2 Bawa ndaa nyjeeri bitumblɔ kɔɔnashin mblɛ pe yire Nyiɛkpɔɔ yiɛ pre nya, a pra bnɔɛ kɔɔnashin le pe kɛɛ.

3 Nyjeeri bituŋu wa na swanyiɛ kotolo ŋga nu pe tuwe ndiom tɛɛn sroi yii, mu yire sragbunu kre jaara. A pra u ŋga tuwe ndiom tɛɛn tataara mbe u yi ya Nyiɛkpɔɔ leele kro nyiɛtalaa na, mbe yi taa swanyiɛ sragbunu kre, na Nyiɛkpɔɔ ŋujɔɔn kre yiɛ.

4 A tuwe ndiom tɛɛn yire naa shio bituŋu wre kɛɛ, a yi wre na leele pre nyiɛtalaa na da Nyiɛkpɔɔ yiɛ.

5 A nyjeeri bituŋu wre na kotolo kre tɛɛ mu kanhun wɔ sragbunu kre na, mna ki kna mu wo tra, a nyiɛ naa twanri, na tini, na nyini, a tra naa seeri.

6 Kre kɔkro kre, nyjeeri bitumblɔ kɔɔnashin pre na peyɛ kna mbe pe bnɔɛ yire fɔ.

7 Ŋga bituŋu jlewo wre na u bnɔ fɔ kre, nyiɛsubie, na kanhun, na nyimi na chaa na woni tra. Kra tia na mu tra yɔɔlɛ taarɛ kre, ki nunu na shɔ peii, a na mu tinyi nyjɛ yi wa tra yiɛ na yɔ taarɛ, yi nunu na shɔ, a nyaa nyjɛ yira pe nyinyi na shɔ tra yiɛ na putuu.

8 Ŋga bituŋu shiinwo wre na u bnɔ fɔ kre, ndaa yira ka nya badaaŋga na nyua yi, a kraa nyini kanhun, a pra ki wa epo nu. A kra tia na mu epo yɔ taarɛ, ki nunu na kaari nyimi.

9 A yurɛ mblɛ pee wa epo nu, na mu pe yɔ taarɛ, pe nunu na ku, a krɔɛ kpɔɛ nyjɛ yiraa wa epo yiɛ na kre, na mu yi yɔ taarɛ, yi nunu na kla.

10 A bituŋu taarɛwo wre na u bnɔ fɔ, a wɔlɔ badaaŋga ka naa nyini na kania yi. Na mu lɔɛ, na bloe yɔ taarɛ kre, kra pan mu to nunu nu.

11 Wɔlɔ kre mɛɛ na yi Sisrom. Na mu lɔɛ yɔ taarɛ kre, yi nunu na sro. A leele tataara na yi nyumu gbɔ mna ku, ŋga kra sro kre na.

12 Bituŋu jijirɛwo wre na u bnɔ fɔ, na mu yila yɔ taarɛ, ki nunu na fii. Pan nyiɛpɔ na wɔɛlɛɛ na pe na. Kra tia na mu imi na yi nyaa yɔ taarɛ kre, yii nunu nsraa nyaa, a na mu nyisee yɔ taarɛ kre, ki nunu na kaari wɔmu, a ka na ya blee wɔmu na.

13 Bawa ndaa ndra yire na le, mna loo na nyuu wa tro nyjeeri haalee, mna na paara kpɔɔ mbo, “E atɛ, e atɛ. Leele mblɛ ee wa mu tni tra, e atɛ, ŋgi na hin? Na nyjeeri bitumblɔ taarɛ hamblɛ pre waa pe bnɔ yire fɔ kre, kanyana kpɔɔ we pan.”