Piparola mirale e Pol yeꞌre pai
Timoti
1
Ki Pol,
aposel e Krais Yesus e keꞌre piparola nam.
Mana Yesus namo,
wu sa mone e sam namale wu wamo ka fa mai miplele mire fa ee muru ommo yukaine mi oi wu yukami yire fa e ingke ee nemei namo.
God,
wu sa mana fina oi yumale mone kore namo,
yane Krais Yesus e nina ki fa ee kaike yukaine aposel wongke e Yesus Kraisni.
2 Ka yene Timoti,
yene fa bilipye Krais Yesus fane nale namo nro sa ke yangke yene ee waiye yukaine auna e ki koneni.
Ki keꞌre piparola nam pai yene e fika,
Aina God yane Manwamo e moneni Krais Yesus namo e sam wolanure yene ka e wolapalo yene ka e nangke yene ee waiye plau wolapuna raulo.
Mone ee sam mupuneme mi alwone nro
3 Mouli e ki kuponeke yene mokoi namo ka kii provins Masedonia,
ki isi kireni yene mi alele pu yene e waiyeye taun Efesus nro fa ee yire mi kero ka reinangkruye nu uma e fa karilnalene nu uma plai ka karnoprolene mi plai paiye nu e nu fa nukulene nu umapinkongkom mi e God.
4 Nu ee as nupone ka wolanumaro nale fa karnekrinampolene mi ka noprone mi fafaile ka nouw ninanine noula e nu flili e isi.
Mi namo,
fa yekriyampoleye nu ka yeinyensoye nu uma wolapuna ka fa fi saimoye nu se nu ee sam bilip God ka nangke ompla isi God yaleye nu fa ee nangke.
5 Ka,
mi nomu e mi kero e ki kane pone namo sa nanrona,
pone ee sam wolapalepe nu umpinuma plai.
E nale namo nro sa fa yemeiye wolapuna e mana fina e wolaye wone ka fa fi yangkeye nale fafaile,
ka wu won namale nanrona,
wu fa yangke nale uporo nama e God,
wu fa sam wolapeni wamo yire fa e sam bilipye Krais Yesus wokera nro.
6 Nu plai e nupone rokoi uporo pu le nam sa ke nupunene rokoi e fa noprolene mi fafaile e ommo fafaile e mi e nomu onnele.
7 Nu uma namo fa sam wola nire ee naine yukaile nu tikse e lo oi isi God yaneye Moses.
Ka nu ke fi namalene mi nomu e none e noprolene.
Nu fa neri kerone mi e none ka nire nu nro sa fa sam namalene mi namo.
Ka nu san ke fi sam namalene mi nomu e none e noprolene.
8 Mone sa e namale nanrona le mone manpalome lo yangkeye ompla e Godni,
sa e uporo wamo.
9 Mone e namale nanrona ommo e lo namo,
God an e fi yina lo fa ee kotimye nu uma e fa nupunene nale uporo.
Onnele.
Ka,
rokoi e loni,
sa fa saimoroye nale e nu uma e fa fi nupenene lo.
Ka nu uma e fa wewelane ka aikongkelene,
ka nu uma e fa fi sam nupenene nale uporone nama e God.
Lo namo,
sa fa kotimne nu uma e fa nangke nale fafaile,
ka nu uma e fa nupenene ommo e pike nam nro ka fa fi nupenene nale e God wolaye.
Ka rokoi wongke e lo sa won fa kotimne nu uma e fa nufrone none mokanangkapi ka nu uma plai riline.
10 Ka fa kotimne nu umpinuma e fa nangke pamuk ka nu uma mana e fa nemnangkle none kore.
Ka nu uma e fa pekinuꞌpune uma ka nenrune nu ka uma plai nuꞌpune ka nirale nu nainene mana fa karnangklene ompla fa ee nangkene ompla e noneni,
nu uma namo sa lo fa kotimne nu.
Ka nu uma e fa karnirene mi e nu fa nirene mi alwone riri.
Ka nu uma e fa fi nangkene ompla yukaine e none e fa nukane mi nire fa ee nangke.
Ka nu uma e fa nangklene ommo plai ka nukune none nanrona nu sa e fa sam wolane mi uporo e God yukaine mi e mone e fa moproleme namo.
11 Mi uporo nam,
yire mi uporo alele nanrona,
God e mone namo yuna kero woneni ka yuna ali wamo.
Wu yaure ki ka yane ki mi nam fa ki ee kopro.
God namo yuna noula wamo ka wu sa nomu e nale e fa ainemne.
Pol yire tenkyu God oi wolayureye wone
12 Ki kaꞌne tenkyu Krais Yesus Manwamo e mone,
e yake ki kero ka wu sa e namale ki fa ee keri kero ka ee mewke ommo e wu.
Nanrona fane wu e yaure ki fa ee kangkleke ommo namo.
13 Oi isi,
ki sa mana e fa ouwkireke ka kenrekorike Manwamo ka kangkeke fafaile nu uma wunini.
Ka ki won mana fa kangkleke nale fafaile wamo ka usukufro kekrike nu umpinuma e bilipne.
Ka wu ke sam wolayure ki,
e fika,
ki on e fa kangkeke ompla namo,
ka ki e fi namale wu fane ki fi bilipim wu.
14 Manwamo e mone Krais Yesus namo e wolapalo ki wamo fane yangke ki bilip wone ka wu yereri wolapuna e ki fa ki ee sam wolake nu plai.
15 Mi nam ki e kireli pone,
sa mi alwone,
mone e awaili mem ka bilipim.
Krais Yesus wu isi yolo pike nam fa e yuꞌpu kore nu umpinuma e fa nangkene ommo fafaile.
Ka ki plau won wongke e nu uma fa kangkeke ompla fafaile namo,
ka ki kone nro sa sam fafaile wamo rikepone nu plai e fa nangkene ommo fafaile namo.
16 Ka,
yene ee yuru nanrona ki nro sa mana won sam fafaile wamo fane Krais Yesus wolapalo ki.
Ka ompla namo sa won yukule nu umpinuma awaili ke namale nanrona wu sa fa wolapuna neniye,
ka wolapuna neni e wu namo fa fi forpaiye nu uma e nangkene ompla fafaile nama e woneni.
La e nu nurune ommo namo oi isi wu yangkeye namo e wu wolayureye ki wamo e fika ki mana e sam fafaile wamo ki fa kaiki ririyike nale e nale fafaile namo.
Ommo namo nangke nu namale ka nu sam bilipim wu ka nem laip e fa ee ingke yeyekei.
17 Ki sam wola ke mone awaili umpinuma e as mereri noula e God ka mane noula wamo wu naminrele ingke ka yekei yekei.
E fika wu nro sa God.
Ka King e mone fa fi murume wu nama e moneni.
Ka wu sa e fi ri,
wu e waiye nanrona yekei.
Won alwone.
Timoti ee as yeri kero fa ee yeinangkruye rokoi e nale fafaile ee fi nemei
18 Auna kinini Timoti,
ki naye koproke fa ee kero kane yene e ompla e ki kane yene fa ee yangke,
se yene ee resukru ee wola rufuye mi profet oi nu nirenine yene isi,
yene resukru fane yeri kero yangke ompla e fa nufune mi uporo e mi e God.
Ka e nu uma nekrinune mi e yene,
yene ee yeri keroye mi alwone yukaine e nu iimuma fa neri ka sam nopu kerone iim.
19 E yene yeri kero,
ka namale Yesus sa yene e namale nanrona yene sa uporo nama e God.
Uma plai sa e namalene nanrona nu oi fa nangklene ommo plai fafaile,
ka fa fi niꞌnane God pai ririyiye none fa e yukuleye none rokoi uporo ee nupunene.
Nanrona fane nu fa nangkene bilip e none fa fafaileye ee yukaineye sip wongke e pai ka pariyane rip ka piprikare.
20 Mana plainrane e nu uma e fa nangkene nale namo nanrona,
sa Himeneus yane Aleksanda.
Ki kiꞌna mana plainrane namo painri mew e Satana fa wuyane ee namale nanrona wuyane sa e fi ouwnire kore God.