1 ပါယ် တီ အာကူပ် တွိုန် ဘော ဟာဝ် မိူင် အဲဂိုပ်။ အန် ဘော ဒိုဝ်း တူတ့် ခဲ့ ပီ မိုဝ်း အန်။ ဒေါ တး ဇမ် အန် ဒီ ဒူင် စိူဝ် ဘီရာဆေဘာ တွိုန်၊ အန် ဝီ လှူ ဒီ ဇဝ်ဖြာ ပီ ဒွိုမ် ကြိုပ် အာဆဲက်၊ အီ မုး ဂုန့် အန်။

2 ခဲင် မှိုဝ် ဇဝ်ဖြာ ဝီ တဲး အာကူပ် ယိုဝ် ဂြုဝ်း အန်။ အန် တဝ်း၊ “အိုယ် အာကူပ်၊ အာကူပ်။” အာကူပ် ဝီ တဝ်း၊ “အုဝ် ကွယ် ဒီ နီ၊ မဲ ဇဝ်။” 3 အန် ဇဝ် ဝီ တဝ်း၊ “အုဝ် မုး ဇဝ်ဖြာ။ အုဝ် မုး ဇဝ်ဖြာ ပီ ကြိုပ် ဂုန့် မဲ။ ဆေ မဲ ဟာဝ် မိူင် အဲဂိုပ်၊ ကွဲ့ တဲး မဲ ယုဝ်။ ခဲင် မိူင် အဲဂိုပ် အုဝ် ဒီ တဲး မဲ ဘဲန် အာမျုဝ် ဒူအီ ကိူန်။ 4 အုဝ် ဒီ ဟာဝ် ရိုမ် ဒူပ် မဲ။ အုဝ် ဒီ ဘော တိုယ် မဲ ဝေန့် ဒီ တီ။ အာယုဝ် ဒီ ဘ့လိန် ငါယ် မဲ၊ ဆေ မဲ ယမ်။”

5 ပန် တီ အာကူပ် ဝီ လေး ဒူင် စိူဝ် ဘီရာဆေဘာ။ ဂေ ဂွန် အာကူပ် ယီ တဲး ဂုန့် ဂေ ဘော အီဘိုန့် ဘော ဂွန် ဂေ ပဝ့် လက်လဝ် ပီ တိုယ် ခုန်ဒီခမ်။ 6 ဂေ ဟဲ့ ဒိုဝ်း ဘော ဒုဝ် ဆတ်ဒါဝါ ဂေ ဘော တူတ့် တူတ့် ဒွန် မျုဝ် ပီ ပွိုန် ဂေ ခဲင် မိူင် ကာနန့်။ ပန် တီ ဘော အာကူပ် ဘော လှုက်လှာန် အန်၊ ဂေ ဟာ ဇမ် ခဲင် မိူင် အဲဂိုပ်။ 7 ဂွန် အီမာယ် အန် ဘော လှာန် အန်၊ ဂေ ဒွန် အီ ဟဲ့ တး ဒူပ် အန်။

8 အာနီ န့ မုး ဇာရာင် ဂေ ဒူအီ အာမျုဝ် အီဆာရေလ၊ အီ မုး လှုက်လှာန် အာကူပ် တွိုန် အီ ဟဲ့ ဟာဝ် မိူင် အဲဂိုပ်။ ဂွန် ဂိန့် အာကူပ် အန် စိူဝ် အာရူဘေန်။

9 ဂွန် အီမာယ် အာရူဘေန် တွိုန် ဘော မုး အာဟာန်၊ အာဖာလူ၊ အာဟေဇာရူန် ဘော အာခါမီ။

10 ဂွန် အီမာယ် အာဆီမေအူန် တွိုန် ဘော မုး အာယေမူအေန်၊ အာယာမိန်၊ အာဇုဝ်ဟာန်၊ အာယာခိန်၊ အာဇုဝ်အာန် ဘော အာဆာအုန်။ မာ အာဆာအူန် တွိုန် မုး အာမျုဝ် ကာနန့်။

11 ဂွန် အီမာယ် အာလေဝီ တွိုန် ဘော မုး အာဂေန်ရာဆူန်၊ အာခုဝ်ဟာတ် ဘော အာမေန်ရာရီ။

12 ဂွန် အီမာယ် အာယူဒါ ဘော မုး အာအေရာ၊ အာအောနန်၊ အာဆေလာ၊ အာဖေရေတ် ဘော အာဇေန်ရာ။ အာအေရာ ဂါယ် အာအုဝ်နာန် တွိုန် ယီ ဟဲ့ ယမ် ခဲင် မိူင် ကာနန့်။ အာဖေရေတ် တွိုန် ဝီ မိုဝ်း ဂွန် အီ စိူဝ် အာဟေဇာရူန် ဂါယ် အာဟာမူလ။

13 ဂွန် အီမာယ် အာအီဆာခါ တွိုန် ဘော မုး အာထုဝ်လာ၊ အာဖူဝါ၊ အာယာဆူပ် ဘော အာဆီမာရုန်။

14 ဂွန် အီမာယ် အာဇေဘူလူန် တွိုန် ဘော မုး အာဆေရေတ်၊ အာအေလူန် ဘော အာယာလေန်။

15 ဒူအီ ဂေ တီ မုး ဂွန် အီမာယ် နာင် လေအာ တွိုန် ဟဲ့ ဒွါ ဒီ အာကူပ် ဒေါ ကွယ် ဂါယ် ခဲင် မိူင် ဖာဒါန်အာရာမ် ။ အန် ဘော မိုဝ်း ဂွန် အီဘိုန့်၊ အန် စိူဝ် နာင် ဒီနာ။ ဒူအီ ဂေ တီ ဒွန် ဝီ ဘော အီမာယ် ဘော အီဘိုန့်၊ ဂေ ကွယ် အူယ် ဂိုဝ် ဒီ အူယ် ဝီ။

16 ဂွန် အီမာယ် အာဂတ် တွိုန် ဘော မုး အာဇီဖီအူန်၊ အာဟာဂီ၊ အာဆူနီ၊ အာအေဇာဘူန်၊ အာအေရီ၊ အာရုဝ်ဒီ ဘော အာရေလီ။

17 ဂွန် အီမာယ် အာဆေန် တွိုန် ဘော မုး အာအီမာနာဟာ၊ အာအီဆာဝါ၊ အာအီဆာဝီ ဘော အာဘေရီယာ။ အန် မိုဝ်း ဘော ဂွန် အီဘိုန့် အီ စိူဝ် နာင် ဆေရာ။

ဂွန် အီမာယ် အာဘေရျီက် ဘော မုး အာဟေဘာ ဂါယ် အာမာလာခီလာ။

18 ဒူအီ ဂေ တီ မုး ဂွန် နာင် ဆီဖာ တွိုန်။ အန် မုး မှာယ် ပီ ဒွါ အာလပ် တွိုန် ဒီ ဂွန် အီဘိုန့် အန် အီ စိူဝ် နာင် လေအာ။ ဂေ ကွယ် ဂိုဝ် ဒီ ဒဝ် ဝီ။

19 ဂွန် အီမာယ် နာင် ရာအေန် တွိုန် အီ မုး အီဘိုန့် အာကူပ်၊ ဂါယ် စိူဝ် အာယုဝ် ဂါယ် အာဘေန်ယာမ် တွိုန်။

20 အာယုဝ် ဝီ ဘဲန် ဂုန့် ဂွန် အီမာယ် အာ ဝီ၊ အီ စိူဝ် အာမာနာဆေ ဂါယ် အာအေဖာရိမ်။ ဂါယ် မုး ဂွန် နာင် အေဆာနာတ်၊ အီ မုး ဂွန် အီဘိုန့် ဒါ အီ လှူ ဒီ ဇဝ်ဖြာ အီ စိူဝ် အာဖုဝ်ထီဖီရာ အီ ကွယ် မိူင် အူန်။ ဂါယ် ဘော ဂွိုတ် ခဲင် မိူင် အဲဂိုပ်။

21 ဂွန် အီမာယ် အာဘေန်ယာမ် တွိုန် ဘော မုး အာဘေန်လာ၊ အာဘေခါရာ၊ အာစာဘေန် အာဂီရာ၊ အာနေမာန်၊ အာအေဟီ၊ အာရူတ်၊ အာမူဖိမ်၊ အာဟူဖိမ် ဘော အာရာအတ်။

22 ဒူအီ ဂေ တီ မုး လှုက်လှာန် နာင် ရာအေန် တွိုန်။ ဂေ ကွယ် ဂိုဝ် ဒီ ဖွုန် ဝီ။

23 ဂွန် အီမာယ် အာဒါန် တွိုန် မုး အာဟူဆိမ်။

24 ဂွန် အီမာယ် အာနာပ်ထာလီ တွိုန် ဘော မုး အာယာဇေအေန်၊ အာဂူနီ၊ အာယေဇေန် ဘော အာဆီလေမ်။

25 ဒူအီ ဂေ တီ မုး လှုက်လှာန် နာင် ဘီလာ တွိုန်၊ အီ မုး မှာယ် ပီ ဒွါ အာလပ် တွိုန် ဒီ ဂွန် အီဘိုန့် အန်၊ အီ စိူဝ် နာင် ရာအေန် တွိုန်။ ဂေ ဒွန် အီ ကွယ် ဘူ ဝီ။

26 ဂေ ဒူအီ အာမျုဝ် အာကူပ် တွိုန်၊ ဂေ ဝီ ဟာဝ် လူင် မိူင် အဲဂိုပ်၊ ဆေ တူ တိး အဝ် အန်၊ န့ ကွယ် ဒဝ် ဂိုဝ် ဒီ ဒဝ် ဝီ။ န့ မုး မီ ဂေ လှုက်လှာန် အာကူပ်။ 27 ဆေ ဘော တိး ဂွန် အာယုဝ် အာ ဝီ၊ အီ ဂွိုတ် ခဲင် မိူင် အဲဂိုပ် တွိုန်၊ ဂေ ဒူအီ အာမျုဝ် အာကူပ် တွိုန် ဘဲန် ဘူ ဂိုဝ် ဝီ ဒေါ တး ဂေ ခဲင် မိူင် အဲဂိုပ်။

28 အာကူပ် တွိုန် ယီ ဟဲ့ တိုယ် အာယူဒါ၊ တဲး အန် ယဲတ့် ဒီ အာတ့်၊ တဲး အန် ဇမ် မိူင် ဂုဝ်ဆေန် ခဲင် မိူင် တာင် အဲဂိုပ်။ ဒေါ တး ဇမ် ဂေ မိူင် တီ၊ 29 အာယုဝ် တွိုန် ဝီ စ်ု အီ တိုယ် အန် ခဲင် လက်လဝ် အန်၊ တဲး အန် ဟာဝ် မိူင် ဂုဝ်ဆေန်၊ ရွုး ဂုန့် အန်။ အန် ဟဲ့ ယိုဝ် ဂုန့် အန်၊ အန် ဝီ ငျီမ် ဂုန့် အန်၊ ယာမ် ကော လှေန့် ကာဆဝ်။

30 အာကူပ် တွိုန် ဝီ တဝ်း၊ “ဒေါ တီ နီ အုဝ် ဟဲ့ ပွိုန် ယမ်။ အုဝ် ဟဲ့ ဝီ ယိုဝ် ဒီ ငါယ် အုဝ်၊ မဲ ဆီ ကွယ်။”

31 ပန် တီ အာယုဝ် တွိုန် ဝီ ကာလာင် ဂြုဝ်း ဒီ အူကတ် အူဝါ အန်၊ ဘော ဂေ န့ဟူမ် ဂုန့် အန်၊ တဲး ဂေ ထူမ် ဒွန် အီ။ အန် တဝ်း၊ “အုဝ် ဒီ ဟာဝ် ဒူင် ကွယ် ခုန်ဒီခမ်။ အုဝ် ဒီ တဝ်း ဒီ အန်၊ ‘ဂေ အူကတ် အူဝါ အုဝ် ဘော ဂုန့် အုဝ်၊ ဂေ ဟဲ့ လေး မိူင် ကာနန့် တွိုန်၊ တး ဇမ် ဒူင် ကွယ် အုဝ်။ 32 ဒူအီ ဂေ တီ၊ ဂေ မုး ဒါ အီ ဟျီင် မာဘူ ဆိန့် ဒေါ ဂုဝ် အန်။ ဂေ ဟဲ့ ဒိုဝ်း တူတ့် ခဲ့ ပီ မိုဝ်း ဂေ၊ ဘော ဒုဝ် ဆတ်ဒါဝါ ဂေ။’ 33 ခုဝ် အန် တီ၊ ဆေ ခုန်ဒီခမ် ဝီ ဒဲ့ ဘေ တး ဒီ အန်၊ ဆေ အန် ဒီမွှတ် လွင် ပီ ဒီ ဘူင် ဘေ၊ 34 ဘေ လုဝ် ကာလာင်၊ ‘အူ ဆိန့် ဒေါ ဂုဝ် အန် ဇမ် အာတိုဝ်၊ မှာယ် မဲ ဟဲ့ ဟျီင် ဒုဝ် ဆတ်ဒါဝါ။ ဘော ဂုန့် ယေ ဟဲ့ ဘူင် ပါယ် တီ။’ ဆေ ဘေ တဝ်း ပါယ် တီ အန် ဒီ တဲး ဘေ ကွယ် ခဲင် မိူင် ဂုဝ်ဆေန် တီ။ အန် ဒီ တဲး ဘေ ကွယ် ကာယဝ်း ဒီ ဂေ ဒူအီ အဲဂိုပ်။ ခုဝ်၊ ဂေ တူ အိုင် ဒါ အီ ဟျီင် မာဘူ။”