Mbɔɔpɔ Wre Wolo 144,000 Pre
14
Ndaa nya na Mbɔɔpɔ wre, na leele kagbenyi lafaa na fuloe shiin na jijirɛ mblɛ nduweele na pe Mbɔɔpɔ wre, na u Lɛ mɛɛ nyunɔ pree wa mu yire Zion nyua kre na.
2 Bawa ndaa mana ka loo nyjeeri wa na ki tini na chɔlɔjuu yi, na tini na nyiɛtwanraa yi badaaŋga. Mana kre naa tini na pe juru tɛɛ na mɛɛ gbuun.
3 Leele kagbenyi lafaa na fuloe shiin na jijirɛ pre naa wa mu yire Nyiɛkpɔɔ ŋujɔɔn kre, na yurɛ jijirɛ, na loplombo fulo na jijirɛ pre yiɛ, na mɛɛ fɔŋgɔ ka koni, ndro nsraa wa mbe jaa kre mɛɛ kre tuan, fɔna pre mblɛ Yesu shɔ mu yili tra kre chiin bɔkɔ.
4 Pre leele pre lɛ mblɛ pe n chiɛlɛ chaara wru mu peyɛ tɔ na nɛɛrɛ ni kre. Ŋgi na, pe n le nɛɛrɛ kee nu. A mna Mbɔɔpɔ wre we sɛ kpan, pre leele mblɛ wa u kro. Pre Nyiɛkpɔɔ lɔ mu yili leweele kro nu, a pe pe u bijloe, mu Nyiɛkpɔɔ, na Mbɔɔpɔ wre ŋga.
5 Pre leele mblɛ, pe nsraa kala fnɛ, a kee sisaa ka n wa pe na, mbe ndro ta mbe yo.
Mana Ŋga Ki Yiɛklu
6 Ndaa ndru mu bituŋu wa nya, na u tro nyiɛ babaari, na blenyini ketaan kre ni, na paan mbe ki yo leele mblɛ pee wa tra, na yolo kro, na waŋgra kro, na sele kro leele pan.
7 A u mana naa yilii mbo, “E Nyiɛkpɔɔ fiɛ, e u ŋga kpɔɔmu. Ŋgi na hin? U nyjila da mbe u paan lewo kro kpra kun. Kena e u sumi, wre u nyjeeri na tra, na epo, na lɔɛ bɛɛlɛ kro wa.”
8 A nyjeeri bituŋu shiinwo na taa jlewo wre kro na yuu mbo, “Babylon ja, chia kpɔɔ ŋga pe yeeri Babylon kre ja. Babylon tia waŋgra leele kro u tiɛrɛɛ kolo kre wru.”
Nyjeeri Bituŋu Taarɛwo
9 A nyjeeri bituŋu taarɛwo na taa, mu mana kpɔɔ tɛɛ na yuu mbo, “Na ndro waa yurɔ wre, na u sɛɛn kre sumi, maa tia yurɔ wre u tnɔ nduwe na, ndee kɛ na kre,
10 ufun we Nyiɛkpɔɔ krɔ kɔɔn ŋga ki pe na simi shelee ŋga nu yaka n chaa, a u ki kna mu le u krɔ kɔɔn gbɔyira nu kre gbɔ. Mblɛ pie yurɔ wre sumi pre kro we kala nya kanhun, na pua tuwe chaara ŋga ki nyini nyjeeri bitumblɔ cheche pre, na Mbɔɔpɔ wre yiɛ kre nu.
11 A kanhun ŋga nu pie kala nya kre, ki wre we na shie nyjeeri nyjila kro nu. Mblɛ pie yurɔ wre, na u sɛɛn kre sumi pre kro, na mblɛ na pie u mɛɛ nyunɔ pre kro, blee o, lafo o, pe n wa na yilihaa ni kanhun kre nu.”
12 Kena kee ŋga ndra na, ki fna mbe Nyiɛkpɔɔ leele pre yɛyie, na frɔ tɛɛ mbra lii u kee kre na, mbe taa Yesu kro kpra ni.
Mana Ŋga Ki Taa Jijirɛwo
13 A ndaa mana ka loo na ki yiri nyjeeri, na yuu ni pan mbo, “Kee ŋga nyunɔ. Mu yire fuŋgaami na shie, mblɛ pie ku o Tafun wre mɛɛ nu pre wo yi dwamu.” A Kpra Ŋumu wre na kna mbo, “Kpra yi, pie sɛ wuo shɔ pe tnumu ŋga pe tun nu. Ŋgi na hin? Pe kee nyjɛ pe pe yire mɛɛ we taa pe kro.”
Lewo Biblɔ Wre Paan
14 Ndaa yiɛ wa mna le, mna tlo fiŋge ka nya, a ndro wa naa wa mu tni ki na, mna pe na Lewo Biblɔ wre wi. A wra swa nyiɛ ŋujuulee juule, a u brɔfiɛn nyutaan ŋga ni u yirɛ kuun naa wa u kɛɛ.a
15 Ndaa ndru mu nyjeeri bituŋu wa nya, na u yili Suminyuŋgo kre nu, mna mana kpɔɔ tɛɛ mu paara ŋmba wraa wa mu tni tlo kre na wre pan mbo, “Yirɛ kun nyjila kre da, kena mu yirɛ kun brɔfiɛn kre wɔ mu yirɛ yire kun. Ŋgi na hin? Yirɛ nyjɛ yii wa tra na kre be.”
16 A ŋmba wraa wa mu tni tlo kre na wre na u yirɛ kun brɔfiɛn kre viŋge tra yiɛ na, mna yirɛ yire kun.
17 Bawa ndaa nyjeeri bituŋu fuŋu wa nya, na u yiri nyjeeri Suminyuŋgo kre nu mbe yili, na yirɛ kun brɔfiɛn ŋga nyu ki tna titii wa u kɛɛ.
18 A ndaa nyjeeri bituŋu fuŋu wa nya, na u yili sragbunu kre nu na paan, na kanhun jaŋga kroo wa u pan. A wra mana kpɔɔ tɛɛ mu paara bituŋu ŋmba kɛɛ yirɛ kun brɔfiɛn taan kre na nyi wre pan mbo, “Mu yirɛ kun brɔfiɛn kre viŋge mu yirɛ sɛnyi yire knumu, ŋgi na hin? Yi be.”
19 A nyjeeri bituŋu wre na u yirɛ kun brɔfiɛn kre viŋge tra yiɛ na, mna yirɛ yire knumu, mna sɛ yi wo lawee ŋga nu pie yi fɛɛri mbe yi yuwi kre nu, kre ki Nyiɛkpɔɔ krɔkuɔn kpɔɔ nyina.
20 Pra yi taanla yi fɛɛri ndoo, chia kre mbookrɔ, mna yi yuwi, a nyimi na yili yi nu mna fo mna da kɔnsni lafɛɛ shiin nyu na, mna pe na lɔɔ yi, a ki jijuom na da jeelee kunɔ.