Nu uma e fa painri ririyine ommo e sios ee sam nupunene nale uporo
3
Mi nam e ki kire ee kireli pone namo,
sa mi alwone.
Le mana e sam wola yire fa ee yangke ompla yukaine mana e fa yuruye sios,
ompla namo sa uporo wamo fa yangke.
2 Mana e yire fa e yemei yunremana wu e sam yupuneye nale e wonaye nro,
sa nu uma e fi resukru le napu ompla wongke fa wu ee yangke koroyane.
Ka wu kom ee yem pin wokera nro ka ee sam waiye ka ee yuruye ommo e wone e yire fa ee yangke.
Wu ee sam yuruye wone ka yupuneye nale ee uporoye nro se nu uma ee nerernaꞌnene noula e wone.
Ka ompla wongke sa,
wu ee yangke nale uporoye nu uma e nine mow e woneni ka fa ee namaleye rokoi e fa yoproyemi ka yukuleye nu umpinuma.
3 Wu e fi yaikoye mii kero fouwro ka wolapuna neniye ka pai yakle nu uma plai nemnopune.
Wu e sam waiye uporo ka ee yakle nu uma saimorone mi e rokoi e uporo.
Ka wu e fi wola yapaye romaula ka yuruye nanrona romaula sa ompla wamo e laip e wone.
4 Wu ee as ekreye ka yeinangkruye pin kongkom woneni ka yangkeye nu kongkom e wone e sam namalene mi e wone ka nupunene.
5 Ka mana fina e fi resukru ka sam yauno ka yeinangkruye pinkongkom e woneni namo,
sa wu e fi yangkeye ompla namo ka e yauno ka e yeinangkruye sios e God.
6 Kristen keklepe e fi yangke ompla namo ka pai ririye sios.
Le wu yangke ompla namo,
wolapuna fafaile e yemei wu ka wu e yereriye noula e wone ka nongkoye se God e kotim wu yukaine isi wu kotimye Satan.
7 Mana e yemye ompla e fa pai ririyiye sios e yunaye noula uporo.
Nu uma e fi naine sios namo plau e nererinane noula e wu ka noprone mi alele nanrona wu sa mana uporo,
mana namo wu yuna ompla namo ka fa pai ririyiye ompla e sios.
Le mana e yunaye noula fafaile,
mana namo se nu ee nire mi ringkringkeni fa ee yisyoriye wu ka Satan ee yeima wu ee yukaine misiri ee yeimaye omplakuru.
Nu uma ee nangke ompla e sios ee sam nupunene nale uporo
8 Nanrona nro,
nu uma e fa nangkene ommo e sios namo,
nu plau ee nuna noula uporo sa nu umpinuma ee nuru nu sa uma fa sam kaune se nu ee sam nupu mi e nunini.
Ka nu e fi naikolnone mii kero ka fouwrorine ka won e fi namapalone ka napune rokoi ringkringke e fa pekinuꞌpu romaula e nu uma plai.
9 Nu ee as namalene none kore nanrona nu e naine alelyen nama e God.
Nanrona fane nu ee sam nuna kero mi alwone e God oi yaleye mone uma e fa bilipme wu.
10 Pone e sam purupe nu nanrona nu sa uma isi fi nangke eni sa pone e pale ommo e sios pai nu.
11 Nu umpin e nu plau,
e sam nangkene nale uporo ka nunane noula uporo ee nama e nu uma plai.
Nu e fi nokomi wee minolone nu uma plai.
Nu e sam saimone none ka ee sam nangkene ommo e nu nalene nu.
12 Nu uma e fa nangkene ompla e sios e as nem pin wokera nro sa wu ee sam yaunoleye kongkom e woneni ka nu uma e ni nakle awaili nainene mow e woneni.
13 La e nu uma e fa nangkene ommo e sios ee sam nangkene ommo upupu,
se nu uma mingklari e sam nererine noula e nu,
se nu e neri kero ka e fi numnumne ee nu nire fa ee nufune mi paiye nu uma e bilip e nu e yeyeye Krais Yesus.
Ripile e nale ee bilip e mone
14 Ki wola rufu kire ee kaiki kuru yene namo,
ka ki ke wola okroyane ka wola nanrona ki e as keꞌre piparola nam ee pai yene se.
15 La e ki fi faflai kii,
sa yene e resukru le yuru mi e yeye piparola ee yuku yene nale upupu e mone uma e God e as mupuneme.
Mone uma e God,
sa ee maime yukaine sios e God ee yunaye laip e fa yekei.
Ka sios namo sa yukaine wirimplola kero ka roma wamo sa fa yeirfakruye mi alwone e God.
16 Mone mingklari e sam namale mi alwone nanrona,
mi namo fa nu uma ee nangke nale uporo nama e God,
sa ompla wamo wone.
God yuku mone nanrona,
Wu oi wi yukaine mana runu
ka nu umapinkongkom nuru wu nama e none,
ka Holi Spirit yuku nanrona nale wunini sa uporo wamo,
ka nu ensel plau won nuru wu nama e noneni.
Ka nu uma oi fa minufune mi e wu
ka nopro poipaiye mokoi mingklari e pike,
ka nu umpinuma e pike nam
nupune ka bilipne wu,
ka God yumane wu pari riri
ka waiye mokoi e fa yuna glori wamo.