Nyjeeri Wolo Yɛshɔɔrɔ
19
Nyjɛ kɔkro kre ndaa yira ka tiŋge loo nyjeeri na lenɛɛrɛ maalɛɛ yi, a yiraa yuu mbo,
“Hallelujah!
Ŋmaashɔmu, na yɛnyiŋge,
na jaŋga kro Tafun wi o Nyiɛkpɔɔ wre.
2 U tamukuɔn pe kpra, mu fraka,
a tɛtiɛrɔɔ kpɔɔ wre u u tiɛrɛɛ tɛɛ mu tra kla kre,
u u gbun pimi ni.
Nyiɛkpɔɔ u ndie tini
ŋga u u sumifɛɛnlɛ gbo kre ndra na.”
3 Leele pre mana na ndru mu yili shiinwo na mbo,
“Hallelujah!
Chia kre shio,
a ki wree wa mbra shie nyjeeri
nyjila kro nu.”
4 Bawa loplombo fulo na jijirɛ pre, na yurɛ jijirɛ pre na kosie kan, Nyiɛkpɔɔ ŋmba uu wa mu tni ŋujɔɔn na kre yiɛ, na yuu mbo,
“Amin. Hallelujah!”
5 A mana ka na yili Nyiɛkpɔɔ ŋujɔɔn kre lawee mbo,
“Nyiɛkpɔɔ sumifɛɛnlɛ,
e o Nyiɛkpɔɔ wre ŋga mɛɛ,
yire mblɛ e u fiɛ kre kro,
leele fiɛnfiɛn, na lekpɔɛ kro.”
Mbɔɔpɔ Wre Bijam Pee
6 Ndaa yira ka tiŋge loo, a kra pe na lenɛɛrɛ mana yi. Na ki tini na chɔlɔjuu yi. Mnaa tini na nyiɛtwanraa yi badaaŋga. A ndaa loo na pe paara kpɔɔ mbo,
“Hallelujah!
Ŋgi na hin?
O Tafun jaŋgafun Nyiɛkpɔɔ wre wi ŋunu.
7 E ti mbe o yiɛshɔ kpɔɔ,
mbe o na u kaan yɛnyiŋge.
Ŋgi na hin? Fuŋga Mbɔɔpɔ wre bijam nyjila kre da.
A u bijɔ wre uyɛ kna.
8 Pe bijɔ wre ŋga kolo
na u mbɔfiŋge ŋga ki chiɛnri
mu pe cheche tɔ,
mbɔfiŋge kre ki Nyiɛkpɔɔ leele
mblɛ pe fraka pre kepele nyina.”
9 Bituŋu wre na kna mu yo ni pan mbo, “Kee nyjɛ nyunɔ, mblɛ pie yeeri, mbe pe paan Mbɔɔpɔ wre bijam sro kre li wo yi dwamu.” A bituŋu wre na kna mna yo ni pan mbo, “Nyiɛkpɔɔ titi nyu kayooro yi kre.”
10 Ŋga ndaa ki loo ma kre, a ndaa kosie kan bituŋu wre yiɛ mbra u sumi, a wra kna mbo, “Maa pe ma, sumifun wi mi. Imi ŋu na mu wolo pre sumi, mu Yesu kpra kee kre yii kɛ shiin kre chɔɔ, pan ni nyi. Kena kosie kan Nyiɛkpɔɔ yiɛ. Yesu kee yire chɔɔ Kpra Ŋumu wre na wɔ mu Nyiɛkpɔɔ kee nyanyofɛɛnlɛ pre nyina.”
Sofiun Nduufun Wre
11 A ndaa nyjeeri nya na ki nyaa, a ndaa sofiun wa nya. Ŋmba wraa wa mu tni u na kre mɛɛ na yi, Shɔnlifun na Kprafun, a u fraka u kprakuɔn, na u ŋunɔ wiire nu.
12 U nyiɛlɛ naa chiɛnri na kanhun yi, a wra ŋujuulee tataara juule. A pra mɛɛ ka nyunɔ u na, ndro nsraa wa mu ki chin, fɔna wre chiin bɔkɔ.
13 Wra dodoŋgi titnɔŋɔ ŋga pe le nyimi nu le. A u mɛɛ ŋga na pe u yeeri yi “Nyiɛkpɔɔ Kee.”
14 A ŋunɔ wifɛɛnlɛ mblɛ pee wa nyjeeri na taa u kro, mu nduu soolo fimble na, mna dodonyi finyi prupru le le.
15 Brɔfiɛn yiɛ shiin nyutaan ka naa yilii u nyuu. Kre ni we tɛɛ mbe waŋgra leele kla. Mbe tɔɔnrɔ fwa tɛɛ mbe pe pɔɔri Wre we pan na Nyiɛkpɔɔ jaŋgafun wre krɔkuɔn kpɔɔ kre ni, mbe Simi kre yuwi ki fɛɛri ndoo.a
16 Pra mɛɛ ka nyunɔ u dodoŋgi kre, na u jesiŋge na mbo,
“Ŋulo Kro Kro Ŋunu,
na Tafɛɛnlɛ Kro Tafun.”
Sofiun Nduufun Wre Jaŋga
17 Ndaa nyjeeri bituŋu wa nya na uu wa mu yire yila na, na paara badaaŋga na hanyiɛlɛ mblɛ pe tro nyiɛ babaari kro yeeri mbo, “E pan e fni titɛɛ e Nyiɛkpɔɔ sro kpɔɔ kre li.
18 E pan e fni e ŋulo, na sojae loplombo, na sojae, na soolo na pe nduufɛɛnlɛ, na leele mblɛ e chin ŋga kro, tinlɛ, mblɛ pe n pe tinlɛ, na lekpɔɛ, na pe bɛɛlɛ kro, e pan e pe wejikaara li.”b
19 Bawa ndaa yurɔ wre, na ŋulo mblɛ pee wa tra na kre, na pe ŋunɔwifɛɛnlɛ nya, na pe pan mu fni titɛɛ mbe ŋunɔ wi na sofiun nduufun wre na u ŋunɔwifɛɛnlɛ ni.
20 Pra yurɔ wre na kafinɛ Nyiɛkpɔɔ kee nyanyofun wre wraa dobodobo woni yurɔ wre yiɛ na kre yii. Wre wra yire u dobodobo yire na, mna mblɛ yurɔ wre tnɔ, a praa u sɛɛn kre sumi pre fana. Yurɔ wre, na kafinɛ kee nyanyofun wre, pra pe yii le wolo mna sɛ le kanhun tapla ŋga nu pua tuwe nyi, na nyini kre nu.
21 Sofiun nduufun wre, na brɔfiɛn yiɛ shiin ŋga kraa yilii u nyuu kre tɛɛ mna leele hamblɛ pre gbo peii, a hanyiɛlɛ pre na pe li mu yɔɔ.