1 အာယုဝ် တွိုန် ယီ ဟဲ့ ဇမ် မိူင် အဲဂိုပ်၊ န့ မိုဝ်း ဒူအီ အဲဂိုပ် အူ ဝီ၊ အန် စိူဝ် အာဖုဝ်ထိပ်။ အန် မုး အာမူ အာမာတ် ခုန်ဒီခမ်။ အန် ဘော မုး ဒါ ဘုဝ် အီ အိုပ် ဒါ ဆိုက် အီ ဘ်ု ဟုဝ် ခုန်ဒီခမ်။ အန် ဝီ စိုဝ်း အာယုဝ် တွိုန် ဒီ ဒူအီ အာဆာမာန် အီ ဟဲ့ တိုယ် အန် ဇမ် ခဲင် မိူင် အဲဂိုပ်။

2 ဇဝ်ဖြာ ယီ ကွယ် ရိုမ် ဒူပ် အာယုဝ်၊ တဲး အန် ပဲ ဒီ ဘူင် တူတ့် ခဲ့ ပီ စ်ု ဂေ အန် ဘူင်။ အန် မိူဝ် ကွယ် ခဲင် ကာင် ဒါ ကာညာ အန်။ 3 ဒါ ကာညာ အန် ဘော ယိုဝ်၊ ဇဝ်ဖြာ ကွယ် ရိုမ် ဒူပ် အာယုဝ်၊ တဲး အန် ပဲ တူတ့် ပီ ဘူင် အန်။ 4 ပန် တီ ဒါ ကာညာ အန် ကော အိုင် အာယုဝ်၊ တဲး အန် ဘဲန် ဒဲစေန့် အီ စွယ် အန်။ ဟဲ့ ဟွတ့် အန် ဘော တဲး အာယုဝ် အိုပ် တူတ့် ခဲင် ကာင် အန်။ ဘော ဒူအီ ဘော ကြုဝ်ကြာမ် အန်၊ အာယုဝ် အိုပ် တူတ့်။ 5 အူ ဆိန့် ဒေါ ဘဲန် အာယုဝ် ဒါ အီ အိုပ် တူတ့် ခဲင် ကာင် အာဖုဝ်ထိပ် တွိုန်၊ ဇဝ်ဖြာ မွင့်ကာရာ တဲး ကာင် တီ ကူပ် မိုဝ်း အာယုဝ် တွိုန်။ ခဲ့ ပီ မိုဝ်း အာဖုဝ်ထိပ်၊ ခဲ့ ကွယ် ခဲင် ကာင်၊ ခဲ့ ကွယ် ဒူင် နာ အန်၊ ဇဝ်ဖြာ မွင့်ကာရာ တဲး တူတ့် ဒွန် မျုဝ်။ 6 အာဖုဝ်ထိပ် အာဝ် ဟူ လုဝ် ဘူင် မာဆေ ခဲင် ကာင် အန်။ အာယုဝ် ဘူင် ဆီချာ တူတ့် ဒွန် မျုဝ်။ န့ ဂိတ် မီ ပီ ဒီ ဟူမ် အန်၊ အန် လုဝ် ကာလာင် မာဆေ ပီ မွက့် အန်။

7 အာယုဝ် တွိုန် ယီ စှိတ် ကာဆဝ်၊ ဘော ဒုဝ် ဘော နာ အန်။ ပန် တီ အာဝ် လှေန့်၊ အီဘိုန့် ဒါ ကာညာ အန် တွိုန်၊ အန် ဘော အိုင် အာယုဝ်၊ မိုဝ်း နဝ်း ဆီ ပွိုန် အန်။ အန် တဝ်း၊ “တဲး မဲ လာယ် အုဝ်။”

8 အာယုဝ် ယီ တဝ်း၊ “အာဝ် ပွိုန် ဘူင် ပါယ် တီ။ ဒါ ကာညာ အုဝ် ညှိုမ် အုဝ်၊ ဟဲ့ တဲး အုဝ် ဘူင် တူတ့် ဒွန် မျုဝ် ခဲင် ကာင် အန်။ 9 အန် ဟဲ့ တဲး အုဝ် မိုဝ်း ပွုန် ခဲင် ကာင် အန်။ အန် မိူဝ် တူ ဂြူပ် အုန် မာဆေ။ န့ ယီ မုး မဲ၊ အီဘိုန့် အန်၊ အန် ဟဲ့ ဂြူပ် အုန်။ မှဝ် အုဝ် ဒီ ပါယ် ဒီ ဘူင် နာ တူ မွှိုမ် ဒီ အန်။း ဘော ဇဝ်ဖြာ ဒီ ဒမ် မှာပ် ဒီ အုဝ်၊ ဆေ အုဝ် ဘူင် ပီ မှာန့် မဲ။” 10 အန် ဟဲ့ ဟွတ့် တဝ်း ပါယ် တီ အီဘိုန့် ဒါ ကာညာ အန် တွိုန် ဝီ မှာန့် ပါယ် တီ ဘဲန် ဆီငဲ ဘဲန် ဆီငဲ။ အာယုဝ် ယီ တူ ထူမ် ဂြုဝ်း တီ၊ တူ ဟာဝ် ဒူင် အိတ် အန်၊ တူ ကွယ် ရိုမ် ဒူပ် အန်။

11 န့ ဘော မိုဝ်း အူ ဆီငဲ၊ အာယုဝ် ဟဲ့ တး လိုပ် ခဲင် ကာင်၊ တဲး အန် ဘူင် ဂါန် အန်။ န့ တူ မိုဝ်း အာဆေ ကွယ် ရိုမ် ဒူပ် အန် ခဲင် ကာင်။ 12 ဒေါ အန် တီ အီဘိုန့် ဒါ ကာညာ အန် ဘော ဒိူတ် အာယုဝ် တဝ်း၊ “တဲး မဲ လာယ် အုဝ်။” အာယုဝ် ယီ တဝ် လေး နာ ရေတ့် အူ ဇေန့်။ အီဘိုန့် တွိုန် ဘော ပွိုန် ဒီ ပါ ခြိုင် အန်။

13 အန် ဘော ယွတ် အန် ပွိုန် ဒီ ပါ ခြိုင် အာယုဝ် ဒီ ဒဲ အန်၊ 14 အန် ဝီ ဒတ် ဒဲ့ မှာယ် အန် တး ဒူင် ကွယ် အန်။ အန် ဝီ တဝ်း ဒီ ဂေ၊ “နီ၊ တဲး ဘေ ယွတ်။ ဒဲစေန့် အီ မုး အာမျုဝ် ဟဲဘြဲ ပီ ဒဲ့ ဒါ ကာညာ ဘေ၊ အန် ဟဲ့ တး ဒူင် အိတ် အုဝ်၊ တဝ်း ဒီ လာယ် အုဝ်။ အုဝ် ယီ ဒတ် တာင်။ 15 ဒေါ ယိုဝ် အန် အုဝ် ဒတ် တာင်၊ အန် ဝီ ဝဲန် ခြိုင် အန် ဒီ တီ၊ ဟာဝ် တဝ် လေး နာ ရေတ့် ကာင် အူ ဇေန့်။”

16 ပန် တီ အန် ဝီ ဘ့လေး အုန် ခြိုင် အာယုဝ်၊ တဲး ဒါ ကာညာ အန် ဝီ တး။ 17 အန် ဝီ ကာလာင် ဒီ အီမာယ် အန် ပီ ပီ ကာလာင် အန် ဒီ မှာယ် တွိုန်။ အန် တဝ်း၊ “မဲ ဟဲ့ ဒိုဝ်း ဒဲစေန့် အာမျုဝ် ဟဲဘြဲ တွိုန် တး ဇမ် ကာင် အေ၊ တဲး အန် လာယ် ယေ အီဘိုန့်။ အန် ဟဲ့ တး လိုပ် ဒူင် အိတ် အုဝ်။ 18 အုဝ် ယီ ဒတ် တာင်၊ တဲး အီ တး စွယ် အုဝ်။ ပန် တီ အန် ဝဲန် ခြိုင် အန်၊ တဲး န့ ကွယ် ဒီ ခူပ် အုဝ်၊ ဟဲ့ ဟွတ့်၊ အန် ဟာဝ် တဝ် လေး တ ကာင်။”

19 ဒါ ကာညာ အန် ဝီ ထူမ် ဂြုဝ်း ပီ ကာလာင် အီဘိုန့် အန်၊ ပီ ဖျာက် အန် အာယုဝ်၊ အန် ဘော ရူ ကာဆဝ်။ 20 ပန် တီ ဒါ ကာညာ ဝီ မှေတ့် အာယုဝ်၊ ခြွင့် အန် ခဲင် ကာပိုမ် အီ မုး ဒူင် ပီ ခြွင့် ဂေ မှာယ် ခုန်ဒီခမ်။

21 ဒေါ ကွယ် အာယုဝ် ခဲင် ကာပိုမ် တွိုန်၊ ဇဝ်ဖြာ ဝီ ကွယ် ရိုမ် ဒူပ် အန်၊ တူ ဝဲန် အန်။ ဇဝ်ဖြာ ဘူင် တဲး ဒူအီ ဘ်ု ကာပိုမ် မိုဝ်း နဝ်း ဝုဝ် အာယုဝ်၊ ဘူင် နာ မွှိုမ် ဒီ အန်။ 22 ဒူအီ ဘ်ု ကာပိုမ် ဘော တဲး အာယုဝ် ဝီ အိုပ် ဂေ ဒူအီ ဒွန် အီ အီ ကွယ် ခဲင် ကာပိုမ် တွိုန်။ မာဆေ ပီ လုဝ် ဘူင် ဂေ၊ အန် ဝီ တဲး အာယုဝ် စ်ု အီ ဟဝ် ဘူင်။ 23 ဒူအီ ဘ်ု ကာပိုမ်၊ အန် အာဝ် ဟူ ဘူင် မာဆေ။ အန် တဲး အာယုဝ် အိုပ် ဂေ အီ ကွယ် ခဲင် ကာပိုမ် ဒွန် အီ။ အန် ဟဲ့ နပ်၊ ဇဝ်ဖြာ ဟဲ့ ကွယ် ရိုမ် ဒူပ် အာယုဝ်၊ တဲး အန် ပဲ တူတ့် ခဲ့ ပီ ဘူင် အန်။