Pe Krɔ Nyaa Nyjeeri
4
Nyjɛ kɔkro kre, ndaa nya na pe krɔ ka nyaa nyjeeri. Bawa ndaa mana kpɔɔ ka loo, a kraa paara ni pan, na tini na bnɔ ŋga mana ndaa loo jle kre yi mbo, “Nduu mu pan mna, mbe ni mu nyina kee nyjɛ yie pan kee nyjɛ kɔkro.”
2 Titɛɛ kre nu, a Kpra Ŋumu wre na ni bali mna sɛ nyjeeri. Bawa ndaa ŋujɔɔn ka nya, na ndro wa mu tni ki na.
3 Na ŋmba uu wa mu tni ki na wre yiɛ chiɛnri na dnɛ chiɛnri wee titi yi. A glaŋgoli na chiɛnri mu fɛ mu ŋujɔɔn kre kun.
4 Ndaa ŋujuɛn nununu fulo na jijirɛ nya, na loplombo fulo na jijirɛɛ wa mu tni yi na, mu dodonyi finyi prupru, na swa nyiɛ juulee juule juule mu tni mu ŋujɔɔn kre wa lalaa.
Yirɛ Nyjɛ Yi Ŋujɔɔn Kre Kun Mu Fni
5 A ndaa nya na nyiɛ nyini na tini, na twanri. A mana ka naa yilii ŋujɔɔn kre lawee. Na kaniɛ kɔɔnashin wa mu yire ŋujɔɔn kre yiɛ na nyini. Yire na Nyiɛkpɔɔ ŋumu kɔɔnashin pre.
6 A ndaa yira ka nya ŋujɔɔn kre yiɛ na epo yi, a kra fniŋge prupru na chiɛnri na dwanle yi.
Ndaa nya na yurɛ jijirɛ plɛɛ wa mu yire mu ŋujɔɔn kre le lalaa, a nyiɛlɛ na pe poŋgo, yɛɛ na wa mu kan kan pe yiɛ haa, na pe krɔ.
7 Yurɔ jle wo wre na pe na blɛkpɔɔ wi. A ŋmba wra taa shiin wre na pe na nabie wi. A taarɛ wo wre yiɛ na pe na Lewo yiɛ yi. A jijirɛ wo wre na pe na nyuu wi.
8 Yurɛ jijirɛ pre kro kuɛn naa kɔɔnanunu, a nyiɛlɛ kan kan pe na poŋgo, hali yɛ naa wa mu kan kan pe kuɛn yire lam. Pe nyu nsraa toni, lafo na blee kee ŋga praa yuu yi mbo,
“Cheche! Cheche!
O Tafun Nyiɛkpɔɔ Jaŋgafun wre,
u pe cheche.
Wre wraa wa fa, mu wa aŋga,
a uu wa na paan mbakɔ.”
Nyiɛkpɔɔ Jaŋga Na U Yɛnyiŋge
9 Kena na yurɛ jijirɛ pre waa ŋmba uu wa na le nyjila kro nu, mu tni u ŋujɔɔn na wre ŋga yɛnyiŋge, na kpɔɔmu, na mboo kre,
10 mbe loplombo fulo na jijirɛ pre na kosie kani u yiɛ, mbra u sumi, mbra pe juulee yire laari mbra waa tra, mbra mbra yuu mbo,
11 “O Tafun, na o Nyiɛkpɔɔ,
ŋu mu fna o ŋga yɛnyiŋge,
na kpɔɔmu, na jaŋga.
Ŋgi na hin? Ŋu mna yirɛ kro gbeele,
a ŋu mna chaa mna yi gbeele,
a mu chaara na yi kroo wa.”