Kaire uporo pai pone awaili.

Piprola e ki keꞌreke nam,

sa poneni uma e bilip ka paipe 12pla ori oikenra e Israel oi puponepe mokoi e moneni ka paipi paipepe mokoi plai e pike nam.

2 Pone Kristen inrani ka pinofe kinini,^a

e ommo fa nemplekarine wongkwongkeni nemei pone,

sa pone ee aipempe nro.

3 E fika,

pone ee namale nanrona,

ommo ringkringkeni namo e nemei fa ee nemplekari bilip e poneni,

ommo namo ee nemei fa ee kernanene bilip e poneni.

4 Pone ee sam peri kero bilip poneni ka pungkam eni.

Ka ee pone pangke nanrona se nale e poneni ee sam uporo wamo ka ee sam paipe ka e fi raingkulepe ompla wongke.

5 Ka le wongke e pone e raingkule wol uporo wee ira uporo,

sa wu ee as yesapu ka yarineye God ee yane wu wol uporo ka ira uporo e wu e raingkuleye namo.

God moneni namo,

wu mana fa mewpikriye nro fa fi miyufonaye mana e yarineye wu.

Sam onnele!

Wu fa mewfeingkriyaneye nro mana fina e yarineye wu.

6 Ka e mana yarineye God fa ee yane wu ira wee wol uporo,

wu ee fi wolpuna plainraneye e wu yariye God fa ee yane wu ompla.

Wu kom ee wola wokera ka ee bilipye nanrona God ee sam miyangkompari mi wunini.

Ka le wu e wolpuna plainraneye God e mi namo.

Sa ee yukaine rapu e yokoye furu ka furu yemei poipai pikreye.

7 Mana e yukaine namo,

se wu ee namaleye wone kore nanrona Manwamo e fi yane wu ompla wongke.

8 Mana nanrona,

wolpuna wunini ee pikari plol plainrane.

Nanrona fane,

ompla mingklari e wu yangkeye namo,

ira wunini ee kungkumple wamo fi namale rokoi uporo fikayen fa wu ee pai.

9 Ka nu Kristen inrani wee pinofe fopi e naine sam yaimarene,

e naminrele sa nu ee sam ainem wamo,

e fika God ee sam yereri noula e nunini yireye nu sa ee nuna nola wamo.

10 Ka nu uma e nunarine ommo mingklari namo,

ee ainemne fa God ee sam yumaralo noula e nu.

E fika,

nu ee sam firipanro ka nupone laip noneni ee yukaine am alfa e rokri ka firipanro plelenene.

11 E fika,

e kaire fa yeri yeꞌriye riri,

wu fa ali kero wamo ka wori wunini fa yekriye kiprela ka kiprela fa wokrerane.

Ka alfa upupu nunini namo,

won fa rouwlinine pai se sa plelene e kaire wori yekriye nu.

Nale nanrona plau sa ee nemei nu uma e fa nunarine ommo mingklari ka wolkinufune ommo e noneni namo.

Nu plau ee sam fririneri mouli e nu ee kar firipanro ka sam rili kei.

12 Pone uma fopi e fa peri kero ka wolpanepe God e ommo wongkwongkeni e ni neingkarine pone namo,

ki kireni pone nanrona,

God e blesim pone wamo.

E fika,

pone e peri kerope wi plele e pekimo e ommo wongkwongkeni neingkarine pone ka pone fa peri kero ka wolpanepe God,

God wone sa e isi yukamiye pone fa wu ee yane aiyem uporo wamo pone.

Aiyem uporo namo,

sa laip fa waiye yekei yekei.

Wu ee yane ompla namo yukaine wu wone isi yukami pu ee yane nu uma fopi e wolnanene wu wamo.

13 Ka le ompla wongke yeingke mana wongke yangke eni,

sa mana namo ee fi yire nanrona,

“God nro e yumane wu yangke ompla fafaile namo.”

Mone e namale nanrona,

God fa fi yinayaneye nale fafaile yeingkeye wu pai yingkripariye nale e fafaile.

Ka won,

God fa fi yumaleye nu uma painri ningkripanrine nale e fafaile.

14 Ka rokoi e ommo fa nemplekarine nu uma namo,

fa wiye nu uma e wolpuna fa nemei wamfafaine ompla fafaile.

Nanrona fane wolpuna e mana wone e yeingke wu ee yangke eni.

Ka mana wone fa sam wolkinyuye ompla fika fa yeingkeye wu.

15 E wolpuna e mana yemei fa ee yangke nale fafaile namo sa paiyile resukrupu pu ee reri nale wunini.

Ka nale wunini namo,

sa nale fa yangke nale fafaile.

Namo sa yukaine pin e yem mela woneni.

Ka e nale fafaile sa yemei wamo pu,

namo plau reri nale wunini.

Nale e wu yangke yemei namo sa nale fa riline kore.

16 Ki kireli pone Kristen inrani ka pinofe uporo kinini,

ki sam wolake pone wamo.

Ki kireli pone,

pone e fi kungkumplepe rokoi e fa nupunene nale fafaile ka rokoi e fa nupunene mi e fi alwoneye namo.

17 Ommo awaili upupu e mone fa muꞌpume ka uporo wamo namo,

naine heven riri ka nolo mone.

Ommo namo e nolo God wone wu sa Nangka e kaire,

kari ka kikla e alinine nemi riri.

Ka wu fa fi yeinyensoye.

Sam onnele!

Wu se ke yukaine malma e ommo e kaire yuye nu ka yangke malma e nu fa pai angkrenye ka wi polamye kore.

18 E wolpuna woneni nro,

wu yemei Aina moneni.

Wu yangke mone memei ka yame mone mi alwone e woneni mone ka mone oi bilipim mi alwone e wu,

ka e naminre mone maime yukaine mana e pai ririye nu umpinuma awaili plai yukaine ommo aure e nemei ririne nengkrele.

Ka ee yangke ommo awaili namo ee sam nemei keklepe kore.

19 Pone Kristen inrani ka pinofe upupu kinini namo,

ki fa sam wolkalike pone wamo.

Pone ee sam perfakrupe mi nam:

ripi pone sam ikoiyi ka iplele fa ee faflai pem mi e God faflai nro.

Ka pone ee fi penrume reꞌfa ka faflai popro mi.

Ka pone won ee fi faflai wolpuna neni.

20 E fika,

e mana wolpuna neniye,

namo fa fi yangke nale uporo e God wolaye.

21 Nanrona fane pone ee pangkrumo ommo awaili e fa nangke pone paipe rofokulepe nama e God ka eni wamo e pone pangkleripe namo.

Pone sam pumalralo pone kore ka pem mi yukaine God oi yoku yeye wolpuna e poneni namo.

E fika,

mi namo kero resukru ee yuꞌpu kore pone.

22 Pone e fi pupu mi namo e ripi nro,

pone sam pukaperi ka sam pupunepe.

Ka le pone karpupupe nro,

sa pone e karpanklepe pone kore.

23 Ka le mana e yupuye mi namo ka fi yupuneye mi namo,

wu e yukaine mana e yairuye ungklama woneni e wileye galas e fa nurune ungklama.

24 E fika,

e mirale sa wu e namale wone kore ka laip keklepe e woneni e wone yupuye mi e God,

pai se sa wu poipai raiye ka faflai nro wu wolayumaroye wone kore wu sa waiye mana fikayen.

25 Ka lo uporo wamo namo fa yekriye kero e nale fafaile ka yangke mone maime nale nengkem.

La e yene e sam yuru yoinsa lo namo,

ka waiye yangkeye nanrona ka yangke ommo yukaine e wu yire,

ka fi wolyumaro mi e isi yene yupuye,

sa God ee blesim yene e ommo fika e yene ee yangkeye.

26 Ka le man wongke yire nanrona wu fa sam yupuneye wola e God ka ke fi sam saimoye mireꞌfa e woneni,

sa mana namo fa karyangkleye wone kore.

Nale e lotu ka bilip e wunini namo,

sam onnele.

27 Nale e Kristen e waiye wona wamo ka eni onnele nama e Aina God moneni sa e nanrona,

mone ee sam maunoleme nu kongkom e mokanangkapi rili pu ka nu umpin e impi riline ka nupole naine ka eni nemei nu.

Ka,

mone won ee sam saimome nale e moneni ka nale e pike naminrele ee fi yeingkeye mone ka yangke mone ee memei rofokule nama e God.