Sam yopane nongkola yeneni
3
Pone Kristen inrani ka pinofe kinini,
seke mone awaili ee memei mukaine tikse.
E fika,
mu sa uma fa mukuleme nu umpinuma namo,
e mouli e kot wamoni,
ka God sa ee sam yoinsaroye ommo awaili pipi e nenene ommo e mu oi fa mangkleme namo se minona mu.
2 Mone uma awaili e fa mangklerime ommo wongkwongkeni fa nangkene mone e fi sam mupuneme rokoi uporo.
Ka,
e nu uma e fa sam saimo nongkola e noneni namo,
nu uma namo sa resukru wamo fane nu e resukru fane sam saimone none nale papri noneni plau.
3 E mone mina ain plola hos reꞌfa,
ain plola pitiri namo fa yangke hos namo e yupuneye wolpuna e moneni ka e yangke ompla e mone e wola fa wu ee yangke.
4 Purupe nu sip plau.
Sip nu sa ommo wamfafai fa puyene ka nurulene kero e rapu wamfafaini.
E nu fa puyene,
stia aure namo fa nensorone sip wamfafai namo painrine koii pei e kepten e sip yire fa sip ee pai.
5 Nanrona fane,
nongkola e mone sa ompla plola pitiri e yeye nale e moneni.
Ka nongkola namo fa yangkeye uku wamole ka yoproye ommo e fa nererwane noula e mone e ommo wamfafai oi mone mangkleme.
Mone namale,
niꞌpi rola pitiri nro namo e resukru ee yemyoku ka ee yangke niꞌpi e wamo ka yupolyekri ommo mingklari e nene aikiki.
6 Nongkola e mone namo,
sa yukaine niꞌpi.
Fa yunariye ommo mingklari fafaile wamo fa yangkeye ee sam yisyoriye nale e moneni e nemei fafaile.
Ka nongkola namo ee resukru ee sam yisyori laip e moneni e yukaine niꞌpi e yuꞌpolyekriye ommo mingklari.
Ka niꞌpi namo,
sa niꞌpi e Hel wone.
7-8 Nomu e ki kireke nongkola e moneni fafaile namo sa nanrona,
mana wongke e nu umpinuma e pike nam e fi resukru ee saimoye nongkola woneni.
Isi pu mana wongke yeimareye ommo kuru amun wongkwongkeni,
yukaine rora,
ka ommo wongkwongkeni pipi ka wamfafai e ai,
ka e furu ka yaunoleye,
ka mana namo sa nayeimareye ommo namo ka yaunoleye nu.
Ka wongke e nu umpinuma e pike nam e fi resukru ee sam saimoye wone nongkola.
E fika,
nongkola moneni namo,
fa karyapaye nro ee yopro mi fafaile.
Ka ompla namo nro sa fa yisyori nale e moneni yukaine marasin fafaile e fa yangke mana riye yimeri waiyeye mone reꞌfa
9 Nongkola moneni namo fa yereriye noula e Manwamo ka Aina e moneni.
Ka mone fa mire mi fa yisyori nu uma plai e God isi yangke nu yukaine wu wone.
10 Reꞌfa wokera moneni nam nro sa fa yangke ompla plainrane,
wongke yereri noula e Manwamo ka wongke yire mi fa yisyori nu uma.
Pone Kristen inrani kinini ka pinofe kinini,
God fi yimai mone ee mupuneme ommo plainrane namo e nongkola moneni fa nangkene namo.
11 Nupi yane furu fa fi wiril painri ka nemnoku nile mii pulale wokera.
Ee sam onnele.
12 Pone Kristen inompranimpi kinini ka pinofe kinini,
ilo fik ee reri nalale e ilo oliv plau wee onnele?
Ka anro ilo wain e resukru ee rerile nalale e fik plau wee onnele?
Nanrona nro,
furu ee fi yangke mii uporo fa ee naikono.
Nanrona nro,
reꞌfa poneni ee sam popro mi uporo nro e ripi e nu umapinkongkom ka God.
Rokoi plainrane e ira uporo
13 Fina e pone sa e yunaye ira ka wolpuna uporo yeyeye wone?
Ka le mana nanrona e waiyeye sa,
wol uporo ka ira uporo wunini ee yangke wu e yumaralo wone kore ka raiyeye nale e uporo se nu umpinuma ee nurune.
14 La e pone fa wolpuna fafaile uma plai ka wolpuna poneni sa yuna nale fa yapu rokoi fa mewmew pone nro,
pone e fi pereri noula poneni ka e fi karpirepe ka pumaralo mi alwone.
15 Ira uporo yukaine namo seke yolo heven ka seke Godni.
Ira uporo yukaine namo sa e yemei wolpuna e mana nro.
Ka wu sa ompla pikeni nro ka Satan wu sa nangka e ira uporo namo.
16 Nomu e ki kireke mi namo sa nanrona,
sa uma wolpuna fafaile nu uma plai ka fa napu rokoi wongkwongkeni fa nererine noula e noneni namo,
sa kairkum mone ee muru nale fa wewelane ka fa naine uporo sa onnele.
Ka mone won ee muru nale wongkwongkeni e sam fafaile plau ee nenene.
17 Ka nu uma e nuna wolpuna ka ira uporo e wi God namo,
nu uma namo sa ee nangke nale nanrona:
nale e fa nupunene nale wona ka sam naine panine nama e God,
ka nale e fa wolnane ka saimorone mi aplaiye nu plai ka sam pempokul paipe plau,
nale e fa aplaine nu plai,
ka nale e fa wolpuna wokerane nu plai,
ka nale wamo e fa wolpalone,
ka nale e fa wolnurene nu uma plai,
ka nale e fa wolpuna uporoye fa ee yerreyaneye nale e fa sam uporone nu uma plai.
Nale yukaine namo nro,
mone ee mangkemeni nu uma awaili ka ee fi mangkeme nu uma plai nro.
Ka nale e yukaine namo,
sa nale e fa kar nangklene ee fi yeye plau.
18 Ka e mone maime wola wokera,
namo sa ee yukuye mone nanrona mone e mokleme ommo weli.
Ka nale e wol wokerane namo,
sa nale upupu e nemeine laip e moneni yukaine ommo upupu e nemeine nengkrele.