Joseph Wa Potiphar Katoo
39
Ŋga pra sɛ Joseph ni Egypt tra nu kre, Egypt ndro Potiphar, ŋmba wra pe ŋunu Pharaoh loplombo pre wa, a wre na wi ŋunu shiefɛɛnlɛ lopom kre, wre wra Joseph lɔ mna yili Ishmael leele pre pan. 2 O Tafun Nyiɛkpɔɔ na yire Joseph kro, mna tia wra uyɛ ta u tafun Egypt ndro wre katoo wa. 3 Ŋga Potiphar na nya na o Tafun Nyiɛkpɔɔ wa Joseph kro, a Joseph kee kro na nyɔɔ na u kaan kre, 4 kra tia u yiɛ na shɔ Joseph na, a wra tia wraa yaa u na. Potiphar na u katoo kre kala kro wru mna le u kɛɛ, mna yirɛ nyjɛ yiraa wa u pan kro wru mu le u kɛɛ mu ya, a wraa yi le. 5 Mu yire nyjila ŋga nu Potiphar na u katoo, na u yirɛ kro wru mu le Joseph kɛɛ na wra yi le kre, o Tafun Nyiɛkpɔɔ na Potiphar katoo kre kro dwan, Joseph ndra na. O Tafun Nyiɛkpɔɔ dwamu kre naa wa Potiphar yirɛ kro na, hali u katoo yurɛ, mu sɛ su u see yirɛ na kro. 6 Kra tia Potiphar na u yirɛ kro wru mna le Joseph kɛɛ poŋgo na wra yi le. Ŋga wra Joseph ta wra yirɛ yire le u pan ma kre, u nsraa kee ka jawa mbe pe na, na sro ŋga we li bɔkɔ. Kre nyjila kre, na Joseph yire nyanyjɔ, mu nyu titi, 7 Kraa wa wa maa, a Joseph niŋge na pe u tafun Potiphar chɔ na, a wra Joseph yeeri mbo, “Pan mu sni na ni ni.” 8 La, Joseph na ki je, mna yo u pan mbo, “Le, ni tafun kee ka ma na yaka ni katoo ŋga nu, u kaan ni na, mu u yirɛ kro wru mu le ni kɛɛ kolo kro na. 9 Ndro wa n wa katoo ŋga nu, mu jaŋga ni mu wɛ ni na. Kre yira n wa mbe mba jaa kɛ taa ki na, fɔna ŋu chiin bɔkɔ. Ŋgi na hin? Ŋga mu pe u chɔ kre ndra na. Kena kala ŋgi nunu kie ti mbe ni kre sisam kee ŋga nyini pe, mbe fun o Tafun Nyiɛkpɔɔ wre na hin?” 10 Blenyini fuu ŋga, pan wraa u sinlɛ kre kee yuu Joseph pan, la, Joseph na ki je, mna uyɛ kun chlɔ wre na.11 La, ki ble ka, Joseph na sɛ na tnumu tuni katoo wa, a na sumifɛɛnlɛ mblɛ praa wa katoo wa pre wa n wa. 12 A chlɔ wre na sɛ Joseph yii u dodoŋgi na pɔɔrɔ na mbo, “Aŋga rɛ, mu sni na ni ni.” La, Joseph na dodoŋgi kre foli mu le chlɔ wre kɛɛ, mna fɛ mu yili katoo wa. 13 Ŋga chlɔ wre na nya na u fɛ mu yili fimi na, mu u dodoŋgi ti u kɛɛ kre, 14 chlɔ wre na gble le mna u sumifɛɛnlɛ pre yeeri mbo, “E le, kala ŋga Hebrew ndro ŋmba ni ni plɔ pan mna wre pan na pini. U pan mu le ni kro mbe ni cha, a ni gble le kpɔɔ. 15 Ŋga u nya na ni gble leni kre, a u fɛ mu yili fimi na mu u dodoŋgi ti.”
16 Chlɔ wre na Joseph dodoŋgi kre tɛɛ u jaara mna sɛ su na Joseph tafun wre na pan katoo. 17 A chlɔ wre na kee ŋga wra bɔ sumifɛɛnlɛ pre pan kre chɔɔ bɔ blɔ wre pan mbo, “Hebrew tnu wre ni mu pan mna kre u pan mu ni tɔ nyuŋgo. 18 La, ni gblee le badaaŋga, a u fɛ mu yili fimi na, mu u dodoŋgi ti mna. Kre yi kre.”
19 Ŋga Potiphar na kala kre loo kre, u krɔ na kun kpɔɔ. 20 A wra tia pra Joseph yii mna sɛ le nyuŋgo ŋga nu ŋunu wre naa leele leni kre nu. 21 La, Nyiɛkpɔɔ na yire Joseph kro mna u dwan, ki tia nyuŋgo lefɛɛnlɛ pre lefun wre naa u kee chaa. 22 Ki tia blɔ wre na Joseph pe leele mblɛ pe le nyuŋgo kre lopom, mna lawee kre kala kro le u kɛɛ. 23 Blɔ wre kee ka na ma na yaka ni, ŋga Joseph naa wa wa kre ndra na, a ŋga Nyiɛkpɔɔ naa wa u kro kre ndra na, kee kro naa nyɔɔ na u kaan.