Mi wawai fa wismampoleye nu umpinuma se nu ee nupone bilip e none
4
Holi Spirit oi yire mi alele nanrona mouli e ingke ee nemei se plai e nu uma ee nensona ka ee nupone bilip e none.
E fika,
nu fa nupune mi e nu opola e fa karnemprene mi ka opola e fafaile ka fa nupulene mi e nu.
2 Ka nu uma e fa neinnemprene mi ka nukane mi ira e nu umapinkongkom plau ee ni ka nopro mi e ommo fafai ka mi e none oi fa karneinnemprene mi e pai nu umpinuma ee nupu.
Ira e nu sa kungkumple wamo fa fi namalene nale fafaile e none ka fa fi refalene nale e none e fa nangkene namo.
Sam onnele.
3 Nu uma namo won fa mi naurerene nu umapinkongkom e fi nemnuꞌpu ka neinangkrune ommo plai e nu fa ee fi no.
Ka God sa e yangkeye ommo e none namo e wi mone umapinkongkom e fa bilipme ka namaleme mi e alwone e wone ee muꞌpu ka mo ka mire tenkyu wu.
4 E fika,
ommo awaili e God yangkeye namo sa won uporo nro.
Nanrona fane,
mone e fi meinangkrume ompla wongke e mone mire ee mo e God yangkeye.
Mone ee mem ka mire tenkyume God e ommo namo.
5 Mi e God ka e mone e fa mesapume namo fa yangke ompla namo ee nemei holi.
Timoti ee waiye yukaine mana uporo fa ee yuꞌna ommo e Krais
6 La e yene won naye yakreye mi alele yukuleye nu umpinuma e bilipne,
se yene ee mana uporo e Krais Yesusni.
Yene ee yem kero e mi alwone e mone fa bilipme wu namo ka ira uporo oi nu uma plai isi nukune yene ka yene sa won naye nupuneye.
7 Yene faa yupuye wawaimi e nomu onnele fa keryaneye nale e pike nam.
Yene e sam kunrinra yaꞌne mi namo ka yupuneye rokoi e uporo ee yangke yene ee yeri kero ka yupune nale uporo e nama e God.
8 Yene e namale pu,
mone e mire fa ee mangke nalepapri e moneni ee waiye kero,
mone ee fi mangke ommo wongkwongkeni,
ka ommo namo ee mewmew mone pitiri nro.
La ee mone mupune nale uporo wamo nama e God,
ommo namo ee sam nangke mone e kero ka ommo namo plau ee mewmew mone rokoi wongwongkeni e naminrele ka ee ingke plau mone ee mem laip e God oi isi yukamiye mone.
9 Mi nam e ki kireli pone nam,
sa mi alwone fa mone uma awaili e mupu ka bilipim.
10 Mone e fa sam bilipme God e fa waiye yekei yekei ka wu sa mana ee yuꞌpu kore nu umapinkongkom mingklari,
ka mi alwone sa nanrona wu fa riryuꞌpuye mone uma e bilipme wu nro.
Ka mone won naiye morime wu fa ee sam saimoro mone,
nanrona fane mu kero wamome mire fa ee mangkle ommo namo.
11 Yene won ee yaleye nu umpinuma mi namo ka yukuleye nu se nu e nupunene mi namo.
12 Nu ee nuru yene nanrona yene sa mela efapu,
ka nu ee fi wola nanrona yene sa mana siwole nro.
Onnele.
Yene ee yangke nale upupu wongkwongkeni se nu uma e bilipne ee namale yene ka nupune yene.
Yene ee yoproleye mi upupu ka yupune nale upupu nro.
Nale upupu e fa wola nanene nu uma plai ee yeniye yene ka yene ee bilipimye God ka ee waiye namkire yekeiye nama e God.
13 Naminre ka pai plele mouli ki e kii,
yene e sam yeri kero ka yuru pipa rola ka yopro yukule mi e God paiye nu uma fa e nupu ka yene yopro nomu e mi namo ka yopro yukuye nu nale e God fa wolaye.
14 Ka yene fa karwaiye,
yene e yangke ompla e isi God yane yene yukaine presen e mouli e nu uma e sios mew naunirine yene.
Ka e mouli namo,
wongke e nu yopro mi profet ka yire God e yane yene kero fa e yangkeye ompla namo.
15 Yene e fi karwaiye,
yene e sam yangke ompla namo,
se nu uma awaili e nuru nale e yene yangkeye ommo namo e uporo ka yemei wamoye.
16 Yene e sam saimo nale e yene ka ommo e yene yangkleye ka yukuleye nu umpinuma namo.
Le yene sam wola yapaye ommo e yene yangkeye namo,
se God e yem yene kore yakle nu uma e fa nupune mi e yene.