Nyjeeri Bituŋu Faŋgafun Wa
10
Ndaa ndru mna nyjeeri bituŋu faŋgafun wa nya na u yiri nyjeeri na tri tra, a tloe na u tɔ. A glaŋgoli na u ndra fɛ mu kun, u yiɛ naa chiɛnri na yila yi, a u jeelee naa chiɛnri na kanhun yi.
2 Na pe hlɛ fiɛn ka nyaa mu le u kɛɛ. A wra u jele kalie wo kan epo yiɛ na, a u kamɛŋɛ jele naa wa mu kan tra yiɛ na.
3 Bituŋu wre na gblee le badaaŋga na blɛkpɔɔ u nyɛni. Ŋga wra gblee kre le ma kre, a nyiɛ twanraa nununu kɔɔnashin na chaa mu tin badaaŋga, a praa paara ki nu.
4 A ndaa chaa mbe kee yire nyunɔ mbe tɛɛ. Bawa mana ka na yiri nyjeeri mna yo ni pan mbo, “Kee nyjɛ mu loo nyiɛ twanraa yire nu kre ti mu ndra, maashia yi nyunɔ.”
5 A ndaa yiɛ wa mna nyjeeri bituŋu ŋmba wra jele kan epo, na tra yiɛ na wre nya, na u u kalie kɛ yire nyjeeri,
6 mna Nyiɛkpɔɔ ŋmba uu wa mu tni nyjila kro nu, ŋmba wra nyjeeri na tra, na epo, na yirɛ nyjɛ yii wa yi nu kro gbeele kre da. A nyjeeri bituŋu wre na kna mbo, “Ni da na nyjila kre wa mu kuraa mbe pan.
7 La, na nyjeeri bituŋu kɔɔnashinwo wre waa u bnɔ kre fɔ, kre Nyiɛkpɔɔ we u ndra ndra kee nyjɛ wra yo u kee nyanyofɛɛnlɛ pan yire kro pe.”
8 Bawa ndaa mana jle ŋga kra yiri nyjeeri mu paara ni pan kre loo, na ki paara ni pan mbo, “Sɛ nyjeeri bituŋu ŋmba uu wa mu yire epo, na tra yiɛ na wre pan, mu sɛ hlɛ fiɛn ŋga pe nyaa mu le u kɛɛ kre shɔ.”
9 A ndaa sɛ yo bituŋu wre pan na, u ni ŋga hlɛ fiɛn kre, a wra kna mna yo ni pan mbo, “Ki shɔ mu ka, kie tna mu nyuu na srɛ yi, la, na mu ki jɔli, kie sro krakra mu lɛɛ.”
10 A ndaa hlɛ fiɛn kre shɔ mna ki ka, a kra tna ni nyuu na srɛ yi, la, ŋga ndaa ki jɔli kre, a kra sro ni lɛɛ.
11 A pra kna mna yo ni pan mbo, “Leele, na waŋgrɛ, na kayolo nyini nyini leele, na ŋulo tataara kee nyjɛ yie pan pe na kre, nya mu yo pe pan na.”