Timoti ee as yuruye nu umapinkongkom e yukaileye nu sa e ori oikenra e woneni
5
Yene faa yenreleye nu uma alma sa,
nenrape.
Yene saimoro nu plau wola puna aplai,
yukaine e yene fa yangkeniye yene nangka.
Ka e nu efapu plau,
yene ee yangke nale nanrona yukaine e yene fa yangkeniye yene inrani.
2 Yene ee sam saimoro nu umpinalma ka yene e yangke mi aplai yukaine e yene fa yangkeyeni yene moka.
Ka nu umpin mangkrama plau,
yene won e yangkeye nale nanrona nro e yukaine e yene fa maluye yene pinofe.
Nale namo sa uporo wamo nama e God.
Fina sa ee yuruye nu umpin e impi rili nupole naine?
3 Yene e sam yuruye ka yangke nale uporoye nu umpin fopi e impi rili nupole nu ka none nro nainene.
4 Le pin e ini ri yupone namo,
e yuꞌpu kongkom ka anfife plau e nainene,
nu ee namale ompla ririyi e nu ee nangke nama e God namo sa fa sam mewkerunrone none ori oikenra.
Nanrona nro,
sa nu ee sam mewkerunrone none mampa ka mokanangkapi namo se yem kore koii e ompla mingklari oi nu fa amparpunu mewkerunrone none namo.
Ka nale namo nro sa fa uporo wamoye nama e God.
5 Ka pin wongke e ini ri yupone wu wonkera nro waiye ka mana wongke onnele fa e saimoyane wu.
Sa wu e sam bilipye God ka yesapu ningki kaire ka yarine God fa mewyane wu.
6 Ka,
pin e ini wunini ri ka wu waiye wolyaure wamoye ommo e pike namo,
ke wola yire nanrona wu sa nawaiye laipye,
ka alwone wu sa e waiye yukaine mana e ri pu.
7 Nanrona fane yene e sam yireli nu umpin e impi rili pu namo e nupune nale e fa nesapune God sa nu e nangke nale uporo nro sa nu umpin plai e fi napu nale fafaile e nu.
8 Uma e fi nauno none ori oikenra ka nu uma plai e ni nakle none naine mow e none namo,
sa e nupone bilip e none pu ka nu won e sam fafaile wamo ke rikipone nu uma e fafaile e fa nangke nale fafaile.
9 Yene ee yeꞌrero noula e nu umpin e impi e nu rili pu namo se sios e mewmew nu.
Ka yene ee yeꞌre noula e nu umpin kikla e nu rikepole 60pla ka nu e oi nemne mana wokera nro.
10 Pin namo e yem noula uporo ka e waiye fa e yangke ommo upupu.
Ommo yukaine,
wu fa sam yaunoye kongkom e noneni ka yuꞌpu ommo e fa none ka yale nu uma e mokoi plai e ni ka sam aiyem wamo nu uma e fa bilipne God e ni mow e wu ka yakleleye rew e nu.
Ka ompla wongke kore,
wu e mewmewye nu umpinuma e mouli e nu nemne eni ka wu sa pin e fa yangkeye ommo plai uporo.
Yene e yuꞌpuye noula e nu umpin namo nro.
11 Yene e fi kar yeꞌrero noula e nu umpin mangkrama e impi rili pu,
e fika wola e nu e yemei ka e nuꞌpu uma kore.
Ommo namo e yangke nu e kunrinra nane ompla e Krais.
12 La e ommo namo nemei,
sa nu umpin namo e nangke fafailene laip e none sa nu e fi nupune mikuraa e isi none nukane namo.
13 Ompla wongke sa,
nu ee merewaplaine ka nem nale e fa rewnapa poipanrene mow e nu uma plai.
Ka nu ee fi nangke nale namo,
nu ee naraine napu mi e ommo e nu uma plai e nangke sa nu ee painri ka nangke ira fafaile e none ka nokomine nu uma plai.
Nanrona fane nu nangke mi mingklari fi uporo fa mone ee mopro.
14 Ki wola nanrona e uporo le nu umpin mangkrama namo e impi rili pu namo,
e nuꞌpu uma kore ka nuꞌpu kongkom ka e sam nurune mow e none.
Le nu nangke nanrona se iim moneni namo,
e fi yapu rokoi fa e yisyori noula e nu umpinuma e bilipne namo.
15 Yuru!
Ompla fika e isi nemei plai e nu umpin mangkrama e impi e nu rili pu namo,
plai e nu e nensoro ka nupone rokoi uporo ka nupune Satan.
16 Ka le pin wongke e fa bilipimye Krais e yunaye wone umpin ploli plai e impi rili,
se wu e as mewmewye nu.
Se ompla namo e fi nangke sios e rangkuwa ee yaunoleye nu.
Sios e resukru ee yaunoye nu umpin ploli plai e impi rili ka uma e nurune nu namo sa onnele.
Mone ee as mopale nu uma e fa painri ririyine sios e fa sam nangklene ompla upupu e sios
17 Nu uma e fa painri ririne ka nurune ommo e sios ka sam nangkene ommo e none namo,
sa sios ee as yereri noula e nu ka ee yale romaula e nu sa ee pai ririyiye nu plai.
Ka e nu efe plai e fa sam nangklene ommo e none e fa nukulene nu uma ka noprolene mi e God namo,
sios e as yuruye nu ee painri ririyi plau.
18 E fika mone mopro mi e nile buk e God yire nanrona,
“Pone ee fi pangke bulmakau ee mirefa kungku e wu yangke ommo fa rew yumarone rais papri.”b
Pone namale mi wongke e yire nanrona,
“Nu uma e fa nangke ommo namo,
ee nem romaula e ompla e nu fa nangkene.”
Ka nu uma fa painri ririne sios sa yukaine.
Nu uma e sios ee nuꞌpu nu e nangke ommo e sios.
19 Yene faa yupu mi e mana wongke e miyoloye nu uma e painri riri nurune sios,
e nangke fafailene.
La ee plainre wee plainrikera e nirene mi nannanrona e nu nuru wu yangke ompla namo,
sa yene ee yupu.
20 Ka le wongke e nu uma e fa nangkene ommo e sios ee yangke nale fafaile,
sa yene ee yauri mi e wu alele nama e nu uma e sios.
Yene kom ee sam yopro mi wonaye nale e wu,
sa nu efe plai plau ee num,
ee fi nangke nanrona.
Timoti ee as sam yuru ye nale e woneni
21 E nama e God ka Krais Yesus ka e nu ensel e God,
ki sam kireni yene nanrona yene e sam yuruye ommo mingklari yukaine e ki kireni yene namo.
Yene e yangke nale nanrona kore nu uma mingklari.
Yene e fi yangke nale uporoye nu efe e yene fa wola uporoye nu namo nro.
22 Yene e fi faflai wola fouwro ka mewyauniye nu uma ka yaure nu nangkene ompla e God.
Yeka nale fafaile e nu e wi yangkana yene.
Yene e sam saimo yene kore se yene e namkire wamo nama e God.
23 Yene ee as yupone nale e yene fa karyaikoye mii siwole nro.
E uporo yene e as yaiko wain kukro plau sa e mourine yene puna ka ee yupapake nale e yene fa yenriye namo.
24 Ommo fafaile e nu uma fa nangkene namo e faflai nemei alele ka e faflai pai kot se sa nu efe e nangke ommo fafaile namo e ni kot.
Ka nale fafaile e nu efe plai e peki nene pai ingke se sa e nemei alele.
25 Nanrona fane,
e nale upupu e nene alele.
Ka le nale uporo plai fa fi faflai nemei alelene,
se nu none e fi peki nene.