Nyjeeri Fɔŋgɔ Na Tra Fɔŋgɔ
21
Ndaa nyjeeri fɔŋgɔ na tra fɔŋgɔ nya. Na nyjeeri jle wo kre, na tra jle wo kre, na epo n wa na.
2 A ndaa chia cheche kre, Jerusalem fɔŋgɔ kre nya, na ki yiri nyjeeri Nyiɛkpɔɔ pan na paan, a pe ki san na bijɔ pe san wra shie u plɔ pan.
3 A ndaa mana kpɔɔ ka loo a kra yili Nyiɛkpɔɔ ŋujɔɔn kre lawee mbo, “E le, Nyiɛkpɔɔ tnihaa kre wa leele nu, a wre na pre we chaa mbe tni, mbe pe pe u leele, mbe u pe pe Nyiɛkpɔɔ. Nyiɛkpɔɔ wre titi we tni na pe ni.
4 Wre we pe yotunyi tlu pe nyiɛlɛ. Kumu n wa bawa, a foorolie na nyɛnɛɛ, ndee yira n wa wa. Ŋgi na hin? Yirɛ lɛɛlɛ yire n wa na.”
Chichie Pefɛɛnlɛ Na Sisam Pefɛɛnlɛ
5 A ŋmba wraa wa mu tni ŋujɔɔn kre na wre na kna mbo, “E le, ni yirɛ kro gbeele fɔŋgɔ.” Mna kna mu yo na mbo, “Kee nyjɛ nyunɔ. Ŋgi na hin? Yire kee nyjɛ pe shɔnlie, na kpra kee.”
6 A wra kna mna yo ni pan mbo,
“Ni ki pe mu kɔ!
Mi wi Jlo, a mi wi Haŋu wre,
yɛklo na kotɔŋu wre.
Ŋmba gbɔɔ ta kre,
mbe u ŋga blo nyumu,
ŋga ki pe ŋmaa nyumu kre ka,
mbe u gbɔ finfin.
7 A ŋmba we wi mbe yili kpan,
we krɔ yirɛ ta,
a mbe pe ufun Nyiɛkpɔɔ,
mbe ufun pe ni pɔ.
8 La, mblɛ pe n gbun ni, na mblɛ pe n shɔnli,
na mblɛ pe nyjɛ yi n fna pini kre,
linkufɛɛnlɛ, na tiɛrifɛɛnlɛ,
na tuwewafɛɛnlɛ, na sɛɛn sumifɛɛnlɛ, na kafinɛfɛɛnlɛ kro,
pie pre leele mblɛ wa kanhun tapla ŋga ki shio,
na pua tuwe chaara ni kre nu,
kre yi kumu shiinwo kre.”
Jerusalem Fɔŋgɔ Kre
9 Nyjeeri bitumblɔ kɔɔnashin pre pra kotie kɔɔnashin nyjɛ nu kanyana nununu kɔɔnashin hɛnyi yire na nyi kre yii kre nunu na pan mna yo ni pan mbo, “Pan mbe ni mu nyina bijɔ wre, Mbɔɔpɔ wre bijɔ wre.”
10 Titɛɛ kre nu, a Kpra Ŋumu wre na pan ni nu, a bituŋu wre na ni wru mna sɛ nyua kpɔɔ gedeŋge ka ndra na. Bawa wra ni nyina Jerusalem kakpɔɔ cheche kre, na ki yiri nyjeeri Nyiɛkpɔɔ pan, na paan tra.
11 A Nyiɛkpɔɔ yɛnyiŋge na tia kraa chiɛnri. Chia kre naa chiɛnri na dnɛ chichie titi yi. Mna pe na dnɛ ka yi, pe ki yeeri jasper, a kraa nyaa na dwanle yi.
12 Pra mboo gedeŋge ka faanri, mu chia kre fɛ mu kun, a ki jlonwee naa kɛmbɔshiin, a nyjeeri bitumblɔ kɛmbɔshiin yire yi nyu yire na, na yi sri. Pra Israel sele kɛmbɔshiin yire mɛɛ nyunɔ jlonwee nyu yire kro na nununu.
13 Jlonwee yire, pra yi wɔ chia kre kokoe jijirɛ na, taarɛ naa wa na le yilafinhaa, a taarɛɛ wa yila tohaa, a taarɛ naa wa nyjeeri haa, a taarɛ naa wa tapan haa.
14 Chia kre mboo ŋga pra faanri kre, pra ki nɔɔ le mu taa dnɛ kɛmbɔshiin na, yire dnɛ yire na pra Mbɔɔpɔ wre bitumblɔ kɛmbɔshiin pre mɛɛ nyunɔ.
Chia Kre Krahaa
15 Bituŋu ŋmba wra paara ni pan kre na swanyiɛ kaan ŋga ni pe yirɛ kra yii kɛɛ, ŋga ni wraa paan mbe chia kre jlonwee, na ki mboo ŋga pe faanri mu ki fɛ mu kun kre kra.
16 Chia kre titnɔmu, na ki valam kro na yila, ki jenu jijirɛ yire kro na yila. A bituŋu wre na u kra kaan kre tɛɛ mna chia kre kra, a ki titnɔmu na ki valam na ki gedem kro na pe kɔnsni kagbeŋge na lafɛɛ kunɔ.
17 Bituŋu wre na mboo kre kra, a kre gedem na pe sɔɔlɛɛ fuloe taarɛ, na mu ki wru imi na praa yira kra na.
18 Dnɛ chiɛnri wee nyjɛ pe yeeri jasper yire yɛ ni pra tɛɛ mu mboo kre faanri, a swanyiɛ titi ni pra tɛɛ mna chia kre sin, a kraa nyaa chasi na dwanle yi.
19 Dnɛ chichiele nyini nyini ni pra tɛɛ mu mboo kre nɔɔ le. Dnɛ jlewo kre, praa ki yeeri jasper, a kraa chiɛnri. A shiinwo kre na pe na mbruku yi, praa ki yeeri sapphire, a taarɛwo na pe dnɛ chaarachaara, pra ki yeeri chalcedony, a jijirɛwo kre praa ki yeeri emerald.
20 Ki ŋga kra taa kunɔwo kre, pe ki yeeri sardonyx, a kɔɔnanuwo kre, praa ki yeeri carnelian, a kɔɔnashinwo kre na pe na ŋgonyina yi, praa ki yeeri chrysolite. Kɔɔnatarɛwo kre, praa ki yeeri beryl, a kɔɔnanyjirɛwo kre, praa ki yeeri Topaz. Kɛ wo kre, praa ki yeeri chrysoprase, a kɛmbɔnunu wo kre, praa ki yeeri jacinth, a kɛmbɔshiinwo kre, praa ki yeeri amethyst.
21 Chia kre salegu kɛmbɔshiin yire, dnɛ chichiele kɛmbɔshiin pra tɛɛ mna yi pe. Pe dnɛ yire yeeri pearl. Salegu nunu na ki dnɛ yi. A swa nyiɛ ni pra tɛɛ mu chia kre lete pe, a kra nyaa yem, na dwanle yi.
22 Ni nsra Nyiɛkpɔɔ Suminyuŋgo nya chia kre na. Ŋgi na hin? O Tafun Nyiɛkpɔɔ wre, jaŋga kro Tafun wre, na Mbɔɔpɔ wre, pee wa lawee kro nu, a pra u sumi.
23 Chia kre n yila shian, a yefiŋge n shian wa. Ŋgi na hin? Nyiɛkpɔɔ yɛnyiŋge kre tia chia kre na nyaa chasi. A Mbɔɔpɔ wre pe ki kania.
24 Waŋgra kro leele we nyaari kania kre na, mbe ŋulo mblɛ pee wa tra na kro, pan na pe swa yirɛ ni ki na.
25 Nyjila kro nu, chia kre salegu yire we nyaa mbe wa, pia yi tɔ fio. Ŋgi na hin? Blee wa wɔ wa,
26 Pie yire yɛnyiŋge, na kpɔɔmu ni waŋgra kro nu mbe pan chia kre na.
27 La, yira ŋga ki n pe cheche ka wa le chia kre na, a lewo ŋmba u nyifɛɛrɛ kee pini, na kafinɛfɛɛnlɛ wa le ki na. Fɔ mblɛ mɛɛ pe nyunɔ Mbɔɔpɔ wre ŋmaa hlɛ kre nu pre chiin bɔkɔ.