Tɛtiɛrɔɔ Kpɔɔ Wre Ndie Tiniɛ
17
Bitumblɔ kɔɔnashin pre pra kotie kɔɔnashin yire yii pre nunu na pan mna yo ni pan mbo, “Pan mbe ni mu nyina imi sembremu Nyiɛkpɔɔ we tɛtiɛrɔɔ kpɔɔ wre, uu wa mu tni lɔɛ tataara nu wre ndie tini mbe da.
2 Ŋulo mblɛ pee wa tra na kro tiɛri wre tɛtiɛrɔɔ kpɔɔ wre na, a leele mblɛ pee wa tra ŋga nu kro, u sisam simi kre ka gbɔ mu to.”
3 Bawa nyjeeri bituŋu wre na ni bali mu sɛ tablɔ tra kre nu, a ndaa chlɔ wa nya na uu wa mu tni yurɔ nyiɛ wa na. Na jiɛnlɛ mɛɛ bribri pe nyunɔ u na poŋgo. Na u ndrɛɛ kɔɔnashin, a u nyamblɛɛ kɛ.
4 Chlɔ wre na yoŋgo nyiɛ faa, na nyiɛ piipii paari, mna swanyiɛ yirɛ, na dnɛ chaara chaara nyjɛ yiraa chiɛnri tɛɛ mna uyɛ san. Mna swanyiɛ gbɔyira ka yii kɛɛ. Afunyi kee, na u tiɛrɛɛ kee bribri yira ki nyi.
5 Pra ndrandra mɛɛ ka nyunɔ chlɔ wre nduwe na mbo,
“Babylon Kpɔɔ Kre,
Tiɛrifɛɛnlɛ na
Tra Afunyi Kee Lo.”
6 Ndaa chlɔ wre nya na u Nyiɛkpɔɔ leele mblɛ praa Yesu dansiɛrɛ lii pre gbo, mna pe nyimi gbɔ mu to. Ŋga ndaa u nya ma kre, kra ni pe kawako ni.
7 A nyjeeri bituŋu wre na kna mu ni wie mbo, “Ŋgi ki tia kee ŋga mu pe kawako ni ŋga hin? Mbe mu nyina chlɔ wre, na yurɔ ŋmba na u tni, a u ndrɛ kɔɔnashin, a u nyamblɛɛ kɛ kre ndrandra kee.
8 Yurɔ ŋmba mna nya wre naa wa na le fa, la, u n wa fuŋgaami, a kia mu kuraa, we yili wee ŋga ki n nyukɔɔrɔ ni kre nu mbe pan, mbe pe sɛ na u ni u kla ndoo. A leele mblɛ pee wa tra, a pe n pe mɛɛ nyunɔ ŋmaa hlɛ kre nu mu yire waŋgra gbeele nyjila kre, na pe waa yurɔ wre nya, kie pe pe kawako ni, ŋgi na hin? Yurɔ wre naa wa fa, la, u n wa fuŋgaami na, nde uu wa mbe kɔɔ pan na.
9 Kena e yire kee nyjɛ fna mbe kachiŋu yi le chichie, mbe yi nɔɔloo. Yurɔ wre ndrɛ kɔɔnashin yire, yii wa mu yire mu nyuɛ kɔɔnashin nyjɛ na chlɔ wre tni yire ŋga.
10 A yii wa mu yire mu ŋulo kɔɔnashin ŋga na. A ŋulo kɔɔnashin pre, pe kunɔ ŋunumu lie to, a pe nunuu wa na u ŋunumu lii tɛ, a haŋu wre n ta mu pan tun, a na wre waa pan wa mu.
11 Wre yurɔ wre wraa wa fa, a u n wa na kre, wre wi ŋulo pre kɔɔnatarɛwo, la, ŋulo kɔɔnashin pre nu u yili, a pie sɛ na u ni u kla ndoo.
12 A nyamblɛ kɛ yire mna nya yire, ŋulo kɛ lɛ, la, pre n ta mu ŋunumu li tun. La, pie pre, na yurɔ wre ŋga jaŋga mbe pe ŋunumu li nyjila chiɛri.
13 Pre ŋulo kɛ mblɛ jawalaa nunu, a pie pe faŋga, na pe jaŋga kro wru mbe yurɔ wre ŋga.
14 Pre na Mbɔɔpɔ wre we ŋunɔ wi, la, Mbɔɔpɔ wre we pe ja. Ŋgi na hin? Wre wi Tafɛɛnlɛ kro Tafun, na ŋulo kro ŋunu. A mblɛ u yeeri, mu pe wɔ, a pe pe u shɔnlifɛɛnlɛ kpra ni pre we tni u jaara.”
15 A nyjeeri bituŋu wre na kna mu yo ni pan mbo, “lɔɛ nyjɛ mna nya, a chlɔ tɛtiɛrɔɔ wre naa wa mu tni yi na kre, waŋgrɛ, na sele, na yolo kro leele lɛ.
16 A nyamblɛ kɛ yire mna nya, na yurɔ wre ni kre, pie chlɔ tɛtiɛrɔɔ wre le nyibie, mbe yirɛ nyjɛ yii wa u pan kro shɔ, mbe u ti wejiwaara. Pie u kabie ka, mbe u haŋa wa kanhun.
17 Ŋgi na hin? Nyiɛkpɔɔ u pre ŋulo kɛ pre ŋga kre jawala kre, mbe pe kre jawala nunu kre ta, mbe pe jaŋga kro wru mbe yurɔ wre ŋga, mbe sɛ su nyjila ŋga nu kee nyjɛ Nyiɛkpɔɔ yo mu tɛɛ yire kro we tnumu tun.
18 A chlɔ wre mna nya wre, wre wi chia kpɔɔ ŋga ŋunumulie ki waŋgra ŋga ŋulo kro juule kre.”