Yene ee fi wolyaneye nu uma plai nro
2
Pone Kristen inrani kinini ka pinofe kinini,
mone uma e bilipme mana e yunaye noula wamo ka namba noula wunini sa Yesus Krais.
Ka nale poneni e fa wolape plai ka wola pumarope plai namo,
sa sam yukuye alele nanrona bilip poneni sa siwole nro
2 Ka le pone pempokul paipe mow kori ka mana plainrane ni plele pone.
Wongke e wuyane sa yaile ompla papri uporo ka yufrana ring e nangke gol yeye mew mempi,
ka wongke sa ompla onnele fane yaile ompla rofoko.
3 E wuyane ni plele ka pone e puru wuyane,
pone e pangke nale uporo pai mana e yaileye ompla upupu namo ka ee pire nanrona,
“Ai wi waiye sia uporo kom.”
Ka pireni wongke e yaileye ompla rofokule namo nanrona,
“Ai pai yeri naye,”
wee “Waiye funrola nalen e ilo plola e ki fa rew kumaneke namo.”
4 Ka le pone pangke nale namo,
sa e yukaine pone fa ponsarope nu plai e wolpuna poneni.
Ka pone ke fi sam wola rufu ka ponsaro uma awaili plai e nale yukaine namo.
Sam onnele.
Pone ke pemei pukaine jas e fa yonsaroye nu uma plau wolpuna fafaile nro.
5 Pone Kristen inrani ka pinofe upupu kinini,
ki wolakane pone wamo.
Nanrona fane ki kire pone e pupu mi e ki nam ka saimoro wolpuna ka nale e poneni.
Nu uma e ommo onnele e nainene nama e nu uma e pike naminrele,
nu uma namo,
God e yuꞌpu nu pu ee naine renro e nale e fa bilipne.
Isi,
wu yukami pu nu uma e fa sam wolane wu namo ee nane wu e naine plau monre e kingdom e wunini.
Nanrona fane wu fa yuꞌpuye nu uma e ommo onnelene nama e nu uma e pike nam fa ee nane wu e nainenne kingdom e woneni.
6 Ka pone oi pangkepe nu umapinkongkom e ommo onnele rurungklamo wamo.
Ka fina sa fa yisyoriye pone ka yeingkeye pone paipi peripe nama e kot?
Nu uma namo nunari ommo ka romaula mingklari pone fa puru nu nanrona nu sa wone,
nu sa fa nane eni wongkwongkeni pone.
7 Mouli oi pone bilippe Yesus namo,
nu uma oi nouwne pone uporope noula e wunini.a
E noula namo nro,
nu uma namo nunari romaula mingklari ka ommo mingklari e pone ee puru nu e yukaine e uporo wamo,
sa fa sam yisyoriye noula e Yesus.
8 Pone ee sam puna lo yukaine God,
King e moneni oi yale mone wileye buk e woneni e yireye nanrona,
“Pone ee sam wolapalepe nu plai yukaine e pone fa sam wolape pone kore.”
Ka le pone pangkepe nanrona sa,
pone e pangke ompla uporo wamo.
9 Ka le pone wolapane man wongke ka sam pangke uporo wu ka fi sam wolapane wongke ka pangke fafaile wu,
namo e yuku alele nanrona pone e fi pupunepe lo pone an pangke ompla fafaile wamo nama e God.
10 Ka le mana yerfakru lo awaili ka sam yupuneye ka wu koroyane rola e lo wongke namo,
mana namo ee yuku wone nanrona mana fa yekriye lo awaili e God.
11 God namo nro yane mone lo plainrane yire nanrona,
“Yene ee fi yangke nale pamok,”
ka “Ee fi yufu mana ri.”
Ka le man wongke e sam yupuneye lo ka fa fi yangkeye nale pamok,
ka wu ke yufu mana ri,
sa wu mana fa yekriye lo.
12 Nanrona fane e pone popro mi wee pangke ompla wongke,
pone ee namale nanrona lo e yangke mone maime nale nengkem namo,
ee sam kotimne mone.
13 E fika,
e mone maime kaire e kot wamo e God,
God ee fi wolpalo nu uma fopi e isi fi wolpalone nu uma plai.
Ka mana e yukuye nale e fa wolpaloye nu uma plai e wu waiyeye pike nam,
sa ee rikipone kot namo.
Bilip fi yangke nale uporo namo, sa yemei ompla siwole
14 Pone Kristen inrani kinini ka pinofe kinini,
ka e man wongke yire nanrona,
“Ki e bilipim Krais,”
ka wu ke fi yangke nale uporo nu uma,
bilip wunini namo sa ompla siwole.
Ka bilip wunini namo ee yangke ompla fika uporo wunini ee yem kore wu?
Sa onnele fane!
15 Ka Kristen inrani kinini wee pinofe wongke pone ommo ampapri uporo onnele ka wu plau ommo fa woye sa onnele.
16 Ka e wongke pone ee yireni wu nanrona,
“Kaire uporo yene ka yene ee yem wolpun raulo.
Yene ee yufona ampapri ka yeinangkru nalpapri yeneni ka yene pai yem wo ka mewmewye puna yeneni.”
Ka e yene yuru nanrona wu sa ommo onnele ka yene fi mewmew wu,
mi yeneni namo ee mewmew wu fikayen?
17 Nanrona nro bilip ee fi waiye wone keila.
Ka mana e fi yukuye nale uporoyeni nu uma,
bilip wunini ee yukaine puꞌlo fane e fi yangke ompla wongke.
18 Ka,
man wongke yire nanrona,
“Yene yuna bilip ka ki kuna nale fa kangke nale uporo uma plai.”
Nanrona fane yene yuku ki bilip yeneni e Yesus namo fi yuna nale uporo.
Ka ki ee kangke nale uporo namo sa ee yuku yene bilip kinini.
19 Uporo yene e bilip God wokera nro e waiye.
Ka,
bilip yukaine namo e fi resukru.
Nu opolfafaile plau won fa namalene namo,
ka ompla e God wokera nro e waiyeye namo,
sa fa yangkeye nu nemnumne wamo ka naine nemfourorine nro.
20 Mana kungkumple,
yene yire fa ee namaleye bilip e fi yunaye nale uporo namo,
e fi yunay nale woneni wee?
Souw,
yupu.
21 Yene ee namale nanrona God isi namaperpari nale uporo ka namale flili e moneni Abraham namo nanrona mana uporo e wu yina auna wunini wile alta riri ka yire yangke ofa pari God.
22 Yene ee namale nanrona bilip ka nale wunini sa fa yane painri plau.
Ka nale wunini namo sam yangke bilip wunini yemei alwone.
23 Nanrona fane ompla namo yemei yukaine mi e wileye Buk e God e yire nanrona,
“Abraham e sam bilip wamo ka God yuru bilip e wunini ka youw wu mana fa yangke nale uporo,”
ka God youw wu fori woneni.b
24 Nanrona fane yene ee namale nanrona,
mone memei uporo nama e God e mone mangkeme nale upupu wu wone wolayapaye e mone bilipim wu.
E fika,
bilip nro ee fi yangke mone memei uporo nama e God.
25 Nanrona nro,
Rahap pin fa yangke nale pamok namo peki yenru nu uma e Josua isi yawale nu painri pekinuru taun namo.
Se sa Rahap ke yawale nu painri rokoi wongke ka nu fi painri kore rokoi isi nu nine namo.
Fane God yuru nale e Rahap yangkeye namo ka youw wu pin uporo.
26 E fika,
nale uporo e fi waiye bilip namo,
bilip namo sa yukaine puꞌlo nro.
Nanrona nro,
spirit e fi waiye nale namo,
sa e laip onnele.