Suminyuŋgo Kre Na Sumifɛɛnlɛ Pre
11
A pra kaan ŋga ni pe yirɛ kra le ni kɛɛ, mna kna mu yo ni pan mbo, “Yiri mu Nyiɛkpɔɔ Suminyuŋgo kre, na sragbunu kre kra, mu mblɛ pe sumi ki nu pre kro tɔɔnri.
2 La, maashia Suminyuŋgo kre lawee vankam kre kra. Bawa pe waŋgra leele mblɛ pe n Nyiɛkpɔɔ chin pre ŋga, mbe pe kre na kakpɔɔ cheche kre taanla nyiɛpɔ fuloe shiin na shiin.
3 Mbe ni bitumblɔ shiin tun, mbe pe kumu yonyi tɔ mbe paan Nyiɛkpɔɔ kee yo ble kagbeŋge na lafɛɛ shiin na fuloe taarɛ yire nu.”
4 Bitumblɔ shiin pre lɛ olive tinyi shiin yire, na kaniɛ taa yirɛ shiin nyjɛ yi yire waŋgra kro Tafun wre yiɛ kre.
5 Ŋmba we na chaa mbe pe kla kpan, kanhun we yili pe nyuu mbe paan pe loŋgoolo pre sro. A na ndro chaa mbe pe fiŋge kolo ka na kre, pan kanhun we ufun wre sro mbe gbo.
6 Pre leele pre we jaŋga ta, mbe jaa nyjeeri tɔ mbe nyiɛ wa pan ble nyjɛ nu pie Nyiɛkpɔɔ kee kre kpali yire nu. A jaŋgaa wa pe pan mbe pe jaa nyumu kaari nyimi, mbe jaa ti kanyana ŋga nyini pe chaa kpan pan tra, nyjila ŋga pe chaa kro nu.
Pe Bitumblɔ Shiin Pre Gbo
7 Na pe waa pe kee kre kpali mu kɔ kre, yurɔ ŋmba uu wa wee ŋga ki n nyukɔɔrɔ ni nu wre we yili mbe paan wi na pe ni. We pe ja, mbe pe gbo.
8 A pe gboolo we kro kakpɔɔ ŋga mɛɛ pe tɛɛ Sodom, na Egypt kre lete na. Bawa pra pe Tafun wre kan kanyana kumu kaan na kre.
9 Leele mblɛ pe yiri waŋgrɛ nu, na yolo nyini nyini leele, na sele sele leele we na pe gboolo pre nyaa lete na wa, ble nununu taarɛ na yɔɔ, pia kolo ŋga mbe pe pe wru mbe sɛ le.
10 Waŋgra leele kro yiɛ we shɔ pre leele shiin mblɛ kumu na. Mbe pe pe kumu kre ble li na yɛshɔɔrɔ ni, mbra pe yɛ kee yirɛ ki ble kre. Ŋgi na, pre Nyiɛkpɔɔ kee nyanyofɛɛnlɛ shiin pre tia waŋgra leele kala nya tataara.
11 Ble taarɛ na yɔɔ kɔkro kre, Nyiɛkpɔɔ ŋmaa ŋumu na pan mu le pe nu, a pra yiri mu yire yire, a fiɛrɛ kpɔɔ na leele mblɛ pra pe nya pre kro yii.
12 Bawa Nyiɛkpɔɔ kee nyanyofɛɛnlɛ shiin pre na mana ka loo, na ki yiri nyjeeri na yuu pe pan mbo, “E pan mna.” Pe loŋgoolo pre tataara na yire na pe le, a pra yiri, mna le tloe nu mu sɛ nyjeeri.
13 Titɛɛ kre nu wa to, a tra na seeri badaaŋga, na mu kakpɔɔ kre yɔ kɛ, ki nunu na juari, a leele kagbenyi kɔɔnashin na ku. Fiɛrɛ na leele hamblɛ pre yii, a praa Nyiɛkpɔɔ kaan mɛɛ.
14 Kanyana shiinwo tro, la, e le, kanyana taarɛwo paan.
Bnɔ Ŋga Ki Taa Kɔɔnashin
15 Bituŋu kɔɔnashinwo wre na u bnɔ kre fɔ, a ndaa maalɛɛ badɛnyi yɛ loo nyjeeri mbo,
“O Tafun Nyiɛkpɔɔ, na u Kristo wre,
pe wo yi waŋgra ŋunumu lie kro faŋga,
a we ki ŋunumu li nyjila kro nu.”
16 A loplombo fulo na jijirɛ mblɛ praa wa mu tni pe ŋujɔɛn na Nyiɛkpɔɔ yiɛ wa pre, na to mu yiɛ juule tra, na Nyiɛkpɔɔ sumi mbo,
17-18 “O Tafun Nyiɛkpɔɔ Jaŋgafun, o mu kaan mboo,
ŋu muu wa, a mnaa wa fa.
Ŋu mu mu jaŋga kpɔɔ kre tɛɛ na ŋunumu lii.
Waŋgra leele krɔ na kun na mu ni,
a fuŋga ŋu krɔkun.
Nyjila da mbe mu paan gboolo kpra kun,
mbe paan mu kee nyanyofɛɛnlɛ,
na mu chinfɛɛnlɛ
na mblɛ pe mu mɛɛ kre fiɛ pre, pe fiɛn fiɛn, na pe lekpɔɛ kro ŋga fɔtɔɔrɔ chichie.
A mblɛ pe tra kre kla kre,
mbe mu paan pe kla na.”
19 Ndaa nya na pe Nyiɛkpɔɔ Suminyuŋgo kre nyu nyaa nyjeeri, a ndaa u nyu nunu daka kre nya ki lam. A nyiɛ naa nyini plipli, na twanri, na tini, a tra na seeri, a nyiɛ subie naa woni tataara.