Mi kero pai nu uma e fa nunarine ommo mingklari namo, ee sam saimone none kore
5
Pone uma e punari ommo mingklari namo,
sam ripi parana mi naminrele.
Pone ee as wola mingklaripe naminrele ka sam piri kunepe.
E fika,
poprolaye le God ee yawane fafaile ee wi yisyori pone.
2 Ommo upupu e poneni namo,
e sam fafaile pu.
Ka ommo papri upupu ka ampapri e poneni namo,
sa mongkila ee nokoronekri.
3 Gol ka silva e poneni namo,
ee ponreri ka e sam ponyane.
Ommo poneni e ponrerine namo,
ee ninananene alele eni e poneni e mouli e pike nam yire ee pekimo.
Ka eni fafaile e poneni namo,
ee sam yisyoriye pone se pone e ponsaro rere namo ee yukaine e niꞌpi e yupoye nale e poneni.
Namo sa e fika,
pone oi fa pupari ommo kero wamfafai fa e aipempe nale e poneni kore e iplile e pike nam yire ee pekimo.
4 Pupu!
Pone oi fi pali romaula pai nu uma oi mewne nengkrele wamfafai poneni.
Ka e naminrele,
pone e pempe romaula ka fi palipe nu namo sa naye niri ka nouwne God ee yali kore fafaile palo pone ee resukru e eni e poneni namo.
Nu uma oi mewne ommo nengkre poneni namo,
naye niri ka nunangkunrune Manwamo E Yuna Kero Wamo namo,
ee sam yeinyenso pone.
Ka namo se pai ripi e wu pu.
5 Mouli e pone paipe pike,
pone oi wola pire ee sam paipe ommo upupu riri ka pangke ommo fa ee yale pone aipem wamo.
Pone po ommo uporo wone ka yangke pone nale reryane wamo yukaine ommo kuru fa naine ka norine kaire e fa nufrone nu ka none nu.
Nanrona fane pone plau won naye poripe nro kaire poneni fa ee pem eni wamo laip pone.
6 Pone oi mi polo nu uma fi nangke eni ka pufro nu riline pu.
Nu fi nangke ompla wongke fa ee nali kore eni pone.
E eni wi mone, mone ee meri kero ka mori Manwamo ee wi
7 Nanrona fane,
Kristen inrani kinini ka pinofe kinini,
pone ee pem wolpuna raulo ka poripe Manwamo ee yemei.
Pone ee wolrufu nale e mana yangke nengkrele.
Wu fa komafre waiye ka yoriye kaire ka riplea nangke ommo wonyaneni fa e nangke pike yangke ommo neri ka reri nale.
8 Nanrona fane pone plau ee komafre paipe yukaile nu e nangke nengkrele.
Pone ee kerpane wolpuna poneni.
E fika,
Kaire e Manwamo ee yemei alele namo,
sa wi ke poprolaye.
9 Nu Kristen inrani kinini ka pinofe kinini,
pone fa wolpuna fafaile pone kore.
Ka e pone wolpuna neni pone kore,
sa Manwamo ee kotimye pone yukaile nu uma e fa nangke eni nama e God.
Wu sa waiyeye nro ka kampruno ee wi kore pike nam fa ee yupu kot mingklari.
10 Nu Kristen inrani kinini ka pinofe kinini,
ompla wongke mone ee muru ka mupuneme namo,
sa nale e nu profet e Manwamo oi nangkene.
Nu oi sam kaule naine e eni nemeine nu.
Nu isi nungkam eni namo e fika,
Manwamo isi yale nu mi ka nu nangkene ompla e fa noprone mi alwone wunini paiye nu umpinuma fa ee nupu.
11 Pone ee wolrufu nu uma namo.
Plai nunini fi num,
ka fi nupone bilip noneni.
Muru nu yukaile nu uma oi neri kero ka nungkam eni ka God blesim nu.
Pone namale mi e Jop.
Wu plau isi yeri kero ka yungkam eni mingklari alwone yeye pai se sa,
Manwamo sam yangke wu wone yakle nu plai.b
Pone namale nanrona Manwamo,
wu mana fa sam wolyaureye nu umapinkongkom ka wu fa sam wolayaleye nu ka wola woneni ka yangke nale uporo nu.
Mone e fi kermane mi moneni kore ka karmouw noula e Manwamo riri
12 Nu Kristen inrani kinini ka pinofe kinini,
riri ka rikipone ommo mingklari ki kopro nu namo,
pone ee fi pouw noula e heven wee pike wee pouw noula e ommo plai wee pouw noula e Manwamo fa ee kerpane mi poneni fa nu uma ee nupu mi e poneni.
Ka e pone pire “Yei” sa pone sam pire “Yei” ka e mi poneni.
Ka e pone pire “Onnele” sa pone sam pire “Onnele” nro sa ee resukru mi poneni.
Ka e onnele,
sa God ee yangke ompla fafaile wamo ee yemei pone.
Mi fa nesapune ee keryane nu uma ee naine kero bilip
13 Fina poneni sa yungkam eni?
Ka e mana yungkam eni,
sa wu ee yesapu ka yarineye God ee mewmew wu.
Ka fina pone kaire uporo ka wu sam aiyem?
Mana e aiyem namo,
ee yeile rai fa ee yereriye noula e God.
14 Fina pone e yenri?
Mana e yenri namo,
ee youw nu uma fa painri riri e sios namo,
ee ni ka nina wel wu noula e Manwamo ka nane wu nesapu.
15 Ka nu ee wolpuna wokera plau God ka sam bilip nanrona Manwamo e sam yupu nu e nu nesapune,
ka Manwamo ee yem kore mana e yenriye namo ka ee yereriye wu kore.
La e wu isi yangke nale fafaile plai,
sa Manwamo ee yuꞌpole nale fafaile namo.
16 Nanrona fane pone wokwokera ee sam pirepe mi alwone ka popripe nale fafaile poneni paiye nu uma plai ka pakle nu pesapupe,
sa God ee saimoro pone kore.
Yeapu e mana uporo fa yunaye kero wamo e resukru ee mewmew nu uma plai.
17 Elaijac wu sa mana yukaine mone.
Ka e wu yesapu keroye ka yarine God ee fi yawane riple yolo pike fane riple fi yulo yolo pike pai resukru kikla plainrikera ka 6pla kari.
18 Pai se sa wu fa yesapu kore ka riple yulo ka yangke pike yangke ommo e nengkrele korori kore.
Mana e koroyane rokoi uporo namo, sa mone ee mumane wu wi kore
19 Nu Kristen inrani ka pinofe kinini,
le wongke poneni e yuꞌpone mi alwone e God ka pai rokoi fafaile ka wongke yumane wu wi rokoi uporo kore,
20 sa mana namo ee namale nanrona,
mouli e wu yensonaye wongke e yangkeye nale fafaile namo,
mana namo sa ee yem kore mana wongke fa wu ee fi sam pekimo nale e fa riline.
Wu ee waiye laip yekei yekei yane God.
E fika,
God ee yuꞌpole nale fafaile mingklari e mana namo yangkeye.