Nyjeeri Bitumblɔ Kunɔwo Wre Bnɔ Kre Fɔ
9
Nyjeeri bituŋu kunɔwo wre na u bnɔ kre fɔ, a ndaa wɔlɔ ka nya, a kra yiri nyjeeri mu pan mu to tra yiɛ na, na pe ki ŋga wee ŋga ki n nyukɔɔrɔ ni kre safwa.
2 A wɔlɔ kre na wee kre nyu nyaa, a wre badaaŋga na yili ki nu, imi na wre yilii paanu fɔ ndoo badaaŋga nu kre, wre kre na yila, na nyiɛ yiɛ tɔ poŋgo.
Kpatɔ Yili Wre Kre Nu
3 Kpatɔ tataara plɛ na yili wre kre nu mna pan mu tra yiɛ tɔ, a Nyiɛkpɔɔ na tia pe nyu naa yaa na naala lɛ.
4 Pra yo pe pan na piashia nyaa, ndee tinyi, na wrɛ nyjɛ yii wa tra na yire kla, la, praa leele mblɛ nduweele na Nyiɛkpɔɔ tnɔmu n wa pre niɔ.
5 Nyiɛkpɔɔ nsra kpatɔ pre ŋga kolo mbe pra leele pre niɔ mbra kuu, la, pe pe niɔ mbe pe kala nya nyiɛpɔ nununu kunɔ. Imi na naa ndro niɔ mbe ki u yaa kre, pan kpatɔ pre naa yaa.
6 Yire ble yire nu, leele we na kumu haa chaa, la, pia ki nya. Pie na kumu chaa titi mbe ku, a kumu wa pan pe pan.
7 Kpatɔ pre na pe na soolo mblɛ pe san na shie na pe ni ŋunɔ lɛ. A yirɛ yɛ naa wa pe ndrɛ na, na swanyiɛ ŋujuulee yi, a pe yiɛ na pe na leele yiɛ yi.
8 A pe nyjure na tnu tnu na chlɔ nyjure yi, a pe ŋgaala na pe na blɛkpɔɔ ŋgaala yi.
9 A pe yirɛ yɛ le na tɔɔnrɔ dodonyi yi mu pe gbun tɔ. Pe kuɛn naa tini na soolo tataara mblɛ pe san mu soolo trogo pɔ pe na, na shie na pe ni ŋunɔ lɛ.
10 Praa wa nɛɛ ni na naala lɛ, a pe jaŋga ŋga ni pe leele niɔ, mbe pe fiŋge nyiɛpɔ kunɔ kre naa wa pe nɛɛ yire nu.
11 Praa wa na ŋunu ni, a wraa pe le. Wee ŋga ki n nyukɔɔrɔ ni kre bituŋu na wi, a praa u yeeri Abaddon Hebrew kayolo nu. A Greek nu praa u yeeri Apollyon, ki nyina na klafun.
12 Kanyana jle wo tro, ŋga kɔkro kre, kanyana shiin wa kro na paan.
Bituŋu Kɔɔnanuwo Wre Bnɔ Kre Fɔ
13 Bituŋu ŋmba u taa kɔɔnanu wre na u bnɔ kre fɔ. A ndaa mana ka loo na ki yilii swanyiɛ sragbunu ŋga kraa wa mu yire Nyiɛkpɔɔ yiɛ kre, jenu jijirɛ yire yira yili chom chom yire lawee.
14 A mana kre na kna na yuu bituŋu kɔɔnanuwo ŋmba kɛɛ bnɔ na nyi wre pan mbo, “Bitumblɔ jijirɛ mblɛ pe yii mu pɔ lɔɔ kpɔɔ Euphrates mbɛɛ na pre saanla.”
15 A wra bitumblɔ pre saanla, na pe pe yii mu tɛɛ na kre nyjila kre, na kre ble kre, na kre nyiɛpɔ, na kre yɛlɛ kre sri, mbe pe paan leele kro yɔ taarɛ, mbe yɔmu nunu gbo peii.
16 Pra ni nyina ŋunɔ wifɛɛnlɛ pre soolo nyu, praa kagbenyi lafɛɛ shiin.
17 Ndaa soolo pre, na pe nduufɛɛnlɛ pre nya nyiɛlɛ na, a pra tɔɔnrɔ dodonyi le le, a yira nyina, mu pe na ŋgonyina yi. Soolo pre ndrɛ, na pe na blɛkpɔɔ ndra yi. A kanhun na wree, na pua tuwe ndiom naa yilii pe nyuu.
18 Na mu leele kro yɔ taarɛ, yire yirɛ taarɛ nyjɛ yiraa yilii soolo pre nyuu kre na pe yɔmu nunu gbo.
19 Soolo pre faŋga ŋga pra ta kre naa wa pe nyuu, na pe nɛɛ nu, a pe nɛɛ na pe na wɔɔlɔ lɛ, a ndrɛɛ wa yi nyu na, a pe yi tɛɛ na leele fiŋge.
Loloŋgo Shelifɛɛnlɛ
20 Leele pre hamblɛ mblɛ soolo pre nsra gbo pre nsra pe jawala chinɛ. Pe nsra ŋumufuɛn sumiɛ ti. Sɛɛnlɛ yire, pe kɛnyu tnumu yi, a pe swanyiɛ, na swafre, na swafiŋge, na dnɛ, na tinyi tɛɛ mu yi pe, a yi n na nyaa, a yi n na ndru, a yia jaa nyaari.
21 Pe linkuuro kepele nyjɛ praa pini, na dobodobo nyjɛ praa woni, na pe chachaara, na pe juuro kepele yire krɛrɛ, pe nsra yi ti mna pe jawala chinɛ.