အာကူပ် တွိုန် ယီ ဟာဝ် ကွယ် ခဲင် မိူင် ဒူင် ကွယ် ဂုန့် အန် အီ မုး မိူင် ကာနန့် တွိုန်။

2 ပီ ဒီ ခဲ နာ အာတ့်၊ န့ မုး လွင် ဂေ လှုက်လှာန် အာကူပ် တွိုန်။

ဂွန် အာကူပ် အီ စိူဝ် အာယုဝ် တွိုန်၊ အာဆာက် အန် ဟဲ့ နုဝ့် ဂိုဝ် ဒီ ဘူ ဆီနမ်၊ အန် ဝီ ဘ်ု မာဘူ ဂုန့် အန်။ အန် ကွယ် ရိုမ် ဒူပ် အီကတ် အန်။ န့ မုး ဘော ဂေ ဂွန် အီမာယ် နာင် ဘီလာ ဂါယ် နာင် ဆီဖာ၊ အီ မုး အီဘိုန့် ဂုန့် အန်။ အာယုဝ် ယီ ဝီ ဟာဝ် ဒူင် ကွယ် ဂုန့် အန်၊ ကာလာင် နာ တူ မွှိုမ် ပဲ့ ဟဲ့ ဘူင် ဂေ။

3 အာကူပ် တွိုန် ယီ ရွက့် အာယုဝ် လွှိုမ် ဂွန် အီမာယ် အန် ဒွန် ဝီ။ ခုဝ်၊ အန် မုး ဂွန် တျီ့ အီ ဂွိုတ် ဒေါ ဟဲ့ ဟွတ့် ကတ် အန်။ အန် ဘော တဲး အီ ဘူင် ဆီတုဝ် ခဲမ်၊ ဒွါ ဒီ ဂွန် ပီ ရွက့် အန် တီ။ 4 အီကတ် အန်၊ ဂေ ဘော နပ်၊ ဂုန့် ဂေ ရွက့် အာယုဝ် လွှိုမ် ဂေ၊ ဂေ ဝီ ရူ ကာဆဝ် ဒီ ဝါ ဂေ။ ဂေ တူ ဆီ ပွိုန် ကာလာင် ဂြုဝ်း မွှိုမ် ဒီ အန်။

5 အူ ဆီငဲ အာယုဝ် တွိုန် မ့ဘာဝ်။ အန် ဝီ ကာလာင် လွင် အန် တီ ဒီ အီကတ် အန်။ ပန် တီ ဂေ ဝဲ ရူ ကာပွါ ဒီ အန်။ 6 အန် တဝ်း ဒီ ဂေ၊ “တဲး ဘေ ထူမ် ပီ မ့ဘာဝ် အုဝ်။ 7 အေ ဒွန် အီ ကွယ် ခဲင် ဒူင် နာ၊ ပက် ဆီဘယ့် ငှုဝ်။ ဆီဘယ့် ပီ ပက် အုဝ်၊ န့ ဘော စွင့် ဆိူဝ်။ ဆီဘယ့် ငှုဝ် ပီ ပက် ဘေ၊ ဂေ ဝီ တး ကွယ် ရူပ်၊ ဂူမ် ဒီ အာတ့် ဆီဘယ့် အုဝ် တီ။”

8 ဂေ အီကတ် အန် ဝီ တဝ်း၊ “မဲ ထာင်၊ မဲ ဒီ ဘော အိုပ် ယေ၊ မဲ ဒီ ဘော ဘဲန် ဒါ ကာညာ ယေ။း” ပန် တီ ဂေ ဝဲ ရူ ကာပွါ ဒီ အန်။ ဂေ ဝီ လှုဝ်း ပီ မ့ဘာဝ် အန် ဘော ပီ ကာလာင် အန် ဒီ ဂေ။

9 ဝါယ် အန် တီ အာယုဝ် တွိုန် ဝီ မ့ဘာဝ် ပေါ အူ ဇေန့်။ အန် ဝီ တဝ်း ဒီ အီကတ် အန်၊ “အုဝ် ဝီ မ့ဘာဝ် ပေါ ဇေန့်။ အုဝ် ဟဲ့ ယိုဝ် ဆီငဲ ဂါယ် မာဂျီန် ဘော ဂေ ဆီမန့် ဂိုဝ် ဒီ အူ ဘူင့်။ ဂေ ဘောကာဂ့လျီတ် ဟဲ့ ဂူမ် ဒီ အာတ့် အုဝ်။”

10 အန် ဘော ကာလာင် လွင် ပီ မ့ဘာဝ် အန် တီ ဒီ ဂုန့် အန်။ ဂုန့် အန် ယီ အေး အန်။ အန် တဝ်း၊ “မာဆေ ပီ မ့ဘာဝ် မဲ အာတီ။း မဲ ထာင် မာ မဲ၊ ဂေ အီကတ် မဲ ဘော အုဝ်၊ ယေ ဒီ ကြိုပ် မဲ။း” 11 ဂေ အီကတ် အန်၊ ဂေ ဝီ ရူ ဒီ အန် ကာပွါ။ ဂုန့် အန် ယီ နုဝ် အုန် တူတ့် ခဲင် နဝ်း အန်၊ တဲး အန် လှုဝ်း ဆေဆေ။

12 ဝါယ် အန် တီ အီကတ် အာယုဝ်၊ ဂေ ဝီ ဟာဝ် မိူင် ဆေခေမ်၊ ဘ်ု မာဘူ ဘော မာပဲ ဂုန့် ဂေ။ 13 ဂုန့် ဂေ ယီ စ်ု အာယုဝ် တွိုန် တဝ်း၊ “တဲး မဲ ဟာဝ် မိူင် ဆေခေမ် အီ မုး ဒူင် ကွယ် အီကတ် မဲ၊ ဘ်ု မာဘူ ဂေ မာပဲ အုဝ်။” အန် ဝီ တဝ်း၊ “အုဝ် ဒီ ဟာဝ်။”

14 ဂုန့် အန် ဝီ တဝ်း၊ “တဲး မဲ ဟာဝ် ယွတ် အီကတ် မဲ၊ ယုဝ် ဂေ ကွယ် ဒါခိုယ်၊ ယုဝ် ဂေ ဒုဝ် ဆတ်ဒါဝါ ဟဲ့ ကွယ် ဆီချာ။ ဟဲ့ ဟွတ့်၊ မဲ ဝီ တး ကာလာင် ဒီ အုဝ်။” ပန် တီ ဂုန့် အန် တိုယ် အန် ဟာဝ် ခဲင် ဂ့လင် အီ မုး ဒူင် ကွယ် မိူင် ဟေဘြုဝ် တွိုန်။

15 အာယုဝ် ဟဲ့ ဇမ် မိူင် ဆေခေမ်၊ အန် ဘော ဟာဝ် ဝိန် ဒီ လဲ ခဲင် ဒူင် နာ။ ဒေါ အန် တီ အန် ကာတုန့် ဒါ အူ ဝီ အီ ဒီမွှတ် အန် တဝ်း၊ “မာဆေ ပီ ဟြေတ့် မဲ ဒီ နီ။း”

16 အန် ဝီ တဝ်း၊ “အုဝ် ဟဲ့ တး ဟြေတ့် အီကတ် အုဝ်။ ဂေ ဟဲ့ တး ဒီ နီ၊ ဘ်ု မာဘူ။ မဲ နပ် ဒူင် ကွယ် ဂေ။း”

17 ဒါ အီ တွိုန် ဝီ တဝ်း၊ “ဂေ အာဝ် ဟူ ကွယ် ဒီ နီ။ အုဝ် ဟဲ့ ယိုဝ် ဂေ တဝ်း ဒီ ဟာဝ် နာ မိူင် ဒုဝ်ထာန်။”

ပန် တီ အန် ဒူပ် အီကတ် အန်၊ ဝီ ကာတုန့် ဂေ ခဲင် မိူင် ဒုဝ်ထာန်။ 18 ဒေါ ယိုဝ် ဂေ အီကတ် အာယုဝ် ဒီ အန် ဒေါ ဆီ ကွယ် ကာတူင့် အန်၊ အာတ့် တး ချြီ့ အန် ဒီ ဂေ၊ ဂေ ဝီ လာယ် ကာမွုန်၊ လာယ် ဖြူမ် ဒီ ငဝ်း ဝဲန် အန်။

19 ဂေ တဝ်း၊ “နူ၊ ယွတ်၊ ဒူအီ အီ နပ် ဒီ မ့ဘာဝ် ဟဲ့ တး။ 20 တဲး အေ ငဝ်း အန်၊ ဝဲန် ဒုဝ် အန် ခဲင် ကာဒဝ် အိုမ် ခိုမ် ဟေန့်။ အေ ဝီ ကာလာင် ဒီ ဂုန့် အေ၊ န့ ဟဲ့ မိုဝ်း မာဒုဝ် ပြဲ ဟဲ့ တး ကဝ့် ယမ် အန်။ ပန် တီ အေ ဒီ ဘော နပ်၊ မာဆေ န့ မုး၊ လွင် ပဲ့ ဟဲ့ မ့ဘာဝ် အန်။”

21 အာရူဘေန် တွိုန် ယီ ထူမ် ဂြုဝ်း ဂေ တီ။ အန် ဆီ ချွတ် ဝါ အန်။ အန် တဝ်း၊ “ကွဲ့ တဲး အေ ငဝ်း ယမ် အန်။ 22 တဲး အေ ဘျွာ အန် ခဲင် ကာဒဝ် အိုမ် ခိုမ် ဟေန့်။ ကွဲ့ တဲး အန် ယမ်။” အာရူဘေန် တဝ်း ပါယ် တီ တဲး အန် ပွိုန် ဒီ ချွတ် ဝါ အန်။ ဟဲ့ ဟွတ့်၊ တဲး အန် ပွိုန် ဒီ ဝီ တိုယ် ဝါ အန် ဇမ် ဒူင် ကွယ် ဂုန့် အန်။

23 အာယုဝ် ယီ တး ဇမ် ဒူင် ကွယ် ဂေ အီကတ် အန်၊ ဂေ ဝီ ဘုတ် လေး ခြိုင် အန်။ 24 ဂေ ဘော ဒိုဝ်း ဘျွာ အန် ခဲင် ကာဒဝ် အိုမ် ခိုမ် ဟေန့်။

25 ဂေ ဟဲ့ ဟွတ့် ဘူင် ပါယ် တီ ဂေ ဝီ ဟူမ် ဘူမ်။ ဒေါ ဟူမ် ဂေ ဘူမ် တီ၊ ဂေ ဝီ ယိုဝ် ဖိုင် ဒူအီ အာမျုဝ် အာဆာမာန်၊ ဂေ တး မိူင် ဂီလေအာတ် အီ ကွယ် ခဲင် မိူင် တာင် မီဒီအာန်။ ဂေ ဟာဝ် မိူင် အဲဂိုပ်။ မင်ပြွင့် ကာဟာတ့် ဂေ ဟဲ့ ဒါင် ဆီနမ် ဘော နာမန် အုး ငှုန် ဘော ဟြွင့် ဒဝ်။

26 အာယူဒါ တွိုန် ဝီ တဝ်း ဒီ အူကတ် အူဝါ အန်၊ “ဆေ အေ ဒီ ငဝ်း ဝဲန် ဝါ အေ၊ န့ တူ မိုဝ်း အာဂျိုဝ် အန် မာဆေ။ 27 တဲး အေ ယွင့် အန် ဒွါ ဒီ ဒူအီ အာဆာမာန် တီ။ အေ ဘော ဘူင် ပါယ် တီ အေ တူ လုဝ် ဘူင် မာဆေ ဒီ အန်။ အန် မုး ဝါ အေ၊ ယင် အန် မုး ယင် အေ။” ပန် တီ ဂေ အူကတ် အူဝါ အန်၊ ဂေ ဝီ လာယ် ဖြူမ် ပါယ် တီ။

28 ဟဲ့ ဟွတ့်၊ ဒူအီ အာမျုဝ် မီဒီအာန်၊ ဂေ အီ ကာစိုဝ်း ကာယွင့် ကြုဝ်၊ ဂေ ဝီ တး ဇမ် ဒူင် ကွယ် အီကတ် အာယုဝ် တွိုန်။ ဒေါ အန် တီ အီကတ် အာယုဝ် ဝီ ဒိုဝ်း အာယုဝ် လေး တ ကာဒဝ်၊ ယွင့် အန် ဒီ ဒူအီ ဂေ တီ၊ တဲး ဂေ ဒိုဝ်း အန် ဟာဝ် မိူင် အဲဂိုပ်။ ဂေ ဘော ပွိုန် ရွိုန် အာ ဂိုဝ် ဘူင့်။

29 ပန် တီ အာရူဘေန် ဝီ တး ဇမ် ဒီ ကာဒဝ် တွိုန်၊ အန် ဘော ယိုဝ်၊ အာယုဝ် အာဝ် ဟူ ကွယ် နာ ခဲင်၊ အန် ဝီ က့လိုဝ် ကာဆဝ်၊ ကာယာတ့် ခြိုင် အန် ဘော ဘျ ခဲ့ က့လိုဝ် အန်။ 30 အန် ဝီ ဟာဝ် ဒူင် ကွယ် ဝါ အန်။ အန် တဝ်း၊ “ဝါ အေ အာဝ် ဟူ ကွယ် ခဲင် ကာဒဝ်။ မှဝ် အုဝ် ဒီ ဝီ ပါယ် ဒေါ တီ နီ။း”

31 ပန် တီ ဂေ ဝီ ငဝ်း မာပဲ အူ ဒုဝ်၊ ဒိုဝ်း ခြိုင် ဝါ ဂေ တွိုန်၊ စိုပ် ခဲင် နှာမ် မာပဲ တီ။ 32 ဟဲ့ ဟွတ့်၊ ဂေ ဝီ ဒိုဝ်း ခြိုင် တီ၊ ဒွါ ဒီ ဂုန့် ဂေ။ ဂေ ဘော တဝ်း၊ “ယေ ဟဲ့ ကာတုန့် ခြိုင် တီ။ တဲး မဲ ယွတ်၊ ယုဝ် န့ မုး ခြိုင် ဂွန် မဲ။း”

33 အန် ဘော နပ်၊ န့ မုး ခြိုင် အာယုဝ် တွိုန်။ အန် ဝီ တဝ်း၊ “ဟဲ့ မုး၊ န့ နှဲန် ဒုဝ် ပြဲ ဟဲ့ ကဝ့် ယမ် အန်။ အိုယ်၊ ဒုဝ် ပြဲ ဟဲ့ ကဝ့် ယမ် အာယုဝ် အုဝ်။”

34 ဟဲ့ ဟွတ့်၊ အန် ဝီ က့လိုဝ် ကာဆဝ်။ အန် ဘော ကာယာတ့် ခြိုင် အန်၊ ဝီ စှိုပ် ခြိုင် စာန်။^a ဟဲ့ လှေန့် ကာဆဝ်၊ နဝ်း အန် က့လိုဝ် ပါယ် တီ။ 35 ဂေ ဂွန် အန် ဒွန် ဝီ ဟဲ့ ဟာဝ်၊ တဝ်း ဒီ လှဝ် နဝ်း အန်၊ တဲး နဝ်း အန် ဝီ ဒါခိုယ်။ အန် ယီ တူ ထူမ် အာဆေ။ အန် တဝ်း၊ “အုဝ် ဒီ ဘော ယမ် ကူပ် မိုဝ်း အုဝ် နဝ်း က့လိုဝ်၊ နဝ်း ဒီကေန် ဂွန် အုဝ် တီ။” ပါယ် တီ နဝ်း အန် က့လိုဝ် ဆေဆေ ကူပ် လှုဝ်း အန် ဆေဆေ ဂွန် အန် အီ စိူဝ် အာယုဝ် တွိုန်။

36 ဝါယ် ဟဲ့ ဟွတ့် ဇမ် ဂေ ဒူအီ မီဒီအာန် တွိုန် ခဲင် မိူင် အဲဂိုပ်၊ ဂေ ဝီ ယွင့် အာယုဝ်၊ တဲး အန် ဘဲန် မှာယ် ဒါ တာင် အူ ဝီ အီ စိူဝ် အာဖုဝ်ထိပ်။ အာဖုဝ်ထိပ် တီ၊ အန် မုး အာမူ အာမာတ် ခုန်ဒီခမ် အီ အိုပ် မိူင် အဲဂိုပ်။ အန် ဘော မုး ဒါ ဘုဝ် အီ အိုပ် ဂေ ဒါ ဆိုက်၊ အီ ဘ်ု ဟုဝ် ခုန်ဒီခမ်။