Kanyana Yire Ŋga Ki Yiɛklu
16
A ndaa mana kpɔɔ ka loo na ki yili Suminyuŋgo wa na yuu bitumblɔ kɔɔnashin pre pan mbo, “E sɛ Nyiɛkpɔɔ krɔkuɔn kotie kɔɔnashin yire kanyana yire kna e wo tra yiɛ na.”
2 A bituŋu ŋmba wra yiɛklu wre na sɛ u kotolo kre kna mna wo tra yiɛ na. A klɛ badɛnyi nyjɛ yi yaa, na pan mu to to leele mblɛ na yurɔ wre tnɔmu na nyi, a praa u sɛɛn kre sumi pre na.
Kotolo Shiinwo Kre Kanyana
3 Bituŋu shiinwo wre na u kanyana kna mna wo epo nu, a ki nyumu na kna nyimi, mna pe na gboo nyimi yi, a yurɛ mblɛ praa wa epo nu kro na ku.
Kotolo Taarɛwo Kre Kanyana
4 Bituŋu taarɛwo wre na u kanyana kna mna le lɔɛ, na bloe nu, a yira kaari nyimi.
5 Bawa ndaa loo na bituŋu ŋmba u lɔɛ le wre yuu mbo,
“Nyiɛkpɔɔ, mu kprakuɔn fraka,
ŋu nunu mu pe cheche,
ŋu muu wa fuŋgaami, a mnaa wa fa.
6 Pre leele mblɛ pra mu sumifɛɛnlɛ,
na mu kee nyanyofɛɛnlɛ nyimi kna mna wo kre,
ki tia mu pe ŋga nyimi mbe pe gbɔ,
ŋgi na hin? Pan pe fna.”
7 A ndaa mana ka loo na ki yili sragbunu kre nu na yuu mbo,
“O Tafun Nyiɛkpɔɔ jaŋgafun,
mu tam, na mu pimi ŋga mu kuun pe kpra,
mu fraka.”
Kotolo Jijirɛwo Kre Kanyana
8 A bituŋu jijirɛwo wre na u kotolo kre kna mu wo yila na, mbe ki wɛɛri mbe leele sro na kanhun yi.
9 Yila kre wrɛŋgɛ na leele sro mu wɛ, a praa Nyiɛkpɔɔ ŋmba uu wa na jaŋga ni kanyana yire na wre suni, pe nsra pe jawala chinɛ mna Nyiɛkpɔɔ ŋga mɛɛ.
Kotolo Kunɔwo Kre Kanyana
10 Bituŋu kunɔwo wre na u kotolo kre kna mu wo yurɔ wre ŋujɔɔn kre na. Titɛɛ kre nu, wɔmu na lawee ŋga nu yurɔ wre ŋunumu lii kre shɔ mu ta.
11 Ki wejiwrɛ sisaa na tia leele naa pe ndile niɔ, na Nyiɛkpɔɔ ŋmba uu wa nyjeeri wre suni, pe klɛ yire yira toto pe na kre ndra na. La, pe nsra pe jawala chinɛ mna laa pe sisam kro.
Kotolo Kɔɔnanuwo Kre Kanyana
12 Bituŋu kɔɔnanuwo wre na u kotolo kre kanyana kna mna le lɔɔ kpɔɔ ŋga pe yeeri Euphrates kre nu. Lɔɔ kre nyumu na kɔ peii, mbe ŋulo mblɛ pie yiri yilafinhaa mbe pan pre jaa tro ki nu.
13 A ndaa ŋumufuɛn taarɛ plɛ nya, a pra pe na kpanhɔɔnlɔ lɛ, na yilii wɔɔ badaaŋga wre, na yurɔ wre, na kafinɛ Nyiɛkpɔɔ kee nyanyofun wre nyuu.
14 Pre lɛ Sutna wre ŋumufuɛn mblɛ pe kawako kee pini kre. Pre ŋumufuɛn taarɛ pre, pre pe shie mbe sɛ tra ŋulo fni, mbe pe paan ŋunɔ wi na Nyiɛkpɔɔ jaŋgafun wre ni u ble kpɔɔ kre nu.
15 “E le, mbe paan e fo na jio wi, a ŋmba we jaa tni mbe shie, mbe u yonyi tɔ chichie, mbe wa tro wejiwaara, mbe nyifɛɛrɛ u gbo leele yiɛ na kre, wre wo yi dwamu.”
16 A ŋumufuɛn pre na pan na ŋulo pre ni mu ble lawee ka nu, pe ki yeeri Armageddon Hebrew yolo nu.
Kotolo Kɔɔnashinwo Kre Kanyana
17 A bituŋu kɔɔnashinwo wre na u kotolo kre kna mna wo fuflɛ na. A mana badaaŋga ka na yili ŋujɔɔn kre kii wa Suminyuŋgo nu wa kre nu mbo, “Ki kɔ.”
18 Titɛɛ kre nu, nyiɛ naa nyini, na tini, na twanri, a tra naa seeri badaaŋga. Mu yire ŋga pe lewo wa, tra n da mu seeri ma tun. Kre ki wɛ yi kro na.
19 Chia kpɔɔ kre na yɔɔlɛ taarɛ, a waŋgrɛ kakpɔɛ yire kro na juari, la, Nyiɛkpɔɔ nsra Babylon chia kpɔɔ kre sisam fɛɛ. Wra tia ki leele na u krɔkuɔn simi kre gbɔ peii.
20 Kuyɔɔsu, na nyuɛ na klɔ yi titɛɛ mna fun.
21 Nyiɛsubie nyjɛ yira sna mbe jaa ndro gbo naa tuuri leele na. A leele pre naa Nyiɛkpɔɔ suni pe kanyana yire praa nyaa yire ndra na. Ŋgi na hin? Kra pe kanyana kpɔɔ mu pe ŋga.