Pe Sutna Wre Wa Wee
20
Ndaa ndru mna bituŋu wa nya, na u yiri nyjeeri na tri tra, mna wee ŋga ki n nyukɔɔrɔ ni kre safwa, na jlɔnyi snamu yɛ yii kɛɛ.
2 A wra wɔɔ kpɔɔ wre wraa wa fa kre, Sutna wre, wra u yii, mna u pɔ mbe sɛ su yɛlɛ kagbeŋge nyu na.
3 A wra u wa wee jiom kre nu, mna ki nyu tɔ, mna ki nyu kre yii na yira ni, mbe wa kolo ta mbe waŋgra leele fana na, mbe sɛ su na yɛlɛ kagbeŋge kre nyu we to. Na yɛlɛ yire nyu waa to, pie u saan mbe wa nyjila chiɛri na.
Kunnyiɛ Jle
4 Ndaa ndru mna ŋujɔɛn yɛ nya, na leele mblɛ pee wa mu tni tni yi na kre, na pe pe ŋga jaŋga mbe pe kpra kun. Ndaa mblɛ praa Yesu dansiɛrɛ lii, na Nyiɛkpɔɔ ketaan kre yuu, a pra pe gbo kre krɛrɛ nya. Na mblɛ pe n na yurɔ wre, na u sɛɛn kre sumi, a ki tia yurɔ wre tnɔmu n wa pe nduweele na, ndee pe kɛnyi na kre, ndaa pe kro nya, na pe nyi peii, a pre na Kristo wre naa ŋunumu lii mbe sɛ su yɛlɛ kagbeŋge nyu na.
5 A leele hamblɛ mblɛ pra ku kre nsra nyi mna sɛ su nyjila ŋga nu yɛlɛ kagbeŋge kre nyu na to. Kunnyiɛ ŋga ki yiɛklu yi kre.
6 Mblɛ pie nyi kunnyiɛ jle wo kre nu kre wo yi dwamu na cheche. Kumu shiin wo kre wa jaŋga ta pe na. La, pie pe Nyiɛkpɔɔ na Kristo wre sɔfue. Mbe pre na Kristo wre chaa mbe ŋunumu li yɛlɛ kagbeŋge.
Sutna Wre Klaa Haŋa
7 A na yɛlɛ kagbeŋge nyjɛ nyu waa to kre, pie Sutna wre saan, mbe u wɔ mbe yili wee kre nu,
8 mbe u pan mbe waŋgra leele fana na, mbe sɛ su waŋgra kokoe jijirɛ yire kro na, yire yi Gog na Magog. Sutna we pe kro ble mbe sɛ na pe ni ŋunɔ. Pe nɛɛmu we pe na lɔɔ nyu tanyiɛ yi.a
9 A pra nyina mu tra yiɛ tɔ, mu Nyiɛkpɔɔ leele pre tnihɛɛ, na u chia ŋga u kori kre kun mu le lalaa. La, kanhun na yiri nyjeeri mu pe sro peii.
10 A Sutna ŋmba wra pe fana kre, pra wre yii mna sɛ le kanhun tapla ŋga nu pua tuwe chaa na nyini kre nu, mna pra yurɔ wre, na kafinɛ Nyiɛkpɔɔ kee nyanyofun wre yii mna sɛ le kre. A pie kala nya wa lafo na ble nyjila kro nu.
Kprakuɔn Haŋa
11 Ndaa ŋujɔɔn fiŋge badaaŋga ka nya, na ndro waa wa mu tni ki na. A tra na nyjeeri na fɛ mu fun u yiɛ, Lawee nsraa wa yi pan mbe yi sɛ.
12 A ndaa mblɛ pe ku mu nyi kre nya, lekpɔɛ, na pe fiɛnfiɛn kro, a praa wa mu yire ŋujɔɔn kre yiɛ. A pra hlɛ nyaa nyaa mu tɛɛ. A pra hlɛ fɔŋgɔ ka nyaa, kre na pe ŋmaa hlɛ, a ŋmba wraa wa mu tni ŋujɔɔn kre na kre na mblɛ pe ku mu nyi kre kepelee tɔɔnri hlɛ yire nu, mna pe kpra kun.
13 Leele mblɛ lɔɔ na li kre, kra pe wɔ mu pan, kumu, na kuulo ndoo na ki gboolo kro wɔ mu ŋga. A pra pe kro kpra kun kepelee nyjɛ pra pe na.
14 Pra kumu, na kuulo ndoo wa kanhun tapla kre nu. Kumu shiinwo kre yi kanhun tapla kre.
15 A ŋmba mɛɛ pe nsra nya ŋmaa hlɛ kre nu kre, pra u wa kanhun tapla kre nu.