Mana fa sam kiꞌreye nale e pike nam ee yemei furem e God
4
Ompla fika wone sa fa yereryaneye pone Kristen popu mi ka poipai pempopupe pone kore namo?
Ommo wongkwongkeni fafaile e pike nam naye nemnopune none kore renro e wolpuna e poneni ka neingke pone pangke ompla e nu wola ka pone pangkepe namo wee?
2 Pone fa sam kiꞌre pire puꞌpu ommo wongkwongkeni,
ka pone fa fi pupupe.
Ruklo ka nampalo wongkwongkeni e poneni namo,
fa yangke pone pempopupe mi ka karpopupe ka pufrope nu uma riline.
Ka pone ke fi puꞌpu ompla e pone wola pire fa ee puꞌpupe namo.
Pone e fi puꞌpu ommo namo e fika,
pone oi fi parine God fa ee puꞌpu ommo namo.
3 E pone pari ompla ka fi pem,
sa e fika,
pone e fa pari plaupe ira koroyane mingklari.
Ka e pone paripe,
pone an fa wolape nanrona le pone pem sa pone ee aipempe pone nro ka e pone ee fi poinsa rokoi fika sa pone e pupune.
4 Pone sa yukaile nu umpin fafaile fa nupole impi nonengkle ka painri nangke nale pamok.
Pone fi namale nanrona nale e fa sam wolanapane ompla e pike nam,
fa yangke yene ee furem e God?
Nanrona mana yire yemei fori uporo plau ommo e pike nam,
wu ee yangke wu wone yemei furem e God.
God fa sam wolyaneye nu uma e fa numaralo none
5 Buk e God yire nanrona,
“Spirit e God namo yina waiye mone namo,
sa God sam wola ee waiye renro wu wokera nro.”
Pone pire mi e God nam sa mi siwole wee?
6 Ka wolyane e God sa uporo wamo ee mewmewye mone.
Nanrona fane mi wile buk e God yire nanrona,
“God fa yisyori ka yumaraloye noula e nu uma e fa nererine noula e noneni nro.
Ka wu sam wolyane nale e uma e fa numaralone noula e noneni.”
7 Nanrona fane pone ee pumalralo pone ka paipe ruwe kero e God.
Pone ee sam kunrinra pane Satan ka e fi pupunepe wolpuna wunini.
Ka e pone pangke nanrona,
sa wu ee yulpalo ka yuꞌpone pone.
8 Pone ee sam wola pane God ka paipi sam nalen wu.
Ka e pone pangke nanrona wu wone plau ee wi ka sam waiye nalen pone.
Pone uma fa pangke eni namo plau ee namale ka pangke pone pemei pani nama e God yukaine mana e sam yaklele mew woneni sam pani.
Ka pone uma e wolpuna plainrane ka fa puru kero ommo e pike nam pire pupunepe God,
ee sam pangke pone wone pani nama e God,
ka pupunepe wu wokera nro.
9 Ommo fafaile oi pone fa pangkleripe namo,
ee nangke pone e wolpure ka ee paipe pempiripe nro.
Ka pone uma e fa kire pupope namo,
ee pupone nale e fa kirnupone ka sam piri wamo.
Ka pone uma e fa aipempe ommo namo,
ee sam wolpure wamo ka pai pempiripe nro.
10 Pone ee sam pumalralo pone kore ka paipe ruwe e Manwamo se wu ee yereryane pone papri riri.
Mone e fi maku mi palo nu plai
11 Nu Kristen inrani kinini ka pinofe kinini,
pone e fi ouwpire nu umapinkongkom e God.
Ka e pone ouwpire wee mi polo nu,
sa yukaine pone fi sam wolapale lo e God fa mone e wolmale nu plai,
nanrona fane pone wona pangko mi paloye lo namo.
La e yene yangko mi palo lo e God,
sa yuku nanrona yene waiye jas e lo namo
12 God wone nro sa e yinaye lo namo ka wone wokera nro sa jas e lo ka e nu umpinuma awaili namo.
Ka wu nro sa mana fa yisyoriye nu umpinuma wee yuꞌpuye kore nu umpinuma.
Nanrona fane yene yire yene fina ka miyonaye ka ouwyireye nu?
Mone e fi wolkuruno God ka mupuneme wolpuna e moneni nro e ommo e ingkinre
13 Pone uma fa puna wolpuna nanrona,
“Anro naminrele wee ningkinama mu ee maimapri taun wongke ka mu ee mangkeme ommo bisnis ee resukru kikla wokera.
Ka ommo namo ee yangke mu memei romaula mana.”
14 Pone fi namale ompla fika ee yemei ningkinama.
Laip poneni namo,
sa yemei yukaine ruru fa nemeine mii wori panri riri ka fa faflai pekimone.
15 Ee wone ka e pone pire nanrona,
“Ka e Manwamo wone wola mu ee maime,
sa mu ee mangkeme ommo namo mu wola.”
16 Ka pone fa fi pirepe nanrona,
pone fa pangkepe ompla fa uma plai ee nuru pone ka wolane nanrona pone sa ee sam rikiponepe nu uma mingklari ka pone fa pirepe mi alele e ommo wamfafai e pone pire fa ee pangke.
Ka nale namo sa fa sam fafaileye nama e God.
17 Pone ee namale ompla namo.
Ka e pone namale nale wona uporo wongke e pone ee pangke ka pone ke fi pangke,
sa pone e pangke eni nama e God.