6 Ŋga nyuɛ yire ndrɛ naa nyaa kre, ki ble fuloe shiin kɔkro, Noah na krɔ kre vromboe yire ka nyaa, 7 mna gɔɔgɔɔ wɔ mu wa fimi na, a wraa wa na tro nyumu kre yiɛ na, na shie na paan, mna sɛ su na kra pan mu yuwa peii. 8 Noah na ndru mu katoo kotro wɔ mu wa mbe chin na nyumu kre taa mu yuwa tra yiɛ na ree? 9 La, katoo kotro wre nsra lawee ta mbe to. Ŋgi na hin? Na nyumuu wa tra yiɛ na tɛ. A wra ndru mna sɛ le krɔ kre nu, a Noah na kɛ tini mna u yii mu le lamu. 10 Ble kɔɔnashin ble na, wra ndru mu katoo kotro wre wɔ mu wa na. 11 Ŋga wra ndru mu pan yilakɔŋgɔ kre, na olive tiŋge wrɛ nyiŋgee wa u nyu na. Ki tia Noah na chin na nyumu kre tii mu ya. 12 Ble kɔɔnashin ble na na, Noah na ndru mna kotro wre wɔ mu wa na, a u nsra ndru mna pan na.

13 Ŋga Noah na li yɛlɛ lafɛɛ kɔɔnanu na nunu kre, nyiɛpɔ jle wo kre ble ŋga ki yiɛklu na, nyumu kre na shɔɔnri tra yiɛ na mna kɔ. A Noah na krɔ kre ndra nyaa, mna le mu nya na lawee kre yuwa mu ya. 14 Mu sɛ su nyiɛpɔ shiinwo kre ble fulo na kɔɔnashin ble na kre, na tra yiɛ yuwa gbeŋglen.

15 Bawa Nyiɛkpɔɔ na yo Noah pan mbo, 16 “E yili krɔ kre nu, ŋu na mu chɔ, na mu biile, na pe chiɛlɛ ni, 17 mbe mu yurɛ pre na hanyiɛlɛ pre wɔ mbe wa kro, imi kie pe mbe pe jaa se mbe chirɛ tra yiɛ na tataara.” 18 Ki tia Noah na u chɔ, na u biile, na pe chiɛlɛ na yili krɔ kre nu. 19 A yurɛ pre kro, na hanyiɛlɛ pre kro na yili krɔ kre nu feko feko imi na pe sembremu nyi.

20 Noah na sragbunu sin mna O Tafun Nyiɛkpɔɔ ŋga. Wra yurɛ mblɛ pe pe cheche nununu, na hanyiɛlɛ mblɛ pe pe cheche nununu sro popomblo sragbunu kre na. 21 Sra kre ndiom na tna O Tafun Nyiɛkpɔɔ pan, a wra yo u yɛ pan mbo, “Mba yila lewo na mbe tra ŋga sun na fio. Ŋgi na hin? Mu yire lewo bimi u sisam pee jawala le. Ki tia mba yirɛ nyjɛ yi ŋuni tra yiɛ na kla kro na fio, imi na ni ki pe ŋga.