Nyiɛkpɔɔ Nyu Nunu Pe Na Noah Ni
9
Nyiɛkpɔɔ na Noah na u biile dwan mna yo pe pan mbo, “E se mbe e nɔɔ leele nɛɛ, mbe chirɛ tra yiɛ na. 2 Yurɛ pre kro, na hanyiɛlɛ, na mbroe pre we na e fiɛ. Ni pe kro le e jaara mbe e jaŋga ta pe na. 3 Fuŋga ee jaa na pe kaa, mbra wrɛ nyinyi lii. Ni e ŋga yi yi kro, e sro yi. 4 La, yaa shia yurɔ ka, na e n u nyimi kna mu wo. Ŋgi na hin? U nyimi yire nu u ŋmaa nyi. 5 Ŋmba we u ŋmbrɔ nyimi kna mbe wo kpan, u ndie tiniɛ yi kumu, a yurɔ ŋmba we lewo gbo kpan, u ndie tiniɛ yi kumu.6 Nyiɛkpɔɔ na lewo gbeele
na wre titi wi,
kena ŋmba we ndro gbo kpan,
ki fna mbe pe u gbo ka na.
7 Ki fna mbe e se tataara mbe e nɔɔ leele chirɛ tra yiɛ na.”
8 Nyiɛkpɔɔ na yo Noah na u biile pan mbo, 9 “E le! Mbe nyu nunu pe na yire na e nɔɔ leele ni, 10 na yurɛ mblɛ pe ŋuni kro ni, hanyiɛlɛ pre kro, na pɔɔri yurɛ pre kro, na yira ŋga yire na kre yili krɔ kre nu kro ni, mbe nyu nunu kre pe. 11 Nyu nunu ŋga mbe pe yi kre. Ni nyu yuu na mba yira ŋga ki ŋuni kla nyumu ni na, a mbaa nyumu tɛɛ mbe tra ŋga kla na fio. 12 Sɛmbɛɛrɛ yira ŋga mbe pe mbe tɛɛ mi na ŋu, na yira ŋga ki ŋuni kro ni yi kre. Kre nyu nunu ŋga o pini ŋga we kro ma nyjila kro nu. 13 Ni ni glaŋgoli pe mu le tloe nu, mbe ki pe nyu nunu ŋga mi na ŋu pe kre sɛmbɛɛrɛ yira. 14 Nyjila ŋga nu mbe tloe tɛɛ mbe nyiɛ yiɛ tɔ, mbe glaŋgoli yili kpan, 15 mbe ni nyu nunu ŋga mi na ŋu na yurɛ kro pe, na mba nyumu tɛɛ mbe yira kro kla na kre sɔɔnri. 16 Nyjila ŋga nu glaŋgoli kre we yili tloe nu kpan, mbe ki nya, mbe blenyini nyu nunu ŋga kii wa mi na ŋu, na yira ŋga ki ŋuni kro lalaa kre sɔɔnri. 17 Kena kre sɛmbɛɛrɛ yira ŋga ni tɛɛ na kre nyu nunu ŋga pini, mi na ŋu na yira ŋga ki ŋuni kro ni.”
Noah Na U Biile Kee
18 Noah biile mblɛ pra yili krɔ kre nu na lɛ Shem na Ham na Japheth. Canaan lɛ na wi Ham. 19 Noah biile taarɛ mblɛ nu leele kro yili mu nyina tra ŋga na.
20 Falifun na wi Noah, a wre wra yiɛklu mna tre sɛnyi nyjɛ ni pe simi pini yire see ka pe. 21 Ŋga Noah na simi kre ka gbɔ mu to kre, wra yirɛ laala uyɛ na, mna sni wejiwaara u yoŋgo nyuŋgo nu. 22 Ŋga Ham, Canaan lɛ wre na u lɛ nya na u sni wejiwaara kre, wra yili fimi na mna sɛ ki yo Shem na Japheth pan. 23 A Shem na Japheth na yoŋgo ka bali, mna taa pe patiɛ na mna ndru kro ni brɛmm, mna sɛ yoŋgo nyuŋgo kre nu, mna sɛ pe lɛ tɔ na ki ni. Pe nsraa chaa mbe pe lɛ nya na u sni wejiwaara, kre kra tia pra krɔ kna mu wa u na, mna ndru kro ni, mna sɛ u fɛɛrɛ tɔ. 24 Ŋga Noah yiɛ na to u na, a wra kala ŋga u pɔ ble wre pe u na loo kre, 25 a wra yo mbo,
“Suŋgɔɔ wa Canaan na.
We pe u nyjɔɔlɔ pre tnu.”
26 A wra ndru mna yo mbo,
“E ti o Shem Nyiɛkpɔɔ wre ŋga mɛɛ.
Canaan we pe Shem tnu.
27 Nyiɛkpɔɔ we ti mbe Japheth
tra ta kpɔɔ,
mbe u nɔɔ leele na Shem leele
chaa mbe tni pe yonyi nyinyi nu.
Canaan we pe Japheth tnu.”