6 Judah na chlɔ leŋge mna u bijlo Er wre ŋga. Chlɔ wre mɛɛ na yi Tamar. 7 La, Er kepele nsra nyu o Tafun Nyiɛkpɔɔ yiɛ na, ki tia Nyiɛkpɔɔ na u gbo. 8 Bawa Judah na yo Onan pan mbo, “Mu nyjɔ Er lekuchɔ wre wru, mbe ŋu na wre sni, mbe mu biile se mbe mu nyjɔ wre ŋga, mbe u nɔɔ leele wa fun.” 9 Onan na u nyjɔ lekuchɔ wre wru, la, Onan na chin na biile pre we se kre, wre titi wolo ma, ki tia na wre na chlɔ wre sni, a u wejiŋge na paan, mbe u yi wo tra, imi kie pe mbe lekuchɔ wre wa se, mbe ki ti mbe u nyjɔ wre wa biile ta. 10 Kee ŋga Onan naa pini kre, o Tafun Nyiɛkpɔɔ yiɛ nsra shɔ ki na, ki tia wra wre gbo na. 11 A Judah na yo u pɔ chɔ Tamar wre pan mbo, “Ndru mu sɛ tni mu lɛ katoo mna mu lekulo kre lii wa, mbe sɛ su nyjila ŋga nu ni pɔ Shelah we lɛ.” Judah naa fiɛ na aada u pɔ Shelah wre we kɔɔ ku, imi na u nyjɔɔlɔ pre na ku kre. Ki tia Tamar na ndru mna sɛ tni u lɛ katoo.

12 Mbakɔ, kra mu chiin a Judah chɔ wre na kɔ mu ku. Ŋga wra chlɔ wre kumu pe mu kɔ kre, wre na u nunu Hirah ŋmba u yiri Adullam sele nu wre na sɛ Timnah na, bawa u sumifɛɛnlɛ bilɛ plɛ na nyi na u mbaala yooro knumu. 13 Ndro wa na sɛ yo Tamar pan mbo, “Mu nafun Judah shie Timnah na, mbe sɛ u mbaala yooro knumu.” 14 Ki tia wra sɛ u lekulo yonyi laala mu tɛɛ, mna fɔnyi bali, mna sata tɛɛ mu u yiɛ tɔ, na mu u nya ma u chin, mna sɛ tni chia ŋga praa yeeri Enaim nyu na, Timnah kolo. Ŋgi na hin? Wra chin na na kre nyjila kre, na Judah pɔ ble Shelah wre lɛ, a pe n tia u u leŋge.

15 Ŋga Judah na da wa mu u nya kre, wra jawa na tɛtiɛrɔɔ wa wi. Ŋgi na hin? Ŋga wra yiɛ tɔ sata ni kre na. 16 Judah nsra chin na u pɔ chɔ Tamar wre wi, a Judah na flo mu da u na kolo mbɛɛ na wa, mna yo u pan mbo, “Ti mbe o sɛ sni.” A chlɔ wre na kna mu u wie mbo, “Swa mni mu ni ŋga mbe sni na ni ni hin?”

17 A Judah na yo mbo, “Mbe sikapɔlɔ wɔ ni sikaala nu mbe mu ŋga.”

A chlɔ wre na kna mbo, “Yira ŋgi mu ni ŋga mbe ni tɛɛ, mbe sɛ su na mu pan na sugbɔ wre ni hin?”

18 A Judah na kna mu u wie mbo, “Yira ŋgi mu chaa mbe ni mu ŋga hin?”

A chlɔ wre na kna mbo, “Mu lebiile feelee ŋga ni mu yirɛ tnɔ ŋga, na ki maŋa kre, na mu kanyie ŋga mu kɛɛ ŋga ni chaa,” A Judah na yi bali mu u ŋga, mna sɛ sni na u ni, a wra kɔ mna siire ta. 19 Tamar na sɛ katoo mna sɛ yonyi yire laala mu tɛɛ, mna ndru mu u lekulo yonyi yire bali mu tɔ na.

20 Judah na kɔ mna u nunu Hirah Adullam ndro wre tun na sugbɔ wre ni chlɔ wre pan, mbe u yirɛ yire shɔ mbe pan mbe u ŋga. La, Hirah nsra chlɔ wre nya wa. 21 A wra bilɛ plɛ wie Enaim na wa mbo, “Sena chlɔ tɛtiɛrɔɔ ŋmba u paan na jiin kolo mbɛɛ na mna wre nyi hin?” A bilɛ pre na kna mbo, “O n da mu chlɔ tɛtiɛrɔɔ nya mna tun.”

22 Ki tia wra ndru mna sɛ yo Judah pan mbo, “Ŋga ni sɛ ni n chlɔ wre nya, a ni bilɛ mblɛ pee wa lawee kre nu wie, a pe yo mbo, ‘Chlɔ tɛtiɛrɔɔ wa n wa wa.’”

23 A Judah na yo mbo, “Kena yi ti u pan hin, mbe leele wa kɔɔ na o pini mbra tɛɛ u ndra na. Kaa u sugbɔ wre ni chaa mbe mna sɛ u ŋga, a na kre yi ŋga, mu u n sɛ u nya.”

24 Kie pe nyiɛpɔ taarɛ kɔkro ndro wa na pan mu yo Judah pan mbo, “Mu pɔ lekuchɔ Tamar wre tiɛri mu siire ta.” A Judah na kna mbo, “E u wɔ fimi na e sɛ u sro e gbo.”

25 Ŋga pra u wɔ mbe sɛ na u ni fimi na kre, a wra ndro tun u nafun Judah pan mbo, “Ndro ŋmba wo yi tnɔ yira ŋga, na ki maŋa ŋga, na kanyie ŋga, wre mi na wre siire kre ta, kena yi shɔ mu yi le na mu yifun chin rɛ.”

26 Ŋga Judah na yirɛ yire nya kre, wra yi chin, a wra yo mbo, “Jaa chlɔ wre fraka mu wɛ ni na, mi mbe na ni pɔ Shelah wru mbra u ŋga mbe wra leŋge, a ni n ki pe.” Ki tia pra chlɔ wre wa, a mu yire kre nyjila kre na shie, Judah nsra sni na u ni na.

27 Ŋga Tamar se nyjila na da kre, pra nya na atae bilɛ shiin praa wa u lɛɛ. 28 Nyjila ŋga nu wraa sii kre, biile pre nunu kɛ na klu mu yili fimi na, a chlɔ ŋmba wra u yii mbe u se wre, na jese nyiɛ pɔ u kɛ kre na, mna yo mbo, “Ŋmba u klu mu yili fimi na wi kre.” 29 La, pɔ wre na ndru mu u kɛ kre tini mu le lam, a shiinwo wre na kna mu to, mu jle wo wre ti. A chlɔ wre na kna mbo, “Mu kolo vru mu yɛ mu yili.” A kra tia pra u mɛɛ tɛɛ Perez. 30 Ŋga Perez na to mu kɔ kre, a u ŋmbrɔ wre kɛ na pra jese nyiɛ pɔ wre na chin mna to. A pra u wre mɛɛ tɛɛ Zerah.