Nyiɛkpɔɔ Sumifɛɛnlɛ Chichiele
7
Kee nyjɛ kɔkro kre, ndaa nyjeeri bitumblɔ jijirɛ nya, na pe yire yire tra nyu kokoe jijirɛ yire kro na, mu fuflɛ jijirɛ nyjɛ yi gbuun na tro tra na yire tɔ kolo, mbe yia jaa gbun mbe tro tra, ndee epo yiɛ na, ndee mbe gbuun tro tinyi nu.
2 A ndaa ndru mna nyjeeri bituŋu wa nya, na u yiri yila finhaa na paan, na yira ŋga ni Nyiɛkpɔɔ yirɛ tnɔ wa u kɛɛ. A wra mana kpɔɔ tɛɛ mu nyjeeri bitumblɔ jijirɛ mblɛ Nyiɛkpɔɔ ŋga jaŋga na pe tra, na epo kla kre yeeri,
3 na yuu pe pan mbo, “Yaa shia tra, ndee epo, ndee tinyi yire ka kla, fɔna o Nyiɛkpɔɔ sumifɛɛnlɛ pre tnɔ nduweele na mu kɔ.”
Israel Leele 144,000
4 Pra ni nyina leele mblɛ nduweele na Nyiɛkpɔɔ tnɔmu na nyi pre nyu, na pee kagbenyi lafaa na fuloe shiin na jijirɛ, a pe kro na yiri Israel sele kɛmbɔshiin yire nu.
5 Leele pre kagbenyi kɛmbɔshiin na yiri Judah jlom na,
a kagbenyi kɛmbɔshiin na yiri Reuben jlom na,
a kagbenyi kɛmbɔshiin na yiri Gad jlom na,
6 a kagbenyi kɛmbɔshiin na yiri Asher jlom na,
a kagbenyi kɛmbɔshiin na yiri Naphtali jlom na,
a kagbenyi kɛmbɔshiin na yiri Manasseh jlom na,
7 a kagbenyi kɛmbɔshiin na yiri Simeon jlom na,
a kagbenyi kɛmbɔshiin na yiri Levi jlom na,
a kagbenyi kɛmbɔshiin na yiri Issachar jlom na,
8 a kagbenyi kɛmbɔshiin na yiri Zebulun jlom na,
a kagbenyi kɛmbɔshiin na yiri Joseph jlom na,
a kagbenyi kɛmbɔshiin na yiri Benjamin jlom na.
Lenɛɛrɛ Plɛ
9 Nyjɛ kɔkro kre, ndaa leele tataara plɛ nya, imi na pra nɛɛ mu da kre, ndro wa jaa pe tɔɔnri, waŋgra waŋgra leele, na sele, na yolo, na tra kro leele, na pe kro pan mu fni ŋujɔɔn kre, na Mbɔɔpɔ wre yiɛ. A pe kro dodonyi titnɔnyi finyi le le, mu shuɛ tinyi klɛ yii kɛɛ.
10 A pe kro na mana kpɔɔ tɛɛ na yuu mbo,
“O ŋmaashɔmu kre,
Nyiɛkpɔɔ ŋmba uu wa mu tni ŋujɔɔn kre na wre,
na Mbɔɔpɔ wre pan ki yiri.”
11 A nyjeeri bitumblɔ pre na yire mu ŋujɔɔn kre, na loplombo pre, na yurɛ jijirɛ pre kro kun mu le lalaa, mna to to mu yiɛ juule juule tra ŋujɔɔn kre yiɛ, na Nyiɛkpɔɔ sumi.
12 Na yuu mbo,
“Kpra yi,
Dwamu, na yɛnyiŋge,
na kachindɛ, na mboo, na mɛɛ,
na jaŋga, na kpɔɔmu yi o Nyiɛkpɔɔ wo nyjila kro nu. Ami.”
Mbɔɔpɔ Wre Ŋmaashɔmu
13 Bawa loplombo pre nunu na kna mu ni wie mbo, “A leele mblɛ pe dodonyi finyi nyjɛ le le ŋga, mblɛ lɛ hin? A sena pe yiri hin?”
14 A ndaa kna mna yo u pan na, “Ni Tafun, ni n pe chin rɔ, ŋu mu pe chin.”
A wra kna mu yo ni pan mbo,
“Leele mblɛ pe yili kanyana kpɔɔ kre nu mu pan pre lɛ.
Pre pe pe dodonyi je Mbɔɔpɔ wre nyimi ni,
a yi fniŋge prupru kre.
15 Kre ki tia pe ja mu yire Nyiɛkpɔɔ ŋujɔɔn kre yiɛ,
na u sumi lafo na blee, u Suminyuŋgo kre nu.
A ŋmba uu wa mu tni ŋujɔɔn kre na wre we pe le,
mbe yaka waa pe ta fio.
16 Klo waa pe ta na fio, a gbɔɔ waa pe ta na,
a yila, ndee tra wrɛmu wa pe sro na.
17 Ŋgi na hin?
Mbɔɔpɔ ŋmba uu wa mu tni ŋujɔɔn kre na wre,
wre wi pe lefun, a wre we yiɛklu na pe ni,
mbe sɛ na pe ni ŋmaa nyumu lawee.
Nyiɛkpɔɔ wre titi we pe yotunyi kro tlu pe nyiɛlɛ.”