Uma siwole e fa karnangklene ompla ee nangkene nale uporo nro
6
Nu umapinkongkom e bilipne Yesus ka naine mana fa karnangklene ompla nro ka nangkene ompla e nu uma plai namo,
fa numaralone none ka nerernanene noula e manwamo noneni.
Nale namo ee yangke nu uma e fi bilipne namo,
e fi ouwnire noula e God ka skul e miuporo e God.
2 Le manwamo e nu uma fa karnangklene ompla namo fa bilipye Yesus,
se nu uma fa karnangklene ompla namo ee fi nem wola nanrona,
“Manwamo namo,
sa mu apa,”
nanrona fane nu ee wewela ka e fi nupu mi e nu.
Nu mana fa karnangklene ompla namo,
ee asa nem wola nanrona,
“Mana e mu mangkeme ompla e wu namo,
wu sa mana fa bilipye fane mu ee wolamane wu.”
Ka e nale namo se nu ee amparpunu kore.
Nale e fa kirene romaula sa rokoi fafaile wamo fa yingkeye nale fafaile niine
Nam sa ompla yene ee yukule nu uma se yererwa wolapuna e nu sa nu e nangke ompla namo.
3 Mu fa mukuleme nu uma e mi uporo e Manawamo e mone Yesus Krais ka nale uporo e God fa wolaye.
La e mana wongke owyire skul e mu ka wu sa ke yukuleye nu mi wongke ee fi yukaine mi e mu fa mukuleme nu uma,
4 sa mana namo sa fa nongkoye,
ka mew yari wone wolapoku ka karwewelaye.
Ira wunini kungkumple wamo ka fi namale ompla wongke,
onnele.
Ira wunini yimeri wolapuna fafaile e fa minemnolone,
nokomi,
minemnukailene,
nemnenrelene ka pongkonuꞌpune mi nomu e mi plai namo.
Mi nanrona fa yangke mana wolapuna fafaileye nu uma plai ka nakle nemnopune mi,
nekrinune mi ka wola fafailene nu plai.
5 Ningki kaire nu fa naine ungklama nemningkrinolone nro ka wolapuna e nu fafaile wamo fi namale mi e alwone.
Nu fa wola nire nanrona,
rokoi e fa nemne nale uporo nama e God namo,
e mewmew mone wamo e nale e fa muꞌpume romaula mingklari.
6 Ka,
e mi alwone sa nanrona,
le mone aimem wamome ommo e God fa yaleye mone,
se mone e namale nanrona rokoi e fa nupunene nale uporo nama e God namo sa fa mewmewye mone wamo.
7 Mone e namale nanrona,
mone e fi mungkam ompla wongke e mone memei pike nam,
nanrona fane e mone mupone pike nam,
mone e fi mungkam ompla wongke maimpi plau.
8 La e mone muna ompla fa mome ka ompla fa maileme,
se mone e mire nanrona ommo namo,
sa e resukru mone.
9 Nu uma fa kiꞌre ka nuꞌpune ommo mingklari namo,
e nempriri painri ka parinane ompla fa yeingkariye yukaine misiri fa yeima omkuru.
Ira ka wolapuna e nu fa napa nire fa nangkene ommo fafaile nro ka ommo fafaile namo fa yeingkeye eni niine laip e nu se nu e sam fafaile wamo laip e ingke wi.
10 Nale fa kirene romaula sa fa yeingkeye ommo mingklari ringkringkeni fafaile niine.
Plai e nu uma fa kirene romaula namo,
e nupone bilip e none ka ompla namo e yeingke eni ringkringkeni e ni nu yukaine ompla neni fa e sam yoku nu.
Yene ee puye kero sa yene ee yem laip e fa ee yekei yekei
11 Ka yene sa mana e God,
fane yene e yimai ka waiye amon e ommo fafaile namo.
Yene e yeri kero ka e yupune nale e ki kireni ke yene naminire:
Yene e yangke nale uporo ka yupune nale uporo nama e God,
ka bilipye God wokera nro,
ka yupune nale e fa sam wolananene nu plai,
ka yeri kero yungkamye eni ka wolapuna aplaiye nu umapinkongkom.
12 Nale e fa bilipne namo,
sa yukaine resis wongke.
Nanrona fane yene e puye kero resis namo se yene e yem laip e fa naine kei e God isi yaure fa yene e yem namo.
Yene oi yoproye mi e ommo namo nama e nu uma mingklari.
13 Mone namale,
God fa yane laipye ommo awaili,
ka mone e namale nanrona,
isi Pontius Pailat yuyariye Yesus Krais,
ka wu miyangkompari kore mi alwone e wu.
Ka e naminrele,
nama e God yane Krais Yesus,
ki kire mi kero yene nanrona,
14 yene ee as yupuneye ommo mingklari yukaine oi yene yuꞌpuye namo,
ka yene ee fi yangke ompla wongke fafaile fa ee yangke nu umapinkongkom ee noko yene mi.
Yene ee yangke nanrona nro pai plele mouli e umapinkongkom mingklari ee nuru Manwamo e mone Yesus Krais ee wi kore.
15 Ommo namo e nemei mouli yukaine e God wone e yaure pu.
God wone sa nomu e fa ainemne ka wone sa wokera nro fa pai ririyiye ommo mingklari.
Wu King e nu king mingklari ka Manwamo e nu irauma mingklari.
16 Wu wokera nro sa e fi ri.
Ka wu sa fa waiye mokoi e wone ka yuna ali wamo ka mana wongke e fi resukru le pai nalen wu.
Ka mana wongke oi fi yuru wu wee e yinra wu.
Fane mone e mereri wu ka mereri noula yane kero e wu e yeyekei.
Won alwone.
Nu uma e fa neiri fakrune romaula mingklari namo ee as bilipne God ka ekrene nu umapinkongkom
17 Yireli nu uma e fa neirfakru romaula mingklari ka ommo upupu e pike namo e fi neri riryen nongkone ka nerernanene none noula kore.
Nu e fi wola kerone ommo fa faflai fafailene namo.
Nu e as bilipim God e fika,
wu mana fa yame mone ommo upupu mingklari fa nangke mone e aimeme wamo.
18 Yireli nu nuna romaula e none ka nangke ompla uporo nro.
Nu e fi nurune romaula namo e yukaine ompla uporo e noneni.
Ompla uporo wamo e nu namo,
sa nale e fa nangke uporo nu plai.
Nu e as nangke nale uporo fa mewmewne nu plai ka nale ommo pai nu uma e ommo sam yaimare.
19 La e nu nangke nale nanrona,
sa nale namo e isi nu nangkene namo ee yemei yukaine ompla kero e yeima keroye bilip e none,
e yukaine roma kero ee yeima mow ee fi weisoko.
Nanrona fane bilip e nu ee kero ka nu ee resukru ee nem laip e laip runu fa ee waiye yekei yekei.
Timoti ee as sam yuruye ka saimoye ompla e wone ee yangkeye
20 Timoti,
yene e sam yuruye ompla e God yaꞌneye yene namo.
Yene e kunrinra yane mi ringkringkeni e nu uma e fa nouwne “irauporo.”a
Irauporo namo,
sa fa fi alwoneye wu fa yemyangkompariye wolapuna e God.
Nanrona fane yene ee as yeye amon ee nu uma e fa nirene none sa fa nuꞌnane irauporo.
21 Plai e nu uma e bilipne namo naye nupune irauporo,
ka e wismam bilip e none pu.
Wolapuna e God e waiye plau pone.