Mone ee mesapu ka marine God ee mewmew awaili umpinuma
2
Ompla mirale e ki kire yene ee yangke sa,
yene ee yarile nu awaili umpinuma ee nesapu God ka nire tenkyune wu ka ee as narinene wu se wu ee mewmewye nu awaili umpinuma.
2 Nu ee as nesapu ka narinene wu se wu ee mewmewye nu king ka nu uma e gapman.
E rokoi namolaiye se mone ee awaili ee mem wolapuna aplai ka e maime uporome.
Se mone wol ee resukru le mupune nale e uporoye nama e nu umpinuma ka e God.
3 Ka nale e nesapu nananrona sa uporo fa yangke God,
mana e yumale mone kore namo,
ee yem wolapuna uporo ka ee aiyem wamo.
4 Wu wola yire ee yuꞌpu kore awaili umpinuma se nu e namale nomu e mi alwone.
5 Mi namo sa nanrona,
God wokera nro fa waiye,
ka mana wongke fa waiye iplile e God ka mone umpinuma.
Mana namo sa Krais Yesus.
6 Wu oi yane laip woneni fa ee yuꞌpu kore mone awaili umapinkongkom.
Ka ompla namo sa God wone e yangke e mouli e wone oi yaure.
Wu e yangke nanrona fa ee yuku mone nanrona wu sa e sam wolayaneye mone awaili umapinkongkom wamo fane wu yuꞌpu kore mone.
7 E nomu namo nro fane God ke yaure ki fa ee kaike kukaine aposel fa ee koproke mi e wu.
Mi namo won alwone ki e fi rilkale pone.
Wu yaꞌne ki ompla fa ki ee kukuleke nu umpinuma e fi Juda se nu e bilipne Krais ka e namalene mi e alwone namo.
8 Nanrona fane ki ke wola nanrona nu uma e mokoi mingklari ee as nereri merew panri riri ka nesapu.
Ki wola wamo nanrona nu ee as naꞌne laip noneni ee pai God ka naine holi ka nupone nale ee fa nemnopunemi ka wolapuna e fa nenine.
Ka nupunene nale e fa nesapune nro.
Nale e fa nangke ommo uporo namo, sa ommo uporo nu umpingkle
9 E nale namo,
sa ki fa wola kireke nanrona nu umpin ee as naile ommo upupu fa ee resukruye nama e nu uma mingklari ee nuru.
Nu e fi sam saimo ka mewpanrone ira ka nalepapri e none plau gol,
kikinalale ka ommo ringkringkeni ka nailene ommo e nuꞌpune romaula wamfafai.
10 Ka nu sa ee as nangkene ompla upupu fa ee yukuye nanrona none e fa sam wola ka nupune mi e God.
Ompla e nu ee nangkene namo sa e yukaineye ommo e none e fa nailene.
11 Nu e as nupunene nale e fa mirurune ka numaralone none kore se none ee sam nem mi e God.
12 Ka ki kire nanrona nu umpin sa ee fi painri ririyi ka nurune uma alma ka noprole nukulene nu mi e God.
Nu ee miruru ka ee naine nupune nro.
13 E fika,
God oi isi yangke Adam pai ririyi se sa ke Iv.
14 Ka Satan sa ee fi yaurimi palo ka yensona wolapuna e Adam.
Wu kom oi yensona wolapuna e Iv ka yaurimi paloye wu yangkeye nale fafaile.
15 Ka nu umpin won ee nuꞌpune kongkom.
La e nu sam bilipim Krais,
se God ee resukru ee yuꞌpu nu kore.
Nanrona fane nu as sam nupune rokoi e fa sam wolananene nu uma plai,
ka nu ee as naine holi ka nupune nale uporo.