Reuben Nɔɔ Leele
5
Jacob biblɔ lopom na wi Reuben, la, ŋga Reuben na sni na u lɛ chɔ ni kre ndra na, pra u semu lopom yire haa wru mu Jacob pɔ Joseph wre biile ŋga. A ki tia ŋga praa pe jlom leele mɛɛ nyunɔi mbe tɛɛ kre, pe nsra Reuben mɛɛ nyunɔ na pɔ lopom wi. 2 Kii wa na Judah na wi u lɛbiile pre faŋgafun, a wre jlom leele nu ŋunu na yiri, la, semu lopom yire haa kre rɛ, Joseph wra ki ta.3 Reuben, Jacob biblɔ lopom wre na bibilɛ jijirɛ se, pre na lɛ Hanoch, na Pallu, na Hezron, na Carmi.
4-6 Joel nɔɔ leele na lɛ, Shemaiah, na Gog, na Shimei, na Micah, na Reaiah, na Baal, na Beerah. Wre Assyria ŋunu Tiglath-Pileser na yii mu sɛ haalee u tra nu kre. Beerah na wi Reuben jlom kre lopom.
7 Imi na pra pe jlom yire loplombo pre mɛɛ nyunɔ mu taala yi kre. Jeiel mɛɛ kra yiɛklu, na Zechariah, 8 na Bela, Azaz biblɔ wre, a u tolɛɛ na wi Shema, a wra yiri Joel jlom na. Kre jlom ŋga leele naa wa mu tni Aroer chia kre na, mu yire wa na shie nyjeeri haa mu sɛ su Nebo, na Baal-Meon na. 9 A na mu kna yila finhaa pra tni tra kre nu mu sɛ su tablɔ tra kre nyu na, na shie Euphrates lɔɔ kre nyu na. Ŋga pe yurɛ na nɛɛ Gilead tra nu kre kra tia pra tni ma.
10 Nyjila ŋga nu ŋunu Saul na jɔɔn li kre, Reuben jlom leele pre na sɛ wi na Hagar jlom leele ni mna pe ja, mna pe tra ŋga kraa wa na shie Gilead yila finhaa kre shɔ mu tni.
Gad Nɔɔ Leele
11 Gad jlom leele pre na tni mu mbra Reuben jlom leele pre na, na shie nyjeeri haa Bashan tra nu, hali pra tni mna sɛ su Salecah chia kre na. 12 Pe jlom loplombo pre plɛ na lɛ, Joel, na Shapham, na Janai, na Shaphat. 13 Pe wolo pre plɛ na tni sele sele. Pre na lɛ Michael, na Meshullam, na Sheba, na Jorai, na Jacan, na Zia, na Eber. Praa sele kɔɔnashin.
14 Pre leele mblɛ krɛrɛ Abihail, Huri biblɔ wre nɔɔ leele na lɛ, a pe tolɛɛlɛ na lɛ Abihail, na Huri, na Jaroah, na Gilead, na Michael, na Jeshishai, na Jahdo, na Buz. 15 Ahi, Abdiel biblɔ ŋmba tolɛɛ na wi Guni wre na wi yire sele yire lopom.
16 Gad jlom leele praa wa Gilead na ki seechiɛ yire na Bashan tra kre nu. Kre na yurɛ kahaa trɛ nyjɛ yiraa wa Sharon na yire ni kro. 17 Pre leele mblɛ krɛrɛ pra pe mɛɛ nyunɔ mu le hlɛ nu mu tɛɛ, nyjila ŋga ni Jotham na ŋunumu li Judah tra nu, a Jeroboam na ŋunumu li Israel tra nu kre.
Yila Finhaa Ŋunɔwifɛɛnlɛ Pre
18 Reuben jlom leele, na Gad leele, na Manasseh jlom kre yɔɔ leele mblɛ praa wa mu tni na shie yila finhaa wa kre naa kagbenyi fuloe shiin na jijirɛ, na lafɛɛ kɔɔnashin, na fuloe taarɛ. Praa faŋga ni, a pra pe nyina imi na pe wii na brɔfiɛn yiɛshiin, na bɛŋɛ, na ŋunɔ wi yirɛ nyjɛ ni pe peyɛ toni ni. 19 Pra sɛ wi na Hagar leele, na Jetur leele, na Naphish leele, na Nodab leele ni. 20 Ŋga praa shie mbe sɛ wi kre, pra Nyiɛkpɔɔ tali na u ya pe na, ŋgi na hin? Praa kaan u na. A Nyiɛkpɔɔ na ya pe na, a pra wi mna Hagri leele pre na mblɛ pra ya pe na kre ja. 21 Pra Hagar leele pre yurɛ shɔ pe pan. Pra pe nyuuma kagbenyi fuloe shiin na kɛ, na mbaala kagbenyi lafɛɛ shiin na fuloe shiin na kɛ, na bubunlɔ kagbenyi shiin shɔ, mna ndru mu leele kagbeŋge lafaa yii mu ya. 22 Leele pre tataara na to ŋunɔ kre nu, ŋgi na hin? Nyiɛkpɔɔ wra ŋunɔ kre wi. Pra tra kre shɔ mu tni mna sɛ su nyjila ŋga ni Assyria leele na kɔ mna pe yii mu sɛ na pe ni haalee pe tra.
Manasseh Sele Yɔɔ Kre
23 Manasseh jlom yɔɔ kre leele na nɛɛ titi, a praa wa mu tni mu yire Bashan tra kre nu mna sɛ su Baal-Hermon, na Senir, na nyua Hermon kre na. 24 Pe jlom yire loplombo na lɛ, Epher, na Ishi, na Eliel, na Azriel, na Jeremiah, na Hodaviah, na Jahdiel. Pe kro na mɛɛ shɔ, mnaa gbun ni na wii.
Pra Wi Mna Yilafinhaa//Jlom Yire Leele Ja
25 La, Reuben, na Gad, na Manasseh leele mblɛ praa wa na shie yila finhaa wa pre nsra kpra li na pe tolɛɛlɛ Nyiɛkpɔɔ wre ni. Pra u je, mna sɛ Canaan leele mblɛ Nyiɛkpɔɔ na ni pe yiɛ jle kre sɛɛnlɛ wru na sumi. 26 Ki tia Nyiɛkpɔɔ na kanyaa le Assyria ŋunu Tiglath-Pileser nu, wre chɔɔ praa yeeri Pul kre, a wra pan mu wi na pe ni mna pe yii mna sɛ na pe ni u tra nu. Wra sɛ pe tɛɛ Halah, na Habor, na Hara na, mu mbra Gozan lɔɔ kre na, bawa pe nyi mu pan mu su aŋga.