E O Tafun Wre Ŋga Mɛɛ
135
E o Tafun Nyiɛkpɔɔ wre ŋga mɛɛ,o Tafun wre sumifɛɛnlɛ pre
e u ŋga mɛɛ.
2 Yire mblɛ e tnumu tuni
o Tafun Nyiɛkpɔɔ
Jaŋgafun wre katoo kre,
3 e u ŋga mɛɛ. Ŋgi na hin?
O Tafun Nyiɛkpɔɔ wre nyu o na.
E mɛɛ kɔ e u mɛɛ kpɔɔ. Ŋgi na hin?
Ki nyu na ee u mɛɛ kpɔɔ.
4 Nyiɛkpɔɔ u Jacob wɔ
na u pe u wo,
mu tia Israel leele pe u leele.
5 Ni chin na o Tafun
Nyiɛkpɔɔ wre kpɔɔ.
U kpɔɔ mu wɛ sɛɛnlɛ
nyjɛ mu chin kro na.
6 Ŋga ki tna o Tafun
Nyiɛkpɔɔ wre pan
u pini nyjeeri na tra,
na epo na yi latɛɛ
nyjɛ mu chin ŋga kro nu,
ŋga u chaa kre u pini.
7 U tia tloe na yiri
tra nyukɔɔrɔ na na paan.
U tii na nyiɛ paan mbe kra nyini,
mbe ti mbe fuflɛ kɔ ki titɛɛ.
8 Wre wra Egypt leele bijloe
na pe yurɛ mblɛ
pra klu mu se gbo.
9 Egypt lete na
wra kawako na kekpɔɛ pe,
ŋunu Pharaoh na u leele kro na.
10 Wra waŋgra waŋgra kla,
mna ŋulo jaŋgafɛɛnlɛ gbo gbo.
11 Wra Amora leele ŋunu Sihon gbo,
mna Bashan ŋunu Og gbo,
mna Canaan ŋulo kro gbo,
12 mna pe trɛ na pe yirɛ wru,
mna u leele, Israel leele
ŋga krɔyirɛ.
13 O Tafun Nyiɛkpɔɔ,
mu mɛɛ wa nyjila kro nu.
A mu mɛɛ wa fun
lewo nyu na fio.
14 O Tafun Nyiɛkpɔɔ
we u leele kala li,
a we u sumifɛɛnlɛ fooro le.
15 Leele mblɛ pe n mu chin kre,
sɛɛnlɛ nyjɛ lewo swanyiɛ
na swafiŋge tɛɛ mu gbeele
pe sumi.
16 Yii nyu ni, nde yia jaa paara,
yii nyiɛlɛ ni, nde yi n na nyaa,
17 yii ndiile ni,
nde yi n na ndru, a yia jaa ŋu.
18 Mblɛ pe yi pe mu na yi sumi kre,
pan pe nyi na sɛɛnlɛ yire yi.
19 Israel leele, e o Tafun
Nyiɛkpɔɔ wre ŋga mɛɛ.
Aaron katoo leele
e o Tafun wre ŋga mɛɛ.
20 Levi katoo leele,
e o Tafun Nyiɛkpɔɔ wre ŋga mɛɛ.
Yire mblɛ e Nyiɛkpɔɔ fiɛ kro
e u ŋga mɛɛ.
21 Leele mblɛ ee wa
Jerusalem na kro,
e Nyiɛkpɔɔ ŋmba uu wa,
mu tni Jerusalem na wre ŋga mɛɛ.
E ti mbe u mɛɛ ŋgaa kre kpɔɔ.