1 ဒေါ အန် တီ အာယူဒါ တွိုန် ကာယဝ်း ဒီ အူကတ် အူဝါ အန်။ အန် ဘော ဟာဝ် ကွယ် ရိုမ် ဒူပ် ဒူအီ အာမျုဝ် အာဒူလမ် အူ ဝီ အီ စိူဝ် အာဟီရာန်။ 2 ဒေါ ကွယ် အန် ဒီ တီ၊ အန် ကာတုန့် ဂွန် အီဘိုန့် ဒူအီ အာမျုဝ် ကာနန့် အူ ဝီ။ အီဘိုန့် တီ၊ အန် စိူဝ် နာင် စူအာ။ အန် ဟဲ့ ဟွတ့် ခတ်၊ အီဘိုန့် တီ ဘော ဒဲ ဘာဒိက် ဆန်ထေ။ 3 အန် ဘော မိုဝ်း ဂွန် အီမာယ် အူ ဝီ၊ အီ စိူဝ် အာအေရာ။ 4 ဝါယ် အန် တီ အန် ဝီ ဒဲ ဘာဒိက် ဆန်ထေ ပေါ အူ ဇေန့်။ အန် ဝီ မိုဝ်း ဂွန် အီမာယ်၊ အီ စိူဝ် အာအောနန်။ 5 ဟဲ့ ဟွတ့် အန် ပီ ဝီ မိုဝ်း ဂွန် အီမာယ် ပေါ အူ ဝီ။ အန် ဝီ တဲး အန် စိူဝ် အာဆေလာ။ ဒေါ အန် တီ ဂေ ယီ ကွယ် မိူင် စှေဇိပ်။

6 အာယူဒါ တွိုန် ဝီ ဟြေတ့် အီဘိုန့် အာဒါ ဂွန် ဂိန့် အန်၊ အီ စိူဝ် အာအေရာ။ အီဘိုန့် တီ၊ အန် စိူဝ် နာင် ထာမာ။ 7 အာအေရာ အီ မုး ဂွန် ဂိန့် အာယူဒါ တွိုန်၊ အန် ဘူင် ပီ တူ အိုင် ဇဝ်ဖြာ။ ဟဲ့ ဟွတ့် ဇဝ်ဖြာ တဲး အာဆာက် အန် စှိုမ်။

8 ဝါယ် အန် တီ အာယူဒါ ဝီ တဝ်း ဒီ အာအောနန်၊ “တဲး မဲ လာယ် ယာ ဆီပြး အီကတ် မဲ၊ တဲး အန် ဘဲန် အီဘိုန့် မဲ၊ တဲး မဲ ပွိုန် ဂွန် အာဒါ အီကတ် မဲ။”^a 9 အာအောနန် ယီ နပ်၊ ဆေ အန် ဒီ လာယ် နာင် ထာမာ တွိုန်၊ ဆေ အန် မိုဝ်း ဂွန်၊ ဂွန် အန် တီ တူ ဝီ ဘဲန် ဂွန် အန်။ အန် ယီ တူ ဆီ တဲး ယာ ဆီပြး အီကတ် အန် မိုဝ်း ဂွန်။ ခုဝ်၊ ဒေါ လာယ် အန် အီဘိုန့် တီ၊ ဒွန် ဇေန့် အန် ဝီ ဝဲန် အိုမ် တာနာ အန် ဒဲင် ကာဒါယ်။ 10 ပီ ဘူင် အန် ဇိုဝ် တီ၊ ဇဝ်ဖြာ မိူဝ် တူ အိုင်။ အန် ဇဝ် တဲး ဘော အာဆာက် အန် စှိုမ်။

11 ဟဲ့ ဟွတ့် ပန် တီ အာယူဒါ ဝီ တဝ်း ဒီ အဝ် အန်၊ “တဲး မဲ ဘဲန် ပီ ယာ ဆီပြး၊ ကွယ် ခဲင် ကာင် ဂုန့် မဲ၊ တဲး မဲ နှဝ့် ပန် ဒီ ဝီ ကြဲ ဒီ တာင် ဂွန် အုဝ် အီ စိူဝ် အာဆေလာ၊ တဲး အန် ကော ပွိုန် ဒီ ဝီ လာယ် မဲ။” အန် တဝ်း ပါယ် တီ ခုဝ်၊ အန် ထာင် ဘော ဂွန် အန် တီ၊ ဒီ ဝီ ယမ် ပီ အီကတ် အန်။ ပန် တီ နာင် ထာမာ တွိုန် ဝီ ဟာဝ် ကွယ် ခဲင် ကာင် ဂုန့် အန်။

12 ဝါယ် အန် တီ ဟဲ့ ရာမ် လှေန့်၊ အီဘိုန့် အာယူဒါ တွိုန်၊ အီ မုး ဂွန် အာစူအာ တွိုန်၊ အန် ဘော ယမ်။ ဝါယ် အာခြာဝ် လုဝ် က့လိုဝ် ဟဲ့ နုဝ့်၊ အာယူဒါ ဝီ ဟာဝ် ဒူင် ကွယ် အာထီမာနာ၊ ဘူင် ဘ့လွယ် ကပ် ဟိုက် မာဘူ။ ဂိုက် အန် အီ စိူဝ် အာဟီရာန်၊ အီ မုး ဒူအီ အာမျုဝ် အာဒူလမ်၊ အန် ဟာဝ် ရိုမ် ဒူပ် အန်။

13 ဒေါ အန် တီ န့ မိုဝ်း ဒူအီ ကာလာင် ဒီ နာင် ထာမာ တွိုန်၊ “ဘိုဝ် မဲ ဟဲ့ ဟာဝ် ဒူင် ကွယ် အာထီမာနာ တွိုန်၊ ဒူင် ဘူင် ဂေ ဘ့လွယ် ကပ် ဟိုက် မာဘူ။” 14 အန် ဘော ယိုဝ် လွင် အန် တီ၊ အန် ဝီ ဘုတ့် ဝဲန် ခြိုင် ယာ ဆီပြး ပီ စှိုပ် အန်။ အန် ဝီ ဒိုဝ်း ကာမဲ့ ကာမှုဝ့် နာ အန်၊ ကွဲ့ တဲး အီ နပ် အန် မုး အာဆေ။ ဟဲ့ ဟွတ့်၊ အန် ဘော ဟာဝ် ကွယ် ဒီ ခူပ် န့တေန့် ဟာဝ် လိုပ် ရဝ် အေနာအိမ်။ ဒူင် တီ ကွယ် ဒူပ် န့တေန့် အီ ဟာဝ် ဒူင် စိူဝ် ထီမာနာ။ အန် ဘူင် ပါယ် တီ ခုဝ်၊ အန် ဟဲ့ ယိုဝ်၊ အာဆေလာ တွိုန် ပီ ဘော ဟဲ့ တာင်၊ ဂုန့် အန် ယီ တူ ဒွါ အန် လာယ် ခတ် ဒီ အန်။

15 အာယူဒါ တွိုန် ဝီ တး ဇမ် ဒူင် ကွယ် နာင် ထာမာ၊ အန် ဘော ယိုဝ် နာင် တီ၊ အန် ထာင် အီဘိုန့် တီ မုး ယာ မာလမ်။ ခုဝ်၊ နာင် ထာမာ ဟဲ့ ကာမှုဝ့် နာ အန်၊ ကွဲ့ တဲး အီ ယိုဝ်။ 16 အာယူဒါ ဝီ ယွတ် အန်၊ အန် တဝ်း၊ “တဲး အုဝ် အိတ် ရိုမ် ဒူပ် မဲ ခဲင် မှိုဝ် နီ။” မာလဲ အန် တူ နပ် အီဘိုန့် တီ မုး အဝ် အန်။ အီဘိုန့် တွိုန် ဝီ တဝ်း၊ “မာဆေ ပီ ဒီ ဒွါ မဲ ဒီ အုဝ်၊ ဆေ မဲ လာယ် အုဝ်။း”

17 အန် တဝ်း၊ “အုဝ် ဒီ တိုယ် ဂွန် မာဘူ အူ ဒုဝ် ဒွါ ဒီ မဲ။”

အီဘိုန့် တီ ယီ တဝ်း၊ “မဲ လုဝ် ကမ် အုန် ကြုဝ် မဲ ဒီ အုဝ် အာတ့် တိုယ် မဲ ဂွန် မာဘူ တီ။”

18 အန် ဝီ ဒီမွှတ်၊ “ကြုဝ် မာဆေ ပီ ဒီ လုဝ် မဲ၊ တဲး အုဝ် ကမ် အုန် ဒီ မဲ။း”

အီဘိုန့် တွိုန် ဝီ တဝ်း၊ “မဲ လုဝ် ဒွါ ဆီကာနူ အီ မိုဝ်း ဇိုမ် မဲ ဘော ဝန် အန် ဒီ အုဝ်။ ဘော န့ကြွုန် မဲ၊ မဲ လုဝ် ဒွါ ဒီ အုဝ်။” ဟဲ့ ဟွတ့် တဝ်း ပါယ် တီ အာယူဒါ မိူဝ် ဒွါ ခဲ့ ပီ မှာန့် အီဘိုန့် တွိုန်။ အာယူဒါ ဘော လိုပ် အိတ် ဒူပ် အန်။ ဟဲ့ ဟွတ့် အန် ဘော ဒဲ ဘာဒိက် ဆန်ထေ ဒီ အာယူဒါ။ 19 ဝါယ် အန် တီ နာင် ထာမာ တွိုန် ဝီ လေး ဒူင် ကွယ် အန် တီ၊ ဝီ ဘုတ့် လေး ကာမဲ့ အန်၊ ဝီ စှိုပ် ခြိုင် ယာ ဆီပြး အန်။

20 ပန် တီ အာယူဒါ တွိုန် ဘော ဒိုဝ်း ဂွန် မာဘူ အူ ဒုဝ်၊ ဒွါ ဒီ ဂိုက် အန်၊ အီ မုး အာမျုဝ် အာဒူလမ် တွိုန်။ အန် တဝ်း ဒီ တဲး ဂိုက် အန် ဝီ ဟြေတ့် အီဘိုန့် တွိုန်၊ တဲး အန် ဝီ ဒွါ မာဘူ ဒီ အီဘိုန့် တွိုန်၊ တဲး အီဘိုန့် ဝီ ဒွါ ဝိဝ် ကြုဝ် ပီ ဒွိုမ် ကမ် အုန် အာယူဒါ ဒီ အန်။ ဂိုက် အန် ယီ တူ ကာတုန့် အီဘိုန့် တွိုန်။ 21 ဟဲ့ ဟွတ့် အန် ဝီ ဒီမွှတ် ဂေ အီမာယ် အီ ကွယ် ဒူင် တွိုန်။ အန် တဝ်း၊ “မှဝ် အီဘိုန့်၊ အီ မုး ယာ မာလမ် တွိုန်၊ အီ ကွယ် ဒီ ခူပ် န့တေန့် ဟာဝ် မိူင် အေနာအိမ်။း”

ဂေ ဝီ တဝ်း၊ “အာဝ် ဒွိုမ် မိုဝ်း ယာ မာလမ် ကွယ် ဒီ တီ။”

22 ပန် တီ အန် ဝီ ဝေန့် ဒူင် ကွယ် အာယူဒါ တဝ်း၊ “အုဝ် တူ ယိုဝ် ယာ မာလမ် တွိုန်။ ဒဲင် တီ၊ ဂေ ဒူအီ အီ ကွယ် ဒူင် တွိုန်၊ ဂေ ဟဲ့ ခဲ ဒီ အုဝ်၊ န့ တူ ဒွိုမ် မိုဝ်း ယာ မာလမ်။”

23 ပန် တီ အာယူဒါ ဝီ တဝ်း၊ “တဲး ယာ မာလမ် တီ ဒိုဝ်း ဒီ အန် ကြုဝ် အုဝ် တွိုန်၊ ကွဲ့ တဲး အီ ဟဝ် ကာညး အာယ်။ အုဝ် ဟဲ့ ထေဝ် ဒီ တိုယ် ဂွန် မာဘူ ဒီ အန်၊ မဲ ယီ တူ ယိုဝ် အန်။”

24 ဝါယ် အန် တီ ဘော နုဝ့် အူယ် မာဂျီန်၊ ဂေ ဒူအီ တဝ်း ဒီ အာယူဒါ၊ “အဝ် မဲ တွိုန် ဟဲ့ ဘဲန် ယာ မာလမ်။ ဒေါ တီ နီ၊ အန် ဟဲ့ ဒဲ ဘာဒိက် ဆန်ထေ။”

အာယူဒါ ဝီ တဝ်း၊ “တဲး အန် တး ဒီ နီ၊ တဲး ယေ ငဝ်း ယမ် အန်၊ ဘော ဒုဝ့် ကာဆိုမ် အန် ခဲင် ငဝ်။”

25 ဒေါ တး ဂေ ဒဲ့ နာင် ထာမာ တွိုန်၊ အန် ဝီ တိုယ် ဒူအီ အူ ဝီ၊ တဲး အန် ဟာဝ် ကာလာင် ဒီ ဘိုဝ် အန်၊ တဲး အန် တဝ်း၊ “အုဝ် မိုဝ်း ဒီ ဂူင့် ဆီကာနူ ဘော ဝန် ဘော န့ကြွုန်။ ကြုဝ် ဂေ တီ မုး လက်ဆာနာ အီမာယ် အီ မုး ဂုန့် ဂွန် အုဝ်။ တဲး မဲ ယွတ် န့ မုး ကြုဝ် အာဆေ။”

26 အာယူဒါ တွိုန် ယီ ယွတ်၊ န့ မုး ကြုဝ် အန်။ အန် ဝီ တဝ်း၊ “အဝ် အုဝ် ဟဲ့ မွှိုမ် လွှိုမ် အုဝ်။ အုဝ် တူ ဘူင် ပီ ဒွိုမ် ကာလာင် အုဝ်။ အုဝ် တူ ဒွါ အန် လာယ် ဂွန် အုဝ် အီ စိူဝ် အာဆေလာ၊ တဲး အာဆေလာ ဝီ ဘဲန် အီမာယ် အန်။” ပန် တီ အာယူဒါ တူ ဝီ လုတ့် အန်။

27 ပန် တီ နာင် ထာမာ ဝီ မိုဝ်း ဂွန် ရာပ် ခဲင် ဝတ့် အန်။ 28 ဒေါ ဂွိုတ် ဂွန် တီ၊ ဒဲ အူ ဝီ ဟဲ့ လေး ဒီ အာတ့်။ ယာ အီ လိုမ်လာ အန် ယီ ပက် ဆေန့် အီ ရေန့် ဒီ ဒဲ အန်၊ တဲး ဂေ နပ် ဝီ တီ ဟဲ့ ဂွိုတ် ဒီ အာတ့်။ 29 ဟဲ့ ဟွတ့် အန် ဝီ ဘ့လိုပ် လိုပ် ဒဲ ခဲင် ဝတ့် မာ အန်၊ တဲး ဝါ အန် ဝီ ဂွိုတ် ဒီ အာတ့်။ မာ အန် တဝ်း၊ “မှဝ် မဲ ပါယ် ဒီ ဂွိုတ် လေး ဒီ အာတ့်။း” ခုဝ် အန်၊ အန် တဲး ဂွန် တီ စိူဝ် အာဖေရေတ်။^b 30 ဝါယ် အန် တီ အီကတ် အန် အီ မိုဝ်း ဆေန့် ရေန့် ပက် ဒီ ဒဲ၊ အန် ဘော ဂွိုတ်။ ဂေ ဝီ တဲး အန် စိူဝ် အာဇေန်ရာ။^c