Babylon Ndie Tiniɛ
18
Kee nyjɛ kɔkro ni, ndaa nyjeeri bituŋu wa nya na, na u yire nyjeeri na tri tra. Wre bituŋu wre jaŋga na kpɔɔ, a u yɛnyiŋge na tia lawee na fniŋge, na nyaa chasi.
2 A bituŋu wre na paara na jaŋga ni mbo,
“Ki ja, chia kre ja,
Babylon chia kpɔɔ kre, ki ja.
Ki kaari ŋumufuɛn tnihaa.
Ŋumufuɛn nyini kro,
na hanyiɛlɛ sisɛɛ mblɛ mu chin ŋga kro,
bawa pe nyi.
3 Babylon tiɛrɛɛ kre pe na simi sisaa,
ŋga waŋgra leele kro gbɔ mu to yi.
Mu tia waŋgra ŋulo kro tiɛri na u ni.
A waŋgra yaolifɛɛnlɛ yire u yirɛ chichiele tataara na,
mu kaari swafɛɛnlɛ.”
4 A ndaa mana fɔŋgɔ ka loo nyjeeri na mbo,
“Ni leele, e yili u nu e pan,
na kre ma, ee u sisam kee yire ka pe,
mbaa kɔɔ u kanyana yire ka nya.
5 Ŋgi na hin? U sisam nɛɛ mu tro.
A u sisam yire krɛrɛ,
Nyiɛkpɔɔ yi sɔɔnri peii.
6 Nyjɛ u taa leele na kre,
pie yi taa u na ka na.
Kanyana nyjɛ u tia leele nya kre,
pie ti u yi nya ma shiin.
U gbɔyira ŋga ni u simi le mu leele ŋga a pe gbɔ kre,
pie simi shelee le ki nyini ma gbee shiin mbe u ŋga.
7 Imi na u uyɛ kaan yɛnyiŋge,
na uyɛ lii kpɔɔ kre ndra na,
u fiŋge mbe u fooro li.
U uyɛ kpɔɔri u loloŋgo nu,
na yuu na ‘Ŋuchlɔ wi mi, a lekuchlɔ ma mi,
kena mba nyɛni mbe fooro li.’
8 Yire kee nyjɛ u yuu ŋga na,
u kanyana kro we chaa mbe pan u na ble nunu.
Kumu, na fooro, na klo we to u na,
a pie u sro na kanhun ni.
Ŋgi na hin? O Tafun Nyiɛkpɔɔ ŋmba we u kpra kun kre,
jaŋga kpɔɔfun wi.”
Babylon Leele Pre Foorolie
9 “Ŋulo mblɛ pee wa waŋgra nu, a pre na wre na tiɛri, mnaa waŋgra yɛshɔɔrɔ lii kre, na chia kre waa na shio, a pia ki wre nya kre, pie nyɛni mbe fooro li.
10 Ki fiɛrɛ we ti mbe pe yire lee mbra u kanyana kre le, mbra yuu,
‘Atɛ! Atɛ!
Babylon kakpɔɔ ŋga kraa jaŋga ni kre,
nyjila nunu chom na mu kanyana kro pan mu na.’
11 A waŋgra yaolifɛɛnlɛ we u le mbra nyɛni, mbra fooro lii. Ŋgi na hin? Na ndro n wa mbe pe yirɛ lɔ pe pan na.
12 Pe swa nyiɛ, na pe swa finyi, na pe yonyi chichiele, na tinyi chichiele nyini nyini, na pe yirɛ nyjɛ pe hlo ŋgaala tɛɛ mu pe, na yirɛ nyjɛ pe tinyi chichiele tɛɛ mu tɛ, na nyjɛ pe swa nyiɛ fre tɛɛ mu pe, na nyjɛ pe tɔɔnrɔ na dnɛ chichiele tɛɛ mu pe,
13 na nyjɛ pe tuwe ndiom tɛɛn tɛɛ mu pe, na simi gbɔ wee, na simi liwo, paanu mimi, na shɔlɔ, na nui, na mbaala, soolo na kɛɛ nyjɛ soolo tinii, tinlɛ na leweele kro.
14 Bawa yirɛ prɛfɛɛnlɛ pre we kna mbra yuu u pan mbo, ‘Yirɛ tataara nyjɛ kee mu jawa nyjila kro nu kre, yi kro fun peii. A yirɛ nyjɛ mu ta mu tnimu nu na mu yɛ lii yire kro fun, a maa yi nya na fio.’
15 A yaolifɛɛnlɛ mblɛ pe jafa lii chia kpɔɔ kre na mu kaari swafɛɛnlɛ pre we yire yire haalee mbra le. Ŋgi na hin? Pe u kanyana kre fiɛ. Pie na nyɛni mbra fooro lii,
16 mbra yuu na,
‘Atɛ! Atɛ!
Babylon kakpɔɔ kre, Atɛ!
Babylon ŋmba wraa yirɛ finyi,
na wɔɛ, na nyiɛ chichiele,
na swa nyiɛ yirɛ,
na dnɛ chaarachaara nyjɛ yi chiɛnri teeri na uyɛ sani kre, atɛ!
17 A yire yirɛ chichiele nyjɛ kro fun u pan nyjila nunu chom nu.’
Krɔɛ nyjɛ yi tro epo yiɛ na loplombo, na mblɛ pe jiin yi nu na kolo kuun, na leele mblɛ pe tnumu tuni yi nu, na epo yiɛ yaolifɛɛnlɛ kro we yire haalee,
18 mbra gble leni, na chia kre waa na shio, a pia ki wre nya, ‘Kre kakpɔɔ n wa mbe pe na kre chia kpɔɔ ŋga yi fio.’
19 Pra tablɔ ko mu le ndra, na nyɛni na fooro lii na yuu,
‘Atɛ, Babylon atɛ!
Mu yirɛ ki tia leele mblɛ pee krɔɛ ni epo yiɛ na swa ta,
a mu yirɛ yire kro pe yirɛ waara nyjila nunu chom nu.
20 E mblɛ ee wa nyjeeri,
e ti mbe e yiɛshɔ.
Ŋgi na? Pe kakpɔɔ kre kla.
Nyiɛkpɔɔ leele na bitumblɔ pre,
na Nyiɛkpɔɔ kee nyanyofɛɛnlɛ,
e ti mbe e yiɛ shɔ.
Ŋgi na hin? Nyiɛkpɔɔ Babylon ndie tini,
nyjɛ u pe e na kre ndra na.’”
21 Ndaa nyjeeri bituŋu faŋgafun wa nya, na u dnɛ ka wru. Ki kpɔɔrɔm na da na fifiire tre dnɛ ni, a wra ki wa epo nu, mna kna mbo,
“Pan pie Babylon kakpɔɔ kre viŋge mbe wa,
mbe pia ki nya na fio.
22 A pia saŋgo gbunfɛɛnlɛ,
na mɛkɔmblɔ,
na bnɔ fɔfɛɛnlɛ mana loo ki na na fio.
A pia tnumutunfun wa nya tnumu ka na ki nyini nu na fio.
A pia yirɛ trei tiŋge loo na fio.
23 A pia kaniɛ nya mu na na fio.
A pia bijɔ, ndee bijɔplɔ mana loo mu na na fio.
Mu yaolifɛɛnlɛ pre kaari waŋgra loplombo lawee kro nu,
a mu yire mu kafinɛ dobodobo na,
mu waŋgra kro leele fana.
24 Nyiɛkpɔɔ kee nyanyofɛɛnlɛ, na Nyiɛkpɔɔ leele mblɛ pra gbo kre,
na leele mblɛ pe gbo waŋgra nu kre kro,
pra pe nyimi nya Babylon na.
Ki tia Nyiɛkpɔɔ we u ndie tini kpɔɔ.”