Joseph Na Ŋunɛ Shiin Nɔɔ Nyina
40
Mbakɔ ŋunu Pharaoh simi lefɛɛnlɛ lopom, na u paanu fɔfɛɛnlɛ lopom na punu u na. 2 Ki tia u krɔ na kun na pe ni. 3 A wra tia pra sɛ pe le nyuŋgo ŋunu shiefɛɛnlɛ lopom wre katoo mna pra Joseph le kre chɔɔ. 4 Pra mu nyuŋgo wa, a lopom wre na tia Joseph naa pe le.5 Ki ble ka blee Egypt ŋunu simi lefun wre, na u paanu fɔfun wre, na ŋunɛ yɛ ŋunu peyɛ yɛ nyuŋgo wa, a ŋunɛ yire nɔɔ nyinaa naa yi yɛ yɛ. 6 Ŋga nyiŋge na se bnimi a Joseph na sɛ pe lehaa kre, wra nya na pe tni tni sɔkrɔ sɔkrɔ. 7 A wra pe wie mbo, “Mni a e yiɛ je ma hin?”
8 A pra kna mbo, “Ŋunɛ yɛ o na ŋunu oyɛ yɛ, a o n ndro ta mbe u o nyina yi nɔɔ?”
A Joseph na kna mbo, “Nyiɛkpɔɔ u ŋunɛ nɔɔ nyina, kena e e ŋunɛ yire tɔɔnri ni pan ɛ!”
9 A simi lefun wre na yo mbo, “Ndaa ŋunɛ ŋunu mna tre sɛnyi nyjɛ ni pe simi pini yire ka nya ni yɛsimi, 10 na ki klɛɛ pe taarɛ. Ŋga ki wrɛ na fun ki na to, na ki totoe pe, mu sɛ to, a ki sɛnyi be. 11 Kre nyjila kre, na ŋunu Pharaoh gbɔyira kree wa ni kɛɛ, ki tia ndaa tre sɛnyi nyjɛ ni pe simi pini yire yuwi mna le gbɔyira kre nu, mna ki le u kɛɛ.”
12 A Joseph na yo mbo, “Tinyi klɛɛ taarɛ yire nyina blee taarɛ. 13 Mna blee taarɛ, ŋunu wre we mu wɔ nyuŋgo, mbe ndru mbe mu tnumu lɛɛ kre le mu kɛɛ na, mbe mu pe u simi lefun imi na mnaa pini kre. 14 La, na kee kro waa nyu mu mu ŋga, jande gbeŋmba mu ni sɔɔnri, mu nyu ni na, mu ni kee yo ŋunu wre pan mbe u ni wɔ nyuŋgo mna. 15 Ŋgi na hin? Yii pra ni yii pɔɔrɔ na Hebrew tra nu mu pan na ni ni mna, hali Egypt na mna ni n sisaa ka pe kple, ŋga ki nyina na ki fna pe ni le nyuŋgo.”
16 Ŋga paanu fɔfun wre na nya na Joseph simi lefun wre ŋunɛ yire nɔɔ nyina a ki tna u pan kre, a wra yo Joseph pan mbo, “A mi na ŋunɛ yɛ ŋunu na, na ni paanu kakɛɛ taarɛ tio. 17 Kakɛɛ ŋga kraa wa mu taa nyjeeri kre, sroe nyininyini nyjɛ pe fɔ kanhun ni naa wa ki nu, a hanyiɛlɛ naa yi lii ni ndra na.”
18 A Joseph na kna mbo, “Imi ŋunɛ yire nyina yi kre, kakɛɛ taarɛ yire, ble taarɛ yi. 19 Mna ble taarɛ, ŋunu Pharaoh we mu wɔ nyuŋgo mbe ti pe mu ndra kɔ. A we mu haŋa hlu tiŋge na mbe hanyiɛlɛ mu li.”
20 Ble taarɛ ble na, ŋunu Pharaoh naa u seble lii, mna sukpɔɔ pe, mna kɛ wa mu u loplombo yeeri mbe pe paan li. Ki ble kre lam wra u simi lefun wre, na paanu fɔfun wre wɔ nyuŋgo, mna pan na pe ni u loplombo pre yiɛ na wa. 21 Ŋunu wre na tia simi lefun wre na ndru mu sɛ na u tnumu lɛɛ ŋga wraa tuni kre tuni, imi na wraa ŋunu leni simi kre chɔɔ, 22 la, wra tia pra paanu fɔfun wre gbo mna hlu tiŋge na, imi na Joseph na pe ŋunɛ yire nɔɔ nyina kre. 23 La, simi lefun wre nsra Joseph sɔɔnri na, wra u kee fɛɛ peii.