Ŋmaa Lɔɔ Na Ŋmaa Tiŋge
22
Nyjeeri bituŋu wre na ndru mna sɛ ni nyina lɔɔ ŋga nu ŋmaa nyumu nyi kre, na kii wa na chiɛnri na dwanle yi, mnaa yilii Nyiɛkpɔɔ, na Mbɔɔpɔ wre ŋujɔɔn kre ndoolo,
2 na fuu na tro chia kre lete lalaa. Lɔɔ kre kokoe gbee shiin yire kro na ŋmaa tinyi yire na nyi mu yire yire, na sɛni gbee kɛmbɔshiin yɛlɛ nyu. Tinyi yire we sɛ gbee nunu nyiɛpɔ na, a yi wrɛ ni pe tɛɛ na waŋgra kro leele trai.
3 Yira ŋga Nyiɛkpɔɔ na sun kro wa le chia kre na. La, Nyiɛkpɔɔ na Mbɔɔpɔ wre ŋujɔɔn kre we pe chia kre na, mbe u sumifɛɛnlɛ na u sumi.
4 Pie Nyiɛkpɔɔ yiɛ nya, mbe pe u mɛɛ nyunɔ pe nduweele na.
5 Ble wa wɔ na fio, a kania kee wa leele shian, a yila wa yili wa. O Tafun Nyiɛkpɔɔ titi wi pe kania, mbe pra ŋunumu lii nyjila kro nu.
Yesu Paan Shiinwo
6 A bituŋu wre na kna mu yo ni pan mbo, “Yire kee nyjɛ pe shɔnli kee, na kpra kee, a o Tafun Nyiɛkpɔɔ ŋmba wra u ŋumu le u kee nyanyofɛɛnlɛ nu kre, u u nyjeeri bituŋu tun, mbe u pan mbe u sumifɛɛnlɛ nyina kee nyjɛ yia mu mbe pan kre.”
7 Yesu yo mbo,
“E loo, ni paan fuŋgaami, kia mu, kena ŋmba we wɔnyinakee nyjɛ yii wa hlɛ ŋga nu ŋga shɔ mbe li kre, we dwamu ta.”
8 A mi John, ni yire kee nyjɛ loo mu yi nya, ŋga ndaa yi loo, mna yi nya mu kɔ kre, ndaa kosie kan bituŋu wre wra ni nyina yire kee nyjɛ kre yiɛ mbe u sumi.
9 La, wra kna mna yo ni pan mbo, “Maa pe ma, sumifun wi mi, imi na ŋu na mu wolo Nyiɛkpɔɔ kee nyanyofɛɛnlɛ pre, na mblɛ pe hlɛ ŋga kee shɔ mu li kre sumi kre chɔɔ, pan ni nyi. Kena Nyiɛkpɔɔ sumi.”
10 A wra ndru mna yo ni pan mbo, “Maa shia wɔnyinakee nyjɛ yii wa hlɛ ŋga nu ŋga ndra leele na. Ŋgi na hin? Nyjila kre mbra mna, na yire kee yire we pan.
11 Lewo ŋmba u sisaa pini kre, ufun u kro wra sisaa pini, mbe ŋmba u nɛɛrɛ kee pini kre kro mbra yi pini. A ŋmba u chichie pini kre, u kro mbra chichie pini, mbe lewo ŋmba u pe cheche kro ma.”
12 A Yesu na kna mbo, “Loo, ni paan fuŋgaami, ni paan na ndro kro fɔtɔɔrɔ ni mbe u fɔlɔ tɔ imi na u tnumu nyi.
13 Mi wi Alpha, na Omega. Mi wi Jlo, a mi wi Haŋu. Mi wi yɛklo na kotɔŋu, a mi wi nɔɔhle haa na nyukɔɔrɔ.
14 Mblɛ pe pe dodonyi je kre we dwamu ta, a pre pie kolo ta mbe ŋmaa tiŋge kre sɛŋgɛ ta mbe li, mbe nyaari chia kre jlonwee nyu na mbe le chia kre lam.
15 La, leesaala, na chlɛfɛɛnlɛ, na tiɛrifɛɛnlɛ, na linkufɛɛnlɛ, na mblɛ pe sɛɛnlɛ sumi, na mblɛ pe kala fnɛ pe paaraa na pe kepele nu kre, chia kre mbookrɔ pie kro.
16 Mi Yesu ni nyjeeri bituŋu tun mbe u paan yire kee nyjɛ kpali sumifɛɛnlɛ pre pan. David nana wi mi, mi wi nyisee nyu wɔlɔ ŋga ki nyaa chiriri.”
17 Nyiɛkpɔɔ Ŋumu, na Mbɔɔpɔ wre bijɔ wre yo na, “Pan.” A e ti ŋmba we kee ŋga loo kpan kre yo na, “Pan.” A ŋmba gbɔɔ ta, na ŋmba u chaa kre, u pan u ŋmaa nyumu kre shɔ finfin.
Hlɛ Kre Nyukɔɔrɔ
18 Ni e jaari, yire mblɛ e wɔnyinakee nyjɛ yii wa hlɛ ŋga nu ŋga loo kre kro. Ŋmba we ka ya kee yire na kre, Nyiɛkpɔɔ we ti mbe kanyana nyjɛ yii wa hlɛ ŋga nu kre ufun nya.
19 A na ndro waa nyanyo kee nyjɛ ka wɔ mu yili hlɛ ŋga nu kre, ufun wohaa ŋga we ta mbe yili ŋmaa tiŋge kre sɛŋgɛ nu kre, Nyiɛkpɔɔ we ki shɔ u pan. A ufun tnihaa ŋga kii wa chia cheche ŋga kee pe nyina hlɛ ŋga nu kre, we yili u kɛɛ.
20 Ŋmba u yire kee nyjɛ dansiɛrɛ lii kre yo mbo, “Kpra yi, ni paan fuŋgaami.”
Ami. O Tafun Yesu pan.
21 O Tafun Yesu dwamu kre ki pan Nyiɛkpɔɔ leele kro na. Amin.