Hlɛ Kre Nyu Yii Yira Ŋga Ki Yiɛklu
6
Bawa ndaa nya na Mbɔɔpɔ wre hlɛ kre nyu yii yirɛ kɔɔnashin yire, ŋga ki yiɛ klu kre kun. A ndaa loo na yurɛ jijirɛ pre wa paara, a kra tin na nyiɛtwanraa yi mbo, “Pan”
2 Ŋga ni yo mbe le kre, na sofiun prupru waa ŋmba. A u nduufun wre bɛŋɛ, na snimi yii kɛɛ, a pra u le swanyiɛ juulee, a wra yili na ŋunɔ shɔfun wi.
U Nyu Yii Yira Shiinwo Kre Kun
3 A Mbɔɔpɔ wre na ndru mu hlɛ kre nyu yii yirɛ yire shiinwo kre kun. A ndaa loo na yurɛ jijirɛ pre shiinwo paara mbo, “Pan.”
4 A soo shiinwo na ye mu yili. Wre na nyina piipii, mna yire na u krɔ ki kun. A pra u nduufun wre ŋga jaŋga mbe u wejinyiŋge wɔ tra, mbe ti leele na peyɛ kuu. A pra u ŋga brɔfiɛn yiɛshiin badaaŋga ka.
U Nyu Yii Yirɛ Taarɛwo Kre Kun
5 A Mbɔɔpɔ wre na ndru mu hlɛ kre nyu yii yirɛ yire taarɛwo yii mu kun, a ndaa loo na yurɛ jijirɛ pre taarɛwo paara mbo, “Pan.” Ŋga mbe le na sowɔɔ kprikpri wa ŋmba u yire ni yiɛ, a pɛlɛ ŋga ni pe yirɛ krai shiin wa u nduufun wre kɛɛ.
6 A ndaa yira ka tiŋge loo na ndro mana yi, a kraa tini yurɛ jijirɛ pre lalaa na yuu mbo, “Lewo we u ble nunu fɔtɔɔrɔ wru, mbe sɛ yua lakaja nunu chom lɔ, ndee mbe sɛ fifiire lakaja taarɛ gbi lɔ, la, simi liwo na simi gbɔwo rɛ, pia shia yi pe yaka.”
U Nyu Yii Yirɛ Jijirɛwo Kre Kun
7 Mbɔɔpɔ wre na ndru mu hlɛ kre nyu yii yirɛ jijirɛwo kre yii mu kun, a ndaa loo na yurɛ pre jijirɛ wo wre yuu mbo, “Pan.”
8 Ŋga mbe nya na soo haan waa ŋmba, a u nduufun wre mɛɛ naa kumu, a kuulo ndoo wa mu taa u kro. Na pe leele mblɛ pee wa tra yɔɔlɛ jijirɛ, mu soo nduufun wre, na ŋmba u taa u kro wre ŋga jaŋga, na pe ŋunɔ, na klo, na yira, na tra yurɛ mblɛ pe nyaai tɛɛ mbe tra leele yɔm nunu gbo.
U Nyu Yii Yirɛ Yire Kunɔwo Kre Kun
9 Ŋga Mbɔɔpɔ wre na ndru mna hlɛ kre nyu yii yirɛ yire kunɔ wo kre kun kre, ndaa leele mblɛ praa Nyiɛkpɔɔ kee yuu, na u dansiɛrɛ lii, a pra yila ki na mna pe gbo pre ŋumu nya sragbunu kre jaara.
10 A pra mana kpɔɔ tɛɛ na yuu mbo, “O Tafun Jaŋgafun, ŋu mu pe cheche, mu pe kprafun, kena leele mblɛ pee wa tra, mna o yii mu gbo kre, nyjila ŋgi nu mu pe kpra kun, mbe pe ndie tini hin?”
11 Leele mblɛ ndaa nya pre, na pe pe ŋga dodonyi finyi titnɔnyi a pe le le, a wra kna mna yo pe pan mbo, “E tni, e na wuui chiɛri e sɛ su na pie e ŋmbilɛ sumifɛɛnlɛ mblɛ pee wa tra na pre gbo imi na pra e gbo kre, mbe e nyu paan fni tun.”
U Nyu Yii Yirɛ Yire Kɔɔnanuwo Kun
12 A ndaa Mbɔɔpɔ wre nya na u yurɔ hlɛ kre nyu yii yirɛ yire kɔɔnanuwo kre kun. Titɛɛ kre nu, na tra seeri poŋgo, a yila wɔ na kumu yoŋgo yi, a nyiɛpɔ nyina poŋgo na nyimi yi.
13 A wɔɛlɛɛ na yiri nyjeeri na klɔ na tuuri tra, imi na fuflɛ badaaŋga we na gbuun, mbe tinyi sɛnyi na knumu bibre mbra woni tra kre.
14 A nyjeeri na fun ni yiɛ na, a pra ki kru na dɛŋglɛ yi mu sɛ nyjeeri, a nyuɛ, na kuyɔɔsu kro naa klɔ yi titɛɛ.
15 A waŋgra ŋulo, na lebiile, na sojae loplombo, na swafɛɛnlɛ, na faŋgafɛɛnlɛ, leele mblɛ mu chin ŋga kro, tinlɛ, na mblɛ pe n pe tinlɛ kro, praa feni na ndra dnɛ weele, na nyuɛ ndoolo.
16 A praa gble leni na yuu nyuɛ, na dnɛ pan mbo, “E klɔ e pan e o fɛɛri, mbe ŋmba uu wa mu tni ŋujɔɔn na kre wa o nya, mbe o jaa shɔ Mbɔɔpɔ wre krɔkuɔn kre kɛɛ.
17 Yaka ma ki tia, Nyiɛkpɔɔ, na Mbɔɔpɔ wre krɔkun ble kre da, ŋmbi we jaa yire mbe ki shie hin?”