Kanyana Nyininyini
15
Ndaa ndru mna kawako kee kpɔɔ ka nya nyjeeri na, kraa fiɛrɛ ni mu tro. Ndaa nyjeeri bitumblɔ kɔɔnashin nya, a praa paan na kanyana nununu kɔɔnashin ni, yire kɔkro ka wa pan na, na yire kɔ Nyiɛkpɔɔ krɔ kɔɔn kre nyu we to.
Mblɛ Pe Wi Mu Yili Yɛshɔɔrɔ Mɛɛ
2 Bawa ndaa yira ka nya, a kra pe na epo dwanle wo yi, a pe kanhun chaa ki nu, a leele mblɛ yurɔ wre, na u sɛɛn kre nsra ja, a u tnɔmu, na u mɛɛ kre nsraa wa pe na pre, naa wa mu yire ki jaara, mna juru nyjɛ Nyiɛkpɔɔ na pe ŋga yii yii kɛɛ,
3 na Nyiɛkpɔɔ sumifun Moses, na Mbɔɔpɔ wre mɛɛ koni mbo,
“O Tafun Nyiɛkpɔɔ Jaŋgafun,
mu kekpɔɛ pe, a yi pe kawako ni.
Waŋgra kro ŋunu, mu kolo kro fraka,
a mu pe kprafun.
4 O Tafun, ŋmbi uu wa, a wa mu fiɛ hin?
Ndee mbe wa mu mɛɛ kre ŋga yɛnyiŋge hin?
Ŋgi na hin? Ŋu chiin mu pe cheche.
Waŋgrɛ kro we pan mbe mu sumi,
ŋgi na hin? Mu mu frakaa kre wɔ mu nyina.”
Nyiɛkpɔɔ Pan Yi Yiri
5 Kee nyjɛ kɔkro ndaa nyjeeri Suminyuŋgo, ŋga ki pe na yoŋgo nyuŋgo cheche kre yi kre, na pe ki nyu nyaa mu wa.
6 A bitumblɔ kɔɔnashin mblɛ praa paan na kanyana kɔɔnashin yire ni pre na yili wa, mna dodonyi finyi chiɛnri wee yɛ le le, mna swa nyiɛ greree tɛɛ mu grere gbun na.
7 A yurɛ jijirɛ pre nunu na swa nyiɛ kotie kɔɔnashin le le nyjeeri bitumblɔ kɔɔnashin pre kɛɛ, na Nyiɛkpɔɔ ŋmba uu wa nyjila kro nu wre krɔkuɔn yi nyi.
8 Nyiɛkpɔɔ yɛnyiŋge, na u jaŋga kre na tia wree na Suminyuŋgo kre nyi, a ndro nsra mbe le ki nu, mna sɛ su ŋga kanyana kɔɔnashin nyjɛ ni bitumblɔ kɔɔnashin pre na pan yire nyu na to.