Piparola wongke
Jon yeꞌre
1
Ki ilamana empo sios empo God,
keꞌre piparola mee paiyi yene.
Piparola mee paiyi yene pin namo.
Yene pina God empo yina yene pu waiye uma woneni yakle kongkom mingklari yeneni namo.
Mone mingklari namale mi alwone empo God pu.
Ka empo nomu namo nro,
ki wolake pone wamo.
Ka ki kire kirepi pone nanrona,
seke ki nro fai wolake pone wamo.
Uma mingklari empo namale mi alwone empo God,
samo wolnale pone wamo.
2 Nomu empo mu fai samo wolame pone namo,
sa nanrona,
mi alwone empo God waiye kelo mone pu ka wu ese waiye plau mone nanrona nanrona.
3 Aina God yane Jisas Krais,
Auna empo Aina God namo,
ese wolyane ka samo wolpaloye mone ka yane wolpuna raulo mone.
Empo fika,
ommo namo mone ese mem noloni Aina God ka Auna wunini empo mi alwone empo God ka nale empo fai samo wolnane nu plai sa naine kelo laip moneni.
Mone ese mupene nale empo fai samo wolmale nu plai
4 Ki aikem wamo,
empo fika ki kulu nanrona kongkom plai yeneni namo empo nupene mi alwone yukaine empo Aina yire mone ese mupene.
5 Pin,
piparola mee empo ki keꞌre paiyi yene namo,
ki kuna mi pone ese pupene.
Ki fei koplo lo keklepe wongke kore.
Sa onne!
Mi mee,
sa mi empo lo mone isi mem pu.
Nanrona fane ki kali pone ese pupene lo namo,
sa mone ese samo wolmale mone kore.
6 Nale empo fai samo wolnane nu plai namo,
sa nanrona mone ese samo maime wolwokera ka samo mupene lo empo God.
Lo wunini namo,
pone isi pem pu.
Ka lo namo sa yire nanrona:
Pone ese pupene nale empo fai samo wolnaline nu plai.
Mone ese muna kelo mi empo Krais
7 Uma mingklari fai kalnaniline namo naine pu naimele wona naraine pike mee.
Nu uma namo fei noplo mi alele nanrona Jisas Krais isi yolowi pike yukaine manale.
Nu uma namo fai kalnaniline,
sa fai naine yukaile nu iim empo Krais.
8 Pone poo!
La empo pone pupone mi empo Krais,
ka ompla uporo namo mone isi amparpunume namo,
ese yupone pone.
Pone ese samo peli kelo ese pone pem ommo uporo mingklari namo God ese yali pone.
9 La empo mana yupone mi empo Krais ka yulpaiyi yoplo mi wongkeni mi empo Krais namo,
God fei yem koii ka waiye monre empo laip empo mana namo.
La empo mana yuna kelo mi empo Krais,
sa Aina yane Auna nem koii ka naine monre empo laip wunini.
10 Nanrona fane,
la empo mana wongke yolowi pone yire yukule pone mi empo God,
ka wu fei yuna mi namo yolowi,
sa pone ese fei pire kaire uporo poneni paiyi wu ka re,
pone ese fei pouw wu paiyi mow poneni sa nenrape.
11 Mana empo yire kaire uporo ka yemei foli empo mana namo ka yangke nale uporo wu namo,
wu waiye plau mana namo empo ommo fafaile wunini.
Ilamana empo sios yire paiyi yulu nu
12 Ki kuna mi mingklari naiyeye kire koplo pone.
Ka ki kum fei keꞌre mi namo niye piparola mee.
Ki wola kire koloki nanrona ka kulu pone ka memmoku ka memmulu mone ungklama ka moplo mi namo.
Ka namo sa ese yangke mone mingklari aimem wamo.
13 Kongkom empo yene pinmela God isi yem wu woneni namo,
nawane kaire uporo yene.