Chlɔ Wre Na Wɔɔ Wre
12
Bawa kawako kee ka na pe nyiɛ yiɛ na. Ndaa nya na chlɔ wa yila paari na yoŋgo yi, a ki pe na nyiɛpɔ na u nyi mu yire, a wɔɛlɛɛ nununu kɛmbɔshiin pe na juulee yi u ndra na.
2 Na chlɔ wre chaa mbe se, a selɛɛ na u yaa wra nyɛni.
Wɔɔ Kpɔɔ Wre
3 Kawako kee ka na pe nyiɛ yiɛ na na. Ndaa wɔɔ badaaŋga nyiɛ wa nya, a u ndrɛ naa kɔɔnashin, a u nyamblɛ naa kɛ, a ndaa yirɛ yɛ nya na ŋunu juulee yi u ndrɛ yire kro na.
4 N mu wɔɛlɛɛ yire yɔ taarɛ, wra u naa tɛɛ mna yi yɔm nunu pɔ nyiɛ yiɛ na, mna yi tini mu pan mu wo tra na. Wɔɔ wre na sɛ yire chlɔ ŋmba u chaa mbe se wre yiɛ, na waa se to, mbe u pɔ wre wru mbe jɔli.
5 Chlɔ wre na biblɔ se, ŋmba we waŋgra kro le na tɔɔnrɔ kayie ni. La, Nyiɛkpɔɔ na pɔ wre wru mna sɛ u tɛɛ wre titi ŋujɔɔn jaara.
6 A chlɔ wre na fɛ mna sɛ tablɔ tra nu, lawee ŋga Nyiɛkpɔɔ gbeele mu tɛɛ u pan, mbe u pɔɔri wa ble kagbeŋge na lafɛɛ shiin na fuloe taarɛ kre nu.
Pra Wɔɔ Wre Wa Tra
7 Ŋunɔ ka na kun nyjeeri wa, Nyiɛkpɔɔ Nyjeeri Bituŋu Michael na u bitumblɔ, na wɔɔ wre na u bitumblɔ na tun.
8 La, pra wɔɔ wre na u wolo pre ja, a pe nsra lawee ta nyjeeri wa mbe tni.
9 A pra wre wɔɔ badaaŋga wre kun mu wa tra, wre wi wɔɔ lɔlɔ ŋmba pe yeeri Sutna wre, ŋmba u waŋgra kro fana kre. Pra wre na u bitumblɔ pre kro kun mu wa tra.
Kristo Na U Wolo
10 Bawa ndaa mana badaaŋga ka loo nyjeeri mbo,
“Fuŋga Nyiɛkpɔɔ ŋmaashɔmu kre,
na u jaŋga kre,
na u ŋunumu lie kre,
na u Kristo wre jaŋga kre pan.
Ŋgi na hin?
Pe ŋmba u yire Nyiɛkpɔɔ yiɛ,
na shɔnlifɛɛnlɛ nyu kaanri lafo na blee kre,
pe u kun nyjeeri mu wa tra.
11 Mbɔɔpɔ wre nyimi saara na,
na kpra kee kre dansiɛrɛ ŋga pe li kre ndra na,
pe wi mu yili.
Ŋgi na hin? Praa chaa mbe pe ŋmaa wa mbe fun,
mbe ku kee kre ndra na.
12 Kena e ti mbe e yiɛshɔ kpɔɔ,
yire mblɛ ee wa nyjeeri wa kre kro.
La, tra na epo kro,
e atɛ!
Ŋgi na hin? Pe Sutna wre ni a u tii tra,
a u krɔkun badaaŋga.
Ŋgi na hin? U chin na u nyjilaa fiɛn.”
Wɔɔ Wre Chlɔ Wre Le Nyini
13 Ŋga wɔɔ wre na chin na pe u ni mu wa tra kre, wra chlɔ wre wra biblɔ wre se wre le nyini.
14 Pra chlɔ wre ŋga nyuu badaaŋga wa kuɛn shiin, mbe u yiri mbe shɔ wɔɔ wre kɛɛ mbe sɛ tablɔ tra lawee ŋga pe gbeele mu tɛɛ u pan kre nu, mbe pe u le wa yɛlɛ taarɛ na yɔɔ.
15 Wɔɔ wre na nyumu tuuru, a kra pe na lɔɔ yi, mbe ki pan mbe chlɔ wre fo mbe sɛ.
16 A tra na ya chlɔ wre na, mna nyumu kre wɔɔ wre na tuuru kre shiun peii.
17 Wɔɔ wre krɔ na kun na chlɔ wre ni, a kra tia wra sɛ mbe sɛ tun na wre, na u biile mblɛ pe lii Nyiɛkpɔɔ mbra yire na, mu Yesu kekpra nyjɛ u nyina yire kro shɔnli, mu taa u na pre kro ni.
18 Wɔɔ wre naa wa mu yire epo tanyiɛ na.