Yurɔ Ŋmba U Yiɛ Klu
13
Ndaa yurɔ wa nya na u yili epo nu na paan, yurɔ wre ndrɛ naa kɔɔnashin, a u nyamblɛ naa kɛ. U nyamblɛ kɛ yire kro, ŋujuulee naa wa mu juule yi na nununu, a pe jiɛnlɛ mɛɛ ka nyunɔ u ndrɛ yire na.
2 Yurɔ ŋmba ndaa nya kre na pe na kajinyurɔ wi, a u jewrɛ na pe na sisire wi, a u nyu na pe na blɛkpɔɔ wi. A wɔɔ kpɔɔ wre na yurɔ wre ŋga wre titi faŋga, na u ŋunumu, na u jaŋga kro mbe u li.
3 Yurɔ wre ndrɛ yire nunu na pe na kla sisaa tloo wa ki na. Kra waŋgra leele kro pe kawako, a pra taa u kro.
4 Leele pre kro naa wɔɔ kpɔɔ wre sumi, ŋgi na hin? wra yurɔ wre ŋga u jaŋga kro. A pan chɔɔ praa yurɔ wre sumi na yuu mbo, “Ŋmbi u da na yurɔ wre ni, mbe jaa wi na u ni hin?”
5 Pra yurɔ wre ŋga jaŋga, mbe u nyukpɔɔmu, na jiɛnlɛ kee yo mbe sɛ su nyiɛpɔ fuloe shiin na shiin nyu na.
6 Wraa jiɛnlɛ kee yuu na Nyiɛkpɔɔ taanla, na u mɛɛ klai, na paara na u tnihaa kre taanla, hali mblɛ praa wa nyjeeri wa kro, wraa paara na pe taanla.
7 A pra u ŋga kolo mbe u ŋunɔ wi na Nyiɛkpɔɔ leele ni mbe pe ja. Pra u ŋga kolo mbe u jaŋga li leele kro, na yolo kro, na waŋgrɛ kro, na sele kro leele na.
8 Pra Mbɔɔpɔ wre gbo mna chin mu waŋgra ŋga gbeele, kena tra ŋga leele mblɛ mɛɛ pe n shia nya u ŋmaa hlɛ kre nu kro, we yurɔ wre sumi.
9 Kena ŋmba uu ndie ni kre, u ndie tɛɛ u loo.
10 Ŋmba pie na chaa mbe yii mbe sɛ le nyuŋgo kre, fna ki fna pe u le nyuŋgo. Ŋmba pie na chaa mbe gbo brɔfiɛn yiɛshiin ni kre, gboo ki fna pe u gbo brɔfiɛn yiɛshiin ni. Kena ki fna mbe Nyiɛkpɔɔ leele frɔ na shɔnlie ta.
Yurɔ Shiinwo Wre
11 Bawa ndaa yurɔ wa nya na, na u yili tra na paan, yurɔ wre nyamblɛ naa shiin na mbɔɔ pɔ blɔ wi, a u paaraa na pe na wɔɔ kpɔɔ wre wi.
12 Yurɔ ŋmba na tlo sisaa na nyi kre jaŋga ni wra tɛɛ na tnumu tuni. A wra u jaŋga kro tɛɛ mbe ti waŋgra ŋga leele kro yurɔ ŋmba na tlo sisaa na nyi wre sumi.
13 Yurɔ shiin wo wre naa kawako kee pini, hali wra tia kanhun naa yiri nyjeeri na woni tra, a leele naa nyaa.
14 U kawako kee yire wraa pini na yurɔ jlewo wre jaŋga ni kre, kra tia wra ja na leele mblɛ praa wa tra na kro fana. Wra tia pra sɛɛn gbeele yurɔ ŋmba na kla tlo sisaa na nyi, a uu wa na le tɛ kre pan.
Yurɔ Wre Sumifɛɛnlɛ
15 Pra u ŋga jaŋga a wra ŋu mu le sɛɛn kre pra gbeele yurɔ jlewo wre mɛɛ na kre nu, mbe ki ja mbra paara, mbe ja mbe mblɛ pia sɛɛn kre sumi kre kro gbo.
16 Sɛɛn kre jaŋga ni praa leele fiɛnfiɛn, na lekpɔɛ, na swafɛɛnlɛ, na shianfɛɛnlɛ, na tinlɛ, na lebiile kro tnɔ pe kalie kɛnyi, na pe nduweele na.
17 Na ki pan ma kre, ndro wa jaa yaka lɔ, ndee mbe prɛ, fɔna mblɛ na yurɔ wre mɛɛ, ndee u tnɔmu nyi kre chiin bɔkɔ.
18 Kena ki fna mbe leele kala chin, ŋmba u kala chin kre we ja mbe kre tnɔmu kre tɛɛ mbe yurɔ wre chin, na kre tnɔmu ŋga yire mu ndro mɛɛ ŋga. Tnɔmu kre yi kɔɔnanunu taarɛ, 666.