Nyiɛ Yire Paan Kee
7
Nyiɛkpɔɔ na yo Noah pan mbo, “Ŋu na mu sele wolo kro e sɛ le krɔ kre nu. Nyjila ŋga nu e nyi ŋga, ni nya na ŋu nunu chom mu kefrakaa pini leele kro nu. 2 Yurɛ mblɛ pe pe cheche Ni pan kre kro, pe nyini nunu kɔɔnashinshin cha, chlɔ na blɔ, la, mblɛ pe n pe cheche Ni pan kre, pre shiin shiin cha, chlɔ na blɔ mu le krɔ kre nu na, 3 hanyiɛlɛ kɔɔnashinshin yii yii, chlɔ na blɔ na chɔɔ mu le ki nu na, imi kie pe mbe pre kɔɔ ŋmaa ta mbe jiri tra yiɛ na. 4 Mna ble kɔɔnashin mbe ti nyiɛ pan lafo na blee ma ble fuloe shiin, mbe yirɛ nyjɛ ni gbeele a yira ŋuni tra ŋga na kro kla peii.”5 A Noah na kee ŋga O Tafun Nyiɛkpɔɔ na yo u pe kre pe.
6 Nyjila ŋga nu nyiɛ yire na nɔɔhle na paan kre, na Noah li yɛlɛ lafɛɛ kɔɔnanu. 7 A wre na u chɔ, na u biile, na pe chiɛlɛ, na sɛ le krɔ kre nu, ki tia pra ŋmaa ta. 8 Yurɛ mblɛ pra pe cheche Nyiɛkpɔɔ pan kro, chlɔ na blɔ, na hanyiɛlɛ chiɛlɛ na bilɛ, mblɛ pe pe cheche, na mblɛ pe n pe cheche, 9 pe kro na sɛ le krɔ kre nu, imi na Nyiɛkpɔɔ na yo Noah pan kre. 10 Ki ble kɔɔnashin ble kre na, a nyiɛ yire na nɔɔhle na paan.
11 Ŋga Noah na li yɛlɛ lafɛɛ kɔɔnanu kre, ki nyiɛpɔ shiinwo kre ble kɛmbɔkɔɔnashin na, nyumu ŋga kii wa tra tapan kre na vru mnaa yilii fimi na, a nyjeeri na nyaa na tokro pe nyaa, 12 a nyiɛ yire na pan chiin ble fuloe shiin, lafo na blee. 13 Kre ble kre lamu chɔɔ Noah na u chɔ, na u biile taarɛ, Shem, na Ham, na Japheth, na pe chiɛlɛ na sɛ le krɔ kre nu. 14 Pre na yurɔ mblɛ nyini mu chin ŋga kro, na hanyiɛlɛ mblɛ nyini mu chin ŋga kro na sɛ le krɔ kre nu. 15 Yurɛ pre nyini nyini chlɔ na blɔ na sɛ Noah pan mna sɛ le krɔ kre nu, 16 imi na Nyiɛkpɔɔ na yo kre. A Nyiɛkpɔɔ na krɔ kre nyu tɔ.
17 Nyiɛ kre na pan ble fuloe shiin, mna pan mu krɔ kre wru. 18 Lawee kro na nyi titi, a krɔ kre na yiri mu taa nyumu yiɛ na na tro. 19 Lawee na nyi chiin mna nyuɛ gedenyi titi yire ndrɛ tɔ. 20 Lawee na kro na nyini suwi, mna nyi chiin mu nyuɛ ndra tɔ, mu yi ti jaara kie pe yaadi kɔɔnashin. 21 Yira ŋga kii ŋmaa ni na tro tra yiɛ na kro na ku. Hanyiɛlɛ, na yurɛ, na leele kro na ku peii. 22 Yira ŋga kraa wa tra waa na, mna ja na ŋuni kro na ku peii. 23 Nyiɛkpɔɔ na yira ŋga ki ŋuni kro kla tra yiɛ na, yurɛ, na leweele, na hanyiɛlɛ kro, wra pe kla peii. Mblɛ na Noah praa wa krɔ kre nu pre chiin pra kro.
24 Ble lafaa na fuloe shiin na kɛ ni nyumu kre na tɛɛ mu tra yiɛ tɔ.