိူန် ဂေ။ 35 ဆီနမ် ဒီ တး ဒေါ မုး အာခြာဝ် မိုဝ်း ကိူန်၊ တဲး မဲ စ်ု ဂေ ဂဲပ် အုန် ခဲ့ မိုဝ်း ပီ ဒီ ဟူမ်။ တဲး ဂေ ဝီ ဘ့လေး အုန် ငှုဝ် တီ ခဲင် မိူင် ဒွန် မိူင် ဘော ဘ်ု ငှုဝ် တီ။ 36 ပီ ဒီ ဟူမ် တီ၊ တဲး ဘေ ဝီ မိုဝ်း ဒီ ဟူမ် ဒေါ ဇမ် အာခြာဝ် အေတ့် ဘူမ် အီ ဒီ တး ခဲင် မိူင် အဲဂိုပ် ဘော မိူင်။ ဆေ မဲ ခုန်ဒီခမ် ဘူင် ပါယ် တီ ဂေ ဒူအီ ဘော မိူင်၊ ဂေ တူ စှိုမ်။”

37 အာယုဝ် ဟဲ့ ဟွတ့် ကာလာင် ပါယ် တီ ဘော ခုန်ဒီခမ် ဘော အာမူ အာမာတ် အန်၊ ဂေ ဘော ဖြူမ် ဘော အိုင် ပီ ကာလာင် အန်။ 38 ခုန်ဒီခမ် ဝီ တဝ်း ဒီ အာမူ အာမာတ် အန်၊ “ယေ တူ ယိုဝ် ဒူအီ အီ ပီ အာယုဝ် တီ။ အန် မိုဝ်း နဝ်း ဖွိုမ် ဇဝ်ဖြာ အီ ကွယ် ခဲင် ဒုဝ် အန်။”

39 ပန် တီ ခုန်ဒီခမ် ဝီ ကာလာင် ဒီ အာယုဝ် တဝ်း၊ “ဇဝ်ဖြာ ဟဲ့ တဲး မဲ နပ် လွင် အန် တီ ဒွန် မျုဝ်။ ခုဝ်၊ အာဝ် မိုဝ်း အာဆေ၊ အီ မိုဝ်း အာငျာန် ပီ မဲ။ 40 အုဝ် ဒီ တဲး မဲ အိုပ် မိူင် အုဝ်။ ဟဲ့ ဟွတ့်၊ ဂေ ဒူအီ ဒွန် အီ ဒီ ထူမ် ပီ စ်ု မဲ။ န့ ဂိတ် မီ အုဝ်။ ပွုန် အုဝ် ဒီ တာင် လွှိုမ် ပွုန် မဲ။ 41 ခုဝ်၊ ဒေါ တီ နီ၊ အုဝ် တဲး မဲ ဘဲန် ဒါ ကာညာ အီ အိုပ် မိူင် အဲဂိုပ်။”

42 ခုန်ဒီခမ် ဟဲ့ ဟွတ့် ကာလာင် ပါယ် တီ အန် ဘော ဒိုဝ်း ဆီကာနူ အီ မိုဝ်း ဇိုမ် အန်၊ စှိုပ် ဒီ ဒဲ အာယုဝ်။ ဟဲ့ ဟွတ့် အန် ဝီ ဒွါ အန် စှိုပ် ခြိုင် ဘွတ်၊ ဟွယ် မာကာဝဲ့ ခြိဝ် ဒီ မဲင် အန်။ 43 ခုန်ဒီခမ် ဘော တဲး အန် ပဝ့် မ့ပြွင့် အီ မုး လက်လဝ် အာမူ အာမာတ် အန် အီ အိုပ် မိူင်။ ဂေ ဝီ ဟာဝ် ယဲတ့် ဒီ အာတ့် အန် ဒတ်၊ “တဲး ဘေ ခြိုပ်ခြဝ် ဒီ အာတ့် ဒါ ကာညာ။” ပါယ် တီ ဂေ တဲး အာယုဝ် ဘဲန် ဒါ ကာညာ အီ အိုပ် မိူင် အဲဂိုပ်။

44 ပန် တီ ခုန်ဒီခမ် ဝီ ကာလာင် ဒီ အာယုဝ်၊ “အာဝ် မိုဝ်း ဒူအီ ခဲင် မိူင် အဲဂိုပ် ဘော မိူင် အီ ပွိုန် ဘူင် မာဆေ၊ ဆေ မဲ တူ ခ့ဝါင် အန် ဘူင်။” 45 ခုန်ဒီခမ် ဘော တဲး အာယုဝ် စိူဝ် အာဇာဖေနာတ်ဖာနေ။ အန် ဘော ဒွါ အီဘိုန့် ဒီ အာယုဝ်။ အီဘိုန့် တီ စိူဝ် နာင် အေဆာနာတ် အီ မုး ဂွန် အာဖုဝ်ထီဖီရာ။ ဂုန့် နာင် တီ၊ အန် မုး ဒါ အီ လှူ ဒီ ဇဝ်ဖြာ ခဲင် မိူင် အူန်။ ဂေ ဒွန် အီ ခဲင် မိူင် အဲဂိုပ် ဘော နပ် အာယုဝ် တွိုန်။

46 ဒေါ ဘဲန် အာယုဝ် အာမူ အာမာတ် ခုန်ဒီခမ် ခဲင် မိူင် အဲဂိုပ်၊ အာဆာက် အန် ဟဲ့ နုဝ့် အူယ် ဂိုဝ် ဆီနမ်။ အာယုဝ် ဟဲ့ ဟွတ့် လေး တ ဒူင် ကွယ် ခုန်ဒီခမ်၊ အန် ဝီ ဟာဝ် ဇမ် ဒွန် ပ့လုဝ့် ခဲင် မိူင် အဲဂိုပ်။ 47 အာဒါ ဘူ ဆီနမ် ဒေါ လတ့် ကိူန် ပီ ဒီ ဟူမ်၊ 48 အန် ဝီ စ်ု အီ ဒိုဝ်း ကာဇု တူတ့် ပီ ဒီ ဟူမ်၊ ခဲ့ ကိူန် အီ လတ့် ခဲင် မိူင် ဘော မိူင်။ ခဲင် မိူင် ဒွန် မိူင် အန် တဲး အီ ကာဇု ဘ့လေး အုန် တူတ့် ပီ ဒီ ဟူမ် အီ လေး ခဲင် ဒူင် နာ အီ ကွယ် ကာတတ် မိူင် တီ။ 49 ပါယ် တီ အန် ဟဲ့ ဘ့လေး အုန် ငှုဝ် ကိူန် ကာဆဝ်။ န့ ပီ ကာဟာတ့် ဒီ အိုမ် နမ်မုက်ဆာရာ၊ အာဝ် ဟူ ပွိုန် တိး ခဲ့ မှဝ် န့ မုး၊ ခဲ့ မှဝ် န့ ကိူန်။

50 အာတ့် ဇမ် ဆီနမ် အေတ့် ဘူမ်၊ အာယုဝ် တွိုန် ယီ မိုဝ်း ဂွန် အီမာယ် အာ ဝီ။ န့ ဘော မုး ဂွန် နာင် အေဆာနာတ်၊ အီ မုး ဂွန် ဒါ အီ လှူ ဒီ ဇဝ်ဖြာ ခဲင် မိူင် အူန်၊ အီ စိူဝ် အာဖုဝ်ထီဖီရာ တွိုန်။ 51 ဂွန် ဒင် အန်၊ အာယုဝ် တဲး အန် စိူဝ် အာမာနာဆေ။ လွင် ဒါင် အန် တီ၊ န့ မုး ‘ဇဝ်ဖြာ ဟဲ့ တဲး အုဝ် ပိဝ် ဒုက် အုဝ် ဘော ဒူင် ကွယ် ဘြိမ် အုဝ်။’ 52 ဂွန် ပေါ ဝီ အန် တဲး အန် စိူဝ် အာအေဖာရိမ်။ လွင် ဒါင် အန် တီ၊ န့ မုး၊ ‘ဇဝ်ဖြာ ဟဲ့ ဘူင် တဲး အုဝ် မိုဝ်း ဂွန် ခဲင် မိူင် ဒူင် ဇမ် အုဝ် ဒုက်။’

53 ပန် တီ ဟဲ့ နုဝ့် ဘူ ဆီနမ် ဒေါ မိုဝ်း ကိူန်။ 54 န့ ဝီ ဇမ် အာခြာဝ် အေတ့် ဘူမ်။ န့ ဘဲန် တူတ့် ဒွန် မျုဝ် ပီ ဒွိုမ် ကာလာင် အာယုဝ်။ ဂေ ဒူအီ ခဲင် မိူင် ဒွန် မိူင်၊ ဂေ ဝီ အေတ့် ဘူမ်။ န့ ယီ မိုဝ်း ခဲင် မိူင် အဲဂိုပ် တွိုန်၊ ဂေ ဒူအီ မိုဝ်း ပီ ဒီ ဟူမ်။ 55 ပန် တီ ဘော ခဲင် မိူင် အဲဂိုပ် ဂေ ဒူအီ ဒွန် အီ ဘော ကြဲ ဒီ အေတ့် ဘူမ်၊ ဂေ ဝီ ဟာဝ် ဒီ ခုန်ဒီခမ်၊ မှာန့် တဲး အန် ဒွါ ပီ ဒီ ဟူမ် ဒီ ဂေ။ ခုန်ဒီခမ် ယီ တဝ်း၊ “တဲး ဘေ ဟာဝ် ဒူင် ကွယ် အာယုဝ် တွိုန်၊ တဲး ဘေ ဘူင် ပီ စ်ု အန် ဒီ ဘေ။”

56 န့ ဘော ဇမ် အာခြာဝ် အေတ့် ဘူမ် ခဲင် မိူင် ဘော မိူင်၊ အာယုဝ် တွိုန် ဝီ ဝိုဝ်း ဂြွာ အီ မုး ဒူင် ဂဲပ် အုန် အန် ပီ ဒီ ဟူမ်။ ဟဲ့ ဟွတ့် အန် စုး ဒီ ကာဆာင် ငှုဝ် ဒီ ဒူအီ ခဲင် မိူင် အဲဂိုပ်။ အန် လုဝ် ကာဆာင် အီ စဲက် အီ စဲက်။ ခုဝ်၊ အာဝ် ဟူ မိုဝ်း ပီ ဒီ ဟူမ် မာဆေ ခဲင် မိူင် ဘော မိူင်။ 57 ပန် တီ ဘော ဂေ ဒူအီ အီ ဟဝ်၊ ဂေ တး မိူင် ဒွန် မိူင် ဒဲင် ကာဒါယ်၊ ဂေ မှာန့် ပီ ဒီ ဟူမ် ဒီ အာယုဝ် တွိုန်။ ခုဝ်၊ ဂေ ဒူအီ ဒဲင် ကာဒါယ် ဘော ကာဒါယ် ဟဲ့ အေတ့် ဘူမ်။