Sardis Hlɛ
3
“Nyunɔ mu sɛ Sardis sumifɛɛnlɛ pre bituŋu wre ŋga.
‘Kee ŋga ŋmba u Nyiɛkpɔɔ ŋumu kɔɔnashin yire, na wɔɛlɛɛ kɔɔnashin yire yii wre yuu yi kre. Ni e kepele chin, ni chin na ee wa mɛɛ ni kra nyina na e shɔnli, la, e shɔnlie ku.
2 Kena e nyi, e e shɔnlie ŋga ki paan mbe ku kre le gbeŋmbaa. Ŋgi na hin? E kepele kro ma yi nyu Nyiɛkpɔɔ yiɛ.
3 Kena kee nyjɛ e ta mu loo yire, e yi sɔɔnri, e li yi na, e e jawala chinɛ, e laa e sisam kro. Na e je, a e n nyi, mbe pan mbe e fo na juo wi, yaa chin nyjila ŋga ni mbe pan.
4 La, e chiɛri plɛɛ wa Sardis na, a pe n peyɛ tɔ na nɛɛrɛ ni. Ki tia mi na pre we nyaari dodonyi finyi nu, ŋgi na hin? Pe fna ma.
5 A mblɛ pie wi mbe yili pre, pan pie nyaari dodonyi finyi nu, a mba pe mɛɛ wɔ ŋmaa hlɛ kre nu. Pre mbe wɔ mbe ni Lɛ wre, na u bitumblɔ pre nyina, na ni wolo lɛ.
6 Na muu ndie ni kre, ŋga Kpra Ŋumu wre yuu sumifɛɛnlɛ pre pan kre loo.’”
Philadelphia Hlɛ
7 “Nyunɔ mu sɛ Philadelphia sumifɛɛnlɛ pre bituŋu wre ŋga.
‘Kee ŋga ŋmba u pe cheche, mu pe kprafun wre, ŋmba kɛɛ David safwa nyi, na u krɔ nyaa mbe ndro wa jaa ki tɔ, a na u krɔ tɔ, mbe ndro wa jaa ki nyaa wre yuu yi kre.
8 Ni e kepele chin, mu chin na faŋga n wa e nu, ande ee wa mu taa ni kee yire kro, a e n ni je. E le, ni krɔ nyaa mu tɛɛ e pan, ŋga ndro wa wa jaa tɔ fio.
9 E le, Sutna wolo kafinɛfɛɛnlɛ pre, mblɛ pe peyɛ yeeri Judae, a pe n pe Judae pre, mbe ti mbe pe paan kosie kan e yiɛ, kre pie chin na ni e kori.
10 Ŋgi na hin? E frɔ mu li ni kee kre na, ki tia kanyana ŋga ki paan waŋgra kro na, mbe paan leele kro pe mbe le kre, mbe e shɔ mbe yili ki nu.
11 Ni paan fuŋgaami, kena e yire chichie, e e shɔnlie yii kɛ shiin, mbe ndro waa shia e fɔtɔɔrɔ ŋga ee ta kre shɔ e kɛɛ.
12 Ŋmba we wi mbe yili wre, mbe u pe Nyiɛkpɔɔ Suminyuŋgo kre lam kaan, mbe wa yili ki nu na fio. Mbe ni lɛ Nyiɛkpɔɔ wre mɛɛ nyunɔ ufun na, mbe Jerusalem fɔŋgɔ kre, ni lɛ Nyiɛkpɔɔ wre chia ŋga kie yiri nyjeeri mbe pan kre mɛɛ nyunɔ u na. A mbe u yeeri mɛɛ fɔŋgɔ na, mbe ki nyunɔ u na.
13 Ŋmba uu ndie ni kre, u kee ŋga Ŋumu wre yuu sumifɛɛnlɛ pre pan kre loo.’”
Laodicea Hlɛ
14 “Nyunɔ mu sɛ Laodicea sumifɛɛnlɛ pre bituŋu wre ŋga.
‘Kee ŋga Amin, kpra dansiɛlifun ŋmba Nyiɛkpɔɔ na tia wra klu mu yirɛ kro gbeele wre yuu yi kre.
15 Ni e kepelee chin, e n wɛɛri, a e n nyjii. La, ni chaa na ee wɛɛri, mbe e wɛɛri, a na ee nyjii, mbe e nyjii.
16 La, ŋga ee pe bɛlibɛli, a yaa wɛɛri, a yaa nyjii kre ndra na, mbe e hlu mbe yili ni nyuu.
17 E kro ja na yuu na e ta, ki tia e nyu, a yaka n e shian na. La, e n chin na yire lɛ kanyanafɛɛnlɛ, na foorofɛɛnlɛ, na shianfɛɛnlɛ, na fuunlo, na tro wejiwɛɛrɛ.
18 Kena ni e jaari na yuu e pan na, e pan ni pan, e swa nyiɛ titi lɔ, kre ee pe swafɛɛnlɛ titi. E dodonyi finyi lɔ ni pan e le, e e nyifɛɛrɛ wejiwɛɛrɛ yire tɔ, e tuwe lɔ ni pan, e le nyiɛlɛ, kre ee nya chasi.
19 A mblɛ ni kori kre, pre yiɛ kee ni yuu pe pan, na pe ndie tinii, kena e gbeŋmba e e jawala chinɛ e laa e sisam kro.
20 E le, nii wa mu yire krɔ nyu na na ki koori, ŋmba we ni mana loo, mbe paan krɔ nyaa ni pan kre, mbe le ufun pan katoo, mbe mi na wre chaa mbe li.