Kee Nyjɛ Yie Pan Kre Hlɛ
5
A ndaa yurɔ hlɛ ka nya ŋmba wraa wa mu tni ŋujɔɔn kre na wre kalie, a pra nyunɔ ki lam, na ki krɔ na, mu ki nyu yii na yirɛ ni gbee nununu kɔɔnashin.
2 A ndaa nyjeeri bituŋu jaŋgafun wa nya, a wraa fuuru na yuu mbo, “Ŋmbi u fna, mbe jaa yurɔ hlɛ ŋga nyu yirɛ yire knumu, mbe ki nyaa, ndee mbe ki lam le hin?”
3 Pe nsra ndro ta nyjeeri, ndee tra yiɛ na, ndee tra tapan mbe u jaa yurɔ hlɛ kre nyu kun, mbe ki lam le.
4 A ndaa yire na nyɛni suwi, ŋgi na hin? Pe nsra ndro ŋmba u fna ta, mbe u jaa yurɛ hlɛ kre nyaa, ndee mbe ki lam le.
O Shɔfun Wre Chiin We Jaa Hlɛ Kre Nyaa
5 Bawa loplombo pre wa na kna mna yo ni pan mbo, “Maa nyɛni! Le, ŋmba pe yeeri ‘Blɛkpɔɔ,’ a u yiri Judah jlom na wre, ŋmba u yiri ŋunu David nɔɔ ndro wre, u wi mu yili, mbe jaa pan mbe hlɛ kre nyu yii yirɛ nununu kɔɔnashin yire knumu mbe ki nyaa.”
Nyiɛkpɔɔ Mbɔɔpɔ Wre
6 Bawa ndaa yiɛ wa mu nya na Mbɔɔpɔ waa wa mu yire yurɛ jijirɛ pre, na loplombo pre, na ŋujɔɔn kre lalaa. Mbɔɔpɔ wre na pe na pra da mu u gbo. Na u nyamblɛɛ kɔɔnashin, a u nyiɛlɛɛ kɔɔnashin, nyjɛ yi yire mu Nyiɛkpɔɔ Ŋumu kɔɔnashin nyjɛ wra tun waŋgra kro nu yire ŋga.
7 A Mbɔɔpɔ wre na sɛ hlɛ kre shɔ ŋmba wraa wa mu tni ŋujɔɔn kre na wre kalie.
8 Ŋga wra hlɛ kre shɔ kre, a yurɛ jijirɛ pre na loplombo fulo na jijirɛ pre na lɛɛlɛ mu kosie kan Mbɔɔpɔ wre yiɛ. Na juruu wa pe kro kɛɛ, a pe swanyiɛ kotie yii yii kɛɛ, na tuwe ndiom tɛɛn wa yi nu, a yi yire mu Nyiɛkpɔɔ leele nyiɛtalaa ŋga.
9 A pra mɛɛ fɔŋgɔ kɔ mbo,
“Ŋu mu fna mbe jaa yurɔ hlɛ kre yii
mbe ki nyu yii yirɛ yire knumu.
Ŋgi na hin? Pra mu gbo,
a mu yire mu kumu na,
mu mu nyimi tɛɛ mu leele ndra lɔ,
mu Nyiɛkpɔɔ ŋga.
Leele mblɛ ndra mna lɔ pre,
plɛ yili sele nyjɛ yii wa tra na kre kro nu,
na yolo kro nu,
na waŋgra kro nu.
10 Ŋu mu pe kro pe ŋulo na sɔfue,
a pra o Nyiɛkpɔɔ wre sumi,
mbe ŋunumu li tra.”
Mbɔɔpɔ Wre Jaŋga Na U Yɛnyiŋge
11 A ndaa ndru mna yiɛ wa mu le, mna Nyjeeri bitumblɔ kagbenyi kagbenyi tataara nya. Pra nɛɛ chiin ndro wa jaa pe tɔɔnri, na pee wa mu yire, mu Nyiɛkpɔɔ ŋujɔɔn kre, na yurɛ jijirɛ pre, na loplombo fulo na jijirɛ pre pre le lalaa.
12 A pra mana kpɔɔ tɛɛ na mɛɛ koni na yuu mbo,
“Mbɔɔpɔ ŋmba pra gbo wre,
u fna mbe jaŋga ta, mbe uyɛ ta,
mbe kachindɛ, na faŋga ta,
kena e u ŋga yɛnyiŋge
na mɛɛ, na dwamu.”
13 A ndaa loo na yira ŋga kii wa nyjeeri wa kro, na nyjɛ yiraa wa tra na kro, na nyjɛ yiraa wa tra tapan kro, na nyjɛ yiraa wa epo tapan kro, na yirɛ nyjɛ mu chin ŋga kro, a yiraa yuu mbo,
“E ti mbe o ŋmba uu wa mu tni ŋujɔɔn kre na wre,
na Mbɔɔpɔ wre ŋga mɛɛ,
pe fna kpɔɔmu,
na jaŋga, na yɛnyiŋge ni nyjila kro nu.”
14 A yurɛ jijirɛ pre na kna mbo, “Ami.” A loplombo pre na to tra na gbila na pe sumi.