David Na Nyiɛkpɔɔ Nyu-Nunu-Daka Kre
132
O Tafun Nyiɛkpɔɔ,David kanyana nyjɛ nu
u frɔ ta yire le mu u sɔɔnri.
2 David na da mna nyu yo Jacob
Nyiɛkpɔɔ Jaŋgafun wre pan na,
3 “Mba le katoo, ndee
mbe le nyuŋgo mbe sni,
4 a mba ti mbe ŋunumu ni shɔ,
ndee mbe nyiɛlɛ ka mbe wa,
5 mbe sɛ su na mbe lawee cha
mbe ki pe Jacob Nyiɛkpɔɔ
Jaŋgafun wre katoo.”
6 O naa wa Bethlehem na,
mna mu Nyu Nunu Daka kre
kee loo,
a o na sɛ ki nya Jarim na,
7 a o na kna mu yo na,
e ti o sɛ na ki ni Suminyuŋgo wa,
mbe sɛ kosie kan
mbe mu sumi wa.
8 O Tafun, yiri mu sɛ
mu wuu ndoo kre nu,
mbe ŋu na mu Nyu Nunu Daka
ŋga ki mu jaŋga nyina kre tni.
9 Ti mbe mu Srawɔfɛɛnlɛ pre fraka,
mbe mu sumifɛɛnlɛ yɛshɔɔrɔ li.
10 Maa shia mu sumifun
David ŋmba mu wɔ wre je.
11 O Tafun Nyiɛkpɔɔ wre na da
mu ŋunu David ŋga,
a wa laa ki kro mbo,
“Mu nanae nu mbe ndro wɔ
mbe tɛɛ mu ŋujɔɔn kre na.
12 Na mu biile waa taa
ni nyu nunu kee,
na ni mbra kee
nyjɛ ni pe nyina yire na,
kena pe biile we mu jɔɔn kre li
nyjila kro nu.”
13 Ŋgi na hin? O Tafun
Nyiɛkpɔɔ wre Zion chaa,
mu bawa wɔ mu ki pe u tnihaa.
14 Mbo, “Ni wuuhaa yi kre,
nyjila kro nu, a mna mbe tni,
ŋgi na hin? Mna ni chaa.
15 Mbe chia kre dwan,
mbe ki ŋga ŋga kie ki shian kro,
mbe ti mbe sro bɔ
ki shianfɛɛnlɛ na.
16 A mbe ki srawɔfɛɛnlɛ ŋga
pe tnumu ŋga pe tuni kre dwamu,
mbe ki leele yɛshɔɔrɔ tɛɛ
mbe mɛɛ kɔ.
17 Mna mbe ti David nanae pre
wa pe ŋunu kpɔɔ,
a mbe ti u kro jɔɔn kre na.
18 Mbe ti mbe nyifɛɛrɛ
u loŋgoolo gbo,
la, u ŋunumu lie kre we kpɔɔ,
mbe yira kro bɔ u na.”